Kosmik Məsələlər üzrə
Şuranın ikinci iclası keçirilmişdir
Milli Aviasiya Akademiyasında Kosmik Məsələlər üzrə Şuranın növbəti, ikinci iclası keçirilmişdir.
İclasda şuranın sədri, akademik Arif Paşayev, rabitə və informasiya texnologiyaları naziri Əli Abbasov, maliyyə naziri Samir Şərifov, ekologiya və təbii sərvətlər naziri Hüseynqulu Bağırov, Azərbaycan Respublikasının Prezidenti yanında Ali Attestasiya Komissiyasının sədri Arif Mehdiyev, "Azərbaycan Hava Yolları" QSC-nin prezidenti Cahangir Əsgərov, Dövlət Torpaq və Xəritəçəkmə Komitəsinin sədri Qərib Məmmədov, "Azərkosmos" ASC-nin sədri Rəşad Nəbiyev və digər aidiyyəti qurumların nümayəndələri iştirak etmişlər.
Rabitə və İnformasiya Texnologiyaları Nazirliyindən AzərTAc-a bildirmişlər ki, iclasda Kosmik Məsələlər üzrə Şuranın nəzdində müxtəlif nazirlik və komitələrin, mərkəzi icra hakimiyyəti orqanlarının nümayəndələrindən ibarət işçi qrupunun sədri və üzvləri seçilmişlər.
"Azərbaycan Respublikasında kosmik sənayenin yaradılması və inkişafı üzrə Dövlət Proqramı"na uyğun olaraq ilk telekommunikasiya peykinin hazırlanmasının icra vəziyyəti, əsas və ehtiyat yerüstü peyk idarəetmə mərkəzlərinin tikintisi və kadr hazırlığı istiqamətində aparılan işlər barədə məruzə dinlənilmişdir.
İclasda ölkəmizdə aşağıorbitli məsafədən zondlama peyk sistemlərinin yaradılması mövzusunda müzakirələr aparılmışdır.
Kosmik Məsələlər üzrə Şuranın sədri, akademik Arif Paşayev məsafədən zondlama peyklərinin orbitə çıxarılmasının respublika üçün xüsusi əhəmiyyət kəsb etdiyini qeyd edərək bu istiqamətdə aparılan işlərə dair öz tövsiyələrini vermişdir.
Xatırladaq
ki, "Azərkosmos" Açıq Səhmdar Cəmiyyətinin
təsis edilməsi haqqında" Azərbaycan Respublikası
Prezidentinin 2010-cu il 3 may tarixli sərəncamına uyğun
olaraq ölkəmizdə kosmik fəaliyyət sahəsində
elmi-texniki nailiyyətləri və qabaqcıl təcrübəni
öyrənmək, bu sahədə dövlət siyasətinin
həyata keçirilməsinə dair müvafiq tədbirlərin
görülməsində iştirak etmək, eyni zamanda, sahənin
inkişafı ilə bağlı təklifləri
hazırlamaq məqsədilə Kosmik Məsələlər
üzrə Şura yaradılmışdır.
Azərbaycan.-2011.-28 dekabr.-S.3.