Seminarda narkotiklərə qarşı mübarizə məsələləri müzakirə olunmuşdur

Bakıda Narkotiklərə Qarşı Milli Təbliğat İctimai Birliyi (NQMT İB) Mini Dublin Qrupu (MDQ) ilə birgə seminar keçirmişdir. Seminarda bu il Brüsseldə keçiriləcək illik iclasda müzakirə olunacaq məsələlərə baxılması, ölkəmizdə 2010-cu ildə istər hüquq-mühafizə orqanları, istərsə də digər əlaqədar qurumlar tərəfindən aparılan işlər nəzərdən keçirilmişdir.

NQMT İB-nin sədri Məzahir Əfəndiyev MDQ haqqında qısa məlumat vermiş və qeyd etmişdir ki, qrupun məqsədi Avropa ölkələrinə, habelə inkişafda olan və Avropaya inteqrasiya edən ölkələrə müxtəlif layihələr, tövsiyələrlə kömək göstərməkdir. Məlumat vermişdir ki, BMT-nin hesablamalarına görə, bu gün dünyada təqribən 250 milyona yaxın insan narkotiklərdən əziyyət çəkir. Bu, 15-64 yaş üzrə dünya əhalisinin təqribən 5 faizini təşkil edir. Azərbaycanda da bu problem mövcuddur. Ölkəmiz artıq 20 ilə yaxındır ki, beynəlxalq ictimaiyyət, aparıcı dünya dövlətləri ilə problemin birgə həlli yolunda ardıcıl və məqsədyönlü işlər həyata keçirir. Hökumətin bu sahədə apardığı siyasətə metodoloji baxımdan yaxından kömək göstərən Narkotiklərə Qarşı Milli Təbliğat İctimai Birliyi ölkəmizdə akkreditə olunmuş səfirliklər və beynəlxalq təşkilatlarla sıx əməkdaşlıq edir. Rumıniyanın Azərbaycandakı səfirinin səlahiyyətlərini yerinə yetirən Liviu Adrean MDQ-nun ölkəmizdə fəaliyyətinə dair tədbir iştirakçılarına qısa məlumat vermiş və bildirmişdir ki, hazırda quruma Rumıniya Respublikası rəhbərlik edir. Buna görə də onun Azərbaycandakı fəaliyyətinə Rumıniyanın ölkəmizdəki səfirliyi nəzarət edir.

Sonra Daxili İşlər Nazirliyi Baş Narkotiklərlə Mübarizə İdarəsi rəisinin müavini Adil Ələkbərov tədbirdə 2010-cu ildə Azərbaycanda narkotiklərlə bağlı ümumi vəziyyətə dair məlumat vermişdir.

Səhiyyə Nazirliyinin Respublika Narkoloji Dispanserinin baş həkimi Könül Vəliyevanın dövlət müəssisələrində müalicə, HİV-lə bağlı statistik məlumatları, narkomaniyanın yayılmasına dair qabaqlayıcı tədbirlər haqqında təqdimatı dinlənilmişdir.

Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının üzvləri, Milli Məclisin deputatları, Azərbaycanda fəaliyyət göstərən diplomatik korpusun və QHT-lərin nümayəndələri mövzu ilə bağlı təkliflər vermişlər.

AzərTAc

Azərbaycan.- 2011.-5 fevral.- S. 2.