92 ailəyə bəxş edilən sevinc

Məhkum olunmuş bir sıra şəxslərin əfvi ilə bağlı

Azərbaycan Prezidentinin sərəncamı icra edilmişdir

Sivil cəmiyyətdə insan haqlarının təminatına və ümumbəşəri humanist dəyərlərin bərqərar olmasına xidmət edən əfv və amnistiya aktları olduqca yüksək dəyərləndirilir. Ümummilli lider Heydər Əliyevi böyük şəxsiyyət və lider kimi xarakterizə edən mühüm keyfiyyətlərdən biri də məhz bu idi ki, o, günahkarı cəzalandırmağı da, şans verərək bağışlamağı, islah etməyi də bacarırdı.

Ümummilli liderin qanunvericilik təşəbbüsü əsasında Milli Məclis 1996-2003-cü illərdə amnistiya haqqında 7 qanun imzalamış, 21325 məhkum azadlığa buraxılmış, ümumilikdə 78 mindən artıq məhkuma bu amnistiya aktları şamil edilmişdir. Bəzi iddiaların əksinə olaraq bu humanist addımlar ciddi tərbiyəvi əhəmiyyət daşımış, ölkədə cinayətkarlığın səviyyəsinin daha da azalmasını təmin etmişdir. 1995-ci ildən bəri imzalanan 50 əfv sərəncamı 5314 nəfər məhkuma şamil edilmişdir. Heydər Əliyev cəzanın adekvatlığı və humanistliyi məsələlərinə daim diqqətlə yanaşmış, bu məqsədlə hüquq-muhafizə orqanlarında yeni dövrün tələblərinə cavab verən mütərəqqi islahatların aparılmasını daim nəzarətdə saxlamışdır. İnsanlara böyük sevinc bəxş edən, onlara səmimi, ülvi hislər aşılayan əvf və amnistiya aktları ümummilli lider Heydər Əliyevin xalq və dövlət maraqları naminə reallaşdırdığı misilsiz işlər sırasında daim xüsusi qeyd olunur.

Ulu öndərin möhkəm təməllər üzərində əsasını qoyduğu siyasəti bütün sahələrdə uğurla davam etdirən Prezident İlham Əliyev də əfvetmə institutunun çevik və işlək mexanizmlər əsasında fəaliyyətini təmin etmişdir. Hər bir vətəndaşın Prezidenti olduğunu qısa müddətdə tam sübuta yetirmiş cənab İlham Əliyev hətta cinayət əməlinə yol vermiş insanların da taleyinə biganə deyildir: məhkum olunmuş bir sıra şəxslərin, onların ailə üzvlərinin, insan hüquqları üzrə müvəkkilin müraciətlərinə əsaslanan, məhkumların səhhətini, ailə vəziyyətini, bu müddətdə davranışlarını nəzərə alan, cəzadan azad etmənin tərbiyəvi əhəmiyyətini önə çəkən Prezident İlham Əliyev vaxtaşırı əfv sərəncamı imzalayır. Ölkə başçısı bu addımları ilə törətdiyi əməldən səmimi peşmançılıq hissi keçirən günahkar şəxslərin islah olunaraq düz yola qayıtmasına, onların cəzaçəkmə müəssisəsindən çıxdıqdan sonra layiqli vətəndaş kimi azad cəmiyyətə qovuşmasına, bir daha cinayət əməli törətməməsinə çalışır.

Prezident İlham Əliyev humanizm prinsiplərinə əsaslanarq ölkə Konstitusiyasının 109-cu maddəsinin 22-ci bəndini rəhbər tutaraq 26 dekabr 2011-ci il tarixli sərəncamı ilə növbəti əfv sərəncamı imzalamışdır. Əfv sərəncamı bütövlükdə 92 məhbusa şamil edilmişdir. Bu, Azərbaycanda insan hüquqlarının etibarlı təminatına və demokratikləşməyə xidmət edən strateji siyasi kursun layiqincə davam etdirildiyini göstərir. İmzalanan əfv fərmanlarının bir qayda olaraq mühüm tarixi günlər və dövlət bayramları ərəfəsinə təsadüf etməsi insanlara hədsiz sevinc bəxş etməklə yanaşı, onlara yüksək mənəvi dəyərlər aşılayır.

Ölkə başçısının əfv sərəncamının icra edildiyi 6, 10 və 15 saylı cəzaçəkmə müəssisələrində olduğumuz zaman da cəzalarının çəkilməmiş hissəsindən azad edilən şəxslər bundan sonra layiqli vətəndaş kimi cəmiyyətə qovuşaraq cinayət törətməyəcəklərini bildirdilər.

6 saylı cəzaçəkmə müəssisəsində əfv sərəncamı 7 nəfər məhkuma şamil edilmişdi. Lələyev Elşad Rafiq oğlu cəzasının çəkilməmiş hissəsindən azad edilməsini böyük sevinclə qarşılayıb. O bildirdi ki, ölkə rəhbərinin bu humanist addımı bütün məhkumlar tərəfindən də yüksək qiymətləndirilir: "Cəzaçəkmə müəssisəsində olduğum zaman hər gün azadlığa çıxmaq arzusu ilə yaşamışam. Bu sevinci mənə bəxş etdiyinə görə ailəm adından ölkə rəhbərinə dərin minnətdarlığımı bildirirəm. Dünya Azərbaycanlılarının Həmrəyliyi Günü və Yeni il ərəfəsində ailəmə bundan gözəl hədiyyə ola bilməz. Bundan sonra cəmiyyətə layiqli vətəndaş olacağıma var qüvvəmlə çalışacağam. Etdiyim səhvlərdən artıq nəticə çıxarmışam. Məni əfv etdiyinə görə ulu Tanrıdan dövlət başçısına və onun ailəsinə uzun ömür arzulayıram".

Həsənov Yalçın Rəşid oğlu da cəzaçəkmə müəssisəsindən azadlığa buraxlmasına hədsiz sevinirdi. Bizimlə söhbət zamanı bildirdi ki, azadlığa qovuşmaq böyük səadətdir: "Məhkumluq müddətində insan etdiyi səhvlər barədə xeyli düşünmək imkanında olur. Ancaq azadlığa çıxdıqdan sonra bir daha bu səhvləri təkrarlamamalıdır. Ailəsinə və yaxınlarına layiqli insan olmağa çalışmalıdır. Mən etdiyim əməllərdən dərin peşmançılıq keçirirəm. Bir daha bu səhvləri etməyəcəyəm. Dövlət başçısı böyük humanistlik göstərərək bizləri azadlığa qovuşdurub. Ölkə rəhbərinə dərin təşəkkürümü bildirirəm və Azərbaycanımızın inkişafı naminə gördüyü işlərdə ona uğurlar arzulayıram".

Novruzov Araz Xanlar oğlu da azadlığa buraxıldığına görə ölkə rəhbərinə minnətdarlığını bildirdi, azad cəmiyyətə qovuşaraq yalnız yaxşı işlərlə ailəsini sevindirəcəyini qeyd etdi. Arazın atası və anası cəzaçəkmə müəssisəsinin önündə idilər. Övladlarının azadlığa buraxılmasını dövlət başçısının humanist addımı kimi qiymətləndirdilər. Xanlar Novruzov bildirdi ki, ata üçün bundan böyük sevinc ola bilməz. Bağışlamaq qəlbin böyüklüyüdür. Biz ailəmiz adından böyük qəlb sahibi Prezident İlham Əliyevə minnətdarlığımızı bildirir və onun siyasətini dəstəkləyirik.

E.HACIALIYEV,

Azərbaycan.-2011.-28 dekabr.-S.6.