Gömrük Məcəlləsi Milli Məclisin müzakirəsinə təqdim olunmuşdur

Fevralın 3-də Milli Məclisin İqtisadi siyasət və Hüquq siyasəti və dövlət quruculuğu komitələrinin birgə iclası keçirilmişdir. AzərTAc xəbər verir ki, iclasda əvvəlcə "Azərbaycan Respublikasının Gömrük Məcəlləsinin layihəsi haqqında" qanun layihəsinə baxılmışdır. İqtisadi siyasət komitəsinin sədri akademik Ziyad Səmədzadə bildirmişdir ki, Azərbaycan Dünya Gömrük Təşkilatının üzvüdür. Dövlət büdcəsinin formalaşmasında Dövlət Gömrük Komitəsinin rolu böyükdür. Komitənin işinin, beynəlxalq əməkdaşlığının, eləcə də gömrük rüsumlarının yığımının hüquqi əsaslarının müəyyən edilməsi üçün möhkəm hüquqi baza olmalıdır. Bu Məcəllə Azərbaycanda gömrük işinin hüquqi, iqtisadi və təşkilati əsaslarını, o cümlədən ölkəmizin gömrük ərazisinə gətirilən, bu ərazidən aparılan, tranzit keçirilən mallara və nəqliyyat vasitələrinə tətbiq edilən ümumi qaydaları və prosedurları müəyyən edəcək, eləcə də şəxslərin gömrük işi sahəsində hüquq və öhdəliklərini nizamlayacaqdır.

Məcəllə 2 hissədən, 22 fəsildən və 396 maddədən ibarətdir. Sonra "Dövlət rüsumu haqqında", "Auditor xidməti haqqında" qanunlara və İnzibati Xətalar Məcəlləsinə təklif olunan əlavələr və dəyişikliklərə baxılmışdır. Bildirilmişdir ki, bu dəyişikliklər Azərbaycanın qanunvericilik bazasının möhkəmləndirilməsinə xidmət edir.

İclasda həmçinin "Azərbaycan Respublikası hökuməti və Özbəkistan Respublikası hökuməti arasında 2011-2015-ci illər üzrə iqtisadi əməkdaşlıq haqqında" Sazişin təsdiq edilməsi barədə" qanun layihəsi müzakirə olunmuşdur. Bildirilmişdir ki, bu sənəd hər iki ölkənin qarşılıqlı faydalı iqtisadi əlaqələrinin inkişafına, iqtisadiyyatın aparıcı sahələrinə məxsus müəssisələr arasında istehsal əməkdaşlığının genişlənməsinə təkan verəcəkdir. Müzakirələrdən sonra qanun layihələri təsdiqlənmək üçün Milli Məclisin iclasına tövsiyə olunmuşdur.

Azərbaycan.- 2011.-4 fevral.- S.2.