Azərbaycanın xarici işlər naziri Münxen konfransında iştirak edir

Fevralın 4-də Münxendə təhlükəsizlik siyasətinə dair növbəti üçgünlük konfrans işə başlayır. Konfransda Azərbaycanın xarici işlər naziri Elmar Məmmədyarov iştirak edir.

Münxen konfransı 1962-ci ildən etibarən siyasi xadimlərin, yüksək vəzifəli diplomatların, hərbçilərin və beynəlxalq təhlükəsizlik sahəsində ekspertlərin hər il keçirilən görüş yeridir. Dünyanın ən mühüm qeyri-formal forumlarından biri sayılan Münxen konfransında beynəlxalq münasibətlərdə qüvvələr tarazlığına dair aktual siyasi problemlər, beynəlxalq hüquq və demokratik dünya nizamı sisteminin möhkəmləndirilməsi məsələləri müzakirə olunur. Hər il Münxendə 350-dən çox konfrans iştirakçısı təhlükəsizlik siyasəti ilə bağlı fikir mübadiləsi aparır, aktual beynəlxalq problemlərə dair baxışlarını uzlaşdırır. Forumda konkret qərarlar, işin yekunlarına dair hətta birgə rəsmi məlumat qəbul olunmasa da, Münxen konfransı fəaliyyət göstərdiyi illərdə aktual siyasi-iqtisadi problemləri həll edən əhəmiyyətli beynəlxalq foruma çevrilmişdir. Ekspertlərin fikrincə, təhlükəsizlik məsələləri üzrə Münxen konfransı beynəlxalq siyasət üçün ümumdünya Davos forumunun iqtisadiyyat üçün daşıdığı əhəmiyyəti daşıyır. Məhz buna görə onu bəzən Münxen Davosu adlandırırlar.

Vüqar SEYİDOV,

AzərTAc-ın xüsusi müxbiri

Münxen

Azərbaycan.- 2011.-5 fevral.- S. 2.