Xəzərin layla
çaldığı kənd
Sabunçu rayonunun mərkəzindən 16 kilometr şimalda yerləşən bu kənd həm də Abşeronun qədim yaşayış məskəni hesab olunur. Nardaran sözünün mənşəyi ilə bağlı müxtəlif fikirlər var. Ərəb dilində "Nar" sözü "od", "atəş", "dar" isə "böyük ev", "yer", "məkan" mənalarında işlədilir. "Nardaran" toponimi "narlıq", yəni "nar əkilən yer" kimi və ya "nər", yaxud "çoxlu dəvə saxlanan yer" mənasında da izah edilir. Nardaran kəndi ərazisinə görə bir neçə məhəlləyə bölünür. Bunlara aşagıdakılar daxildir: 1. Ağa məhəlləsi (Şeyx Məhəmməd Əmin məhəlləsi). 2. Qum məhəlləsi. 3. Qənbər məhəlləsi. 4. Paçan (yəni, piyada gəzilən yer). 5. Marağazi (yəni, ilan mələyən yer). 6. Qalagah (dəniz qırağına yaxın yer). 7. Qədəmgah (Nardaran qalasından aşağı yer). 7. Ərəri (dənizlə əhatə olan ərazi).
XIX əsrdə Abşeronda baş verən təbii fəlakət nəticəsində Maştağa və Nardaran kəndlərindəki təsərrüfata ziyan dəyir, xeyli sakin həlak olub. Bütünlüklə kəndin ətrafı isə quma qərq olub. Bu zaman kənddə insanların həyatı üçün təhlükəli vəziyyət yaranıb. Fəlakətdən təşvişə düşən kənd ağsaqqallarının bir qrupu yaranan vəziyyətlə əlaqədar Bakıdakı rus komendantlığına, sonra isə Qafqaz canişinliyinin mərkəzi olan Tiflis quberniyasına məlumat verib. Ehtimal edilir ki, XIX əsrin 80-ci illərində rus qubernatorluğunun əmri ilə indiki Binə ərazisi nardaranlılar üçün əkin yeri təyin edilir. Əhali yeni salınan ərazidə əkinçilik və bağçılıqla məşğul olur, həyətlərdə əncir, üzüm, qara tut yetişdirməyə başlayır.
Nardaran kəndi münbit torpaq
sahəsinə malikdir. Hələ 700 il əvvəl
Abşeronun Nardaran kəndində zeytun əkilməsinə
başlanılır. Bu yerlərin sakinlərinin fikrincə,
yalnız Bakının Nardaran kəndində yağlı və
tərkibi minerallarla çox olan zeytun bitkisinə rast gəlinir.
Abşeronda zəfəranın vətəni Nardaran hesab olunur,
desək yəqin ki, yanılmarıq. Abşeronun
qızıldan qiymətli bitkisi olan zəfəran hələ
ötən illərdən etibarən Nardaran torpağında
böyük zəhmət hesabına yetişdirilib.
Nardaranın cənub hissəsində "Kuladuzu", yəni
"şoran duz" adlı ərazidə nardaranlılar bir
vaxtlar zəfəran əkərdi. Böyük Vətən
müharibəsindən sonrakı illərdə, yəni
1958-60-cı illərdə dövlət tərəfindən bu
bitkinin becərilməsinə çox diqqət yetirilərdi.
Kənddə ta qədimdən
kişilər daşyonma və bənnalıq, qadınlar isə
toxuculuq və xalçaçılıqla məşğul
olub. II Dünya müharibəsi başlanarkən sənətkarlığın
bu sahələrinə diqqət azalıb. Kəndin kişiləri
cəbhəyə yollanıb. Qadınların ev, məişət
qayğıları ilə birgə ağır yeraltı
işlərdə çalışması onlar
üçün dözülməz həddə
çatıb. Nardaranda yaşayan Əkbər adlı şəxs
qadınların çətin vəziyyətini gördükdən
sonra kənddə toxuculuq sexi açmağa nail olub. Ətraf
kəndlərdən - Bilgəhdən, Maştağadan,
Kürdəxanıdan, Zabratdan gələn qadınlar da bu sexdə
xalça-palaz, kilim toxuyardılar. Qeyd edim ki, o illərdə
nardaranlı xanımların toxuduqları xalılar mahir
ustalıqla seçilərdi. Qız-gəlinlərin zərif əllərinin
hərarəti çeşid-çeşid toxunan xalılarda
öz əksini tapardı. Ötən əsrin 50-ci illərində
böyük ölçüdə Nardaran xalçası
toxunmuşdu. Sonradan həmin xalça keçmiş Lenin
adına muzeyə hədiyyə edilib. Nardaran kəndində
xalçaçılıq sexi indi də fəaliyyət
göstərir.
Nardaran həm də qədim
abidələri ilə məşhurdu. Bu abidələrdən
biri Xan hamamı adlanır. 1388-ci ildə memar Kəstasif Musa
oğlu tərəfindən inşa edilib. Kənddə XIX əsrə
aid edilən hamamların üzərində Şərq
memarlığına məxsus günbəz tikilib. Səfəvilər
dövlətinin hakimiyyəti dövründə indiki Cümə
məscidinin qərbində Hacı Abbas hamamı tikilib. Təəssüf
ki, həmin hamam laqeydlik nəticəsində sonradan
söküntüyə məruz qalıb. Vaxtilə Nardaran
pirinin ətrafında hamam olsa da, bu tikili də sonradan
dağıdılıb. Yalnız 1920-ci ildə arxeoloqlar tərəfindən
köhnə hamamın ərəb dilindəki daş kitabəsi
aşkar edilib. Ərəb dilində olan həmin daş kitabədə
yazılıb: "Bu pak və təmiz imarətin tikilməsinə
sədr əl-möhtəşəm Xacə Zeynəddin ibn mərhum
Domğanlı Mövlanə Şəhabəddin - Allah ona rəhmət
eləsin-əmr etdi" (miladi tarix 1388-ci il). Güman etmək
olar ki, Nardarana qədəm qoyan zəvvarlar vaxtilə elə
bu hamamdan da istifadə ediblər.
Kəndin tarixi abidələrindən
biri də Hacı Baxış (el arasında Həci
Baxşı adlanır) məscidi hesab olunub. Hacı
Baxış məscidi 1663-cü ildə memar Murad Əlinin rəhbərliyi
altında inşa edilib. Bu məscid eyni ilə Şirvanşah
saray kompleksinə oxşayır. 1868-69-cu illərdə isə
Hacı Baxış məscidi Kərbəlayi Məmmədqulu
tərəfindən bərpa edilib. Burada giriş
baştağdan ibarət olmaqla, dörd sütunla əhatələnib.
Məscidin digər otaqları isə tağvari tavanla birləşib.
Tavan 4 pəncərə ilə əhatələnib. Burada
canamaz qoymaq üçün 2 kiçik oyuq da vardır. Məsciddə
hücrələri xatırladan künc hissədəki
kiçik pəncərələr isə otağı
işıqlandırmaq məqsədilə nəzərdə
tutulub. Məscid şəbəkəli 6 pəncərə ilə
də əhatələnib. Buradakı 2 kiçik oyuq şam
yandırmaq və ya canamaz qoymaq üçün istifadə
olunub. Ehtimal etmək olar ki, nə vaxtsa məscid tikintisi
yarımçıq qaldığından həmin tikili də
günbəzlə örtülməmişdi. Ağa məscidi
isə miladi tarıxlə 1675-ci ildə düzbucaqlı
formada inşa edilib. 4 sütunla əhatələnən məscidin
döşəmədən tavana qədər
hündürlüyü 6, günbəzədək isə 9
metrə çatır.
Repressiya illərində
Ağa məscidindən kolxoz anbarı kimi istifadə edilib.
1987-ci ildə Ağa məscidi yerli sakinlər tərəfindən
bərpa olunub. Qənbər məhəlləsində yerləşən
Qulaməli məscidi hicri tarixlə 1310-cu ildə inşa
edilib. Sovet dövründə məsciddən uşaq
bağçası, anbar kimi istifadə olunub. Qulaməli məscidi
1988-ci ildə yerli sakinlər tərəfindən bərpa
edilib. Ağa məhəlləsində yonulmuş sal daşdan
tikilən Cümə məscidi də yerləşir. Bu məscid
1837-ci ildə inşa edilib. 1937-ci ildə Cümə məscidinin
qapısı bağlanmış, kolxoz anbarına
çevrilmişdi. 1996-cı ildə bu məscid bərpa
olunaraq dindarların ixtiyarına verilmişdir.
1660-1661-ci illərdə tikilən
Nardaran karvansarası ölkə əhəmiyyətli
tarıxi abidə hesab olunur. Yüksək təpədə
yerləşən Nardaran qalası dairəvi qüllədən,
dördguşəli qala divarlarından ibarətdir. Tikilidə
inşa edilən qüllənin hündürlüyü 12
metrdir. Qalanın üzərindəki kitabədə ərəbcə
yazılıb: "Mahmud ibn Sədin əməlidir". Yəqin
ki, qalanı tikən memarın adıdı. Həmin
memarın isminə İçərişəhərdəki və
Bibiheybətdəki məscidlərin də daş kitabələrində
rast gəlinib. Qalanın ətrafında müdafiə
istehkamları da vardır. Müdafiə tikilisinin ətrafının
4 tərəfində ocaq qalamaq üçün kiçik
oyuqlara da rast gəlinir. Qəribəsi odur ki, burada müdafiə
üçün qurulan istehkamlarının sayı 99-a
çatır. Hazırda arxeoloqlarımız tərəfindən
Nardaran qalasında böyük qazıntı işlərinin
aparılmasına ehtiyac var.
Abşeronun Nardaran kəndində
yerləşən Şirvanşah hökmdarlarının yay
iqamətgahı XV əsrin əvvəlinə aid edilən
saray mülkinə daxildir. Vaxtı ilə Xan
bağının böyük sahəsində meyvə
ağacları, yaşıllıqlar salınmışdı.
Nardaranın mülayim iqlimi, dəniz sahilində yerləşməsi
Xan bağını füsunkar etmişdi. İsti yay günlərində
Şirvanşah hökmdarının ailəsi də Xan
bağına istirahət etmək məqsədilə gələrdi.
Tarixçilər Xan bağının inşa edilməsini
XV-XVI əsrə aid edir. Xan bağı əsas binadan, bir
neçə köməkçi tikilidən, hovuz və su
quyusundan ibarətdir. Kvadrat formaya malik olan tikilinin künc hissəsində
isə kiçik otaqlar yerləşir. Həmin kiçik otaqların
üzəri isə günbəzlə örtülüb.
Ötən əsrlərdə bağda divanxananın,
hamamın mövcudluğunu, Xan bağındakı tikilinin ətrafına
səpələnən daşlar da sübut edir. Xan
bağı 3 nəfəslik, 4 böyük sütun ilə əhatə
olunub. Burada 4 hücrənin tən ortasında isə su hovuzu yerləşir.
Yerli sakinlərin bu hovuza daxil olan suyun mənbəyinin haradan gəldiyi
haqqında məlumatı isə yoxdur. Deyilənə görə,
vaxtı ilə Xan bağından yeraltı yollarla Nardaran
qalasına getmək olardı. Qalanı bağla birləşdirən
yol güman etmək olar ki, düşmən hücumundan
qorunmaq məqsədilə salınmışdı. Cənnət
məkanı xatırladan bağ mavi dənizlə də əhatə
olunub. Dənizin sahili isə qədim Tunc dövrünə (yəni,
eradan əvvəl IV minilliyin sonu, III minilliyin əvvəllərinə)
aid edilən Ümidqayasına daha yaxındır.
Yaşayış üçün inşa edilən bina 2 mərtəbəli
mülk formasındadı.
Xan bağı haqqında
tarixçi alim İ.P.Şeblıkin 1943-cü ildə
yazıb: "Binanın mərkəzi hissəsindəki
günbəz tağvari örtülüb. Xaricdən diqqət
edərkən günbəz Şirvanşahlar sarayının məscidinin
günbəzinə oxşayır. Divarlara baxarkən
buradakı qazılmış oyuq yerlərini, binanın təməl
yerini görmək olar".
Nardaran kəndindəki 4 qədim
qəbiristanlıq kəndin tarixindən xəbər verir. Nardaranlıların
"Qədəmgah" adlandırdığı ərazi
tarixi keçmişə malikdir. Vaxtı ilə sakinlərin
suya olan tələbatını nəzərə alan
uzaqgörən insanlar burada 3 su ovdanı qazdırıb. Bu
ovdanlar onların sahibi olan Kəblə Ələsgərin,
Şeyx Məhəmmədin və Əmin Ağanın
adları ilə də kənddə tanınır. Ərazidəki
Kəblə Ələsgər ovdanı böyük olsa da,
Şeyx Məhəmməd və Əmin Ağa ovdanları isə
nisbətən kiçikliyi ilə seçilir. Yayın
qızmar çağında bu ovdanların suyundan içməklə
sərinlik tapmaq olar. Ötən əsrlərdən
başlayaraq Nardaran pirinə, yəni burada dəfn olunan Rəhimə
xanımın ocağına gələn zəvvarlar
ovdanların yanında ayaq saxlayar, dincələrdilər.
Nardaran kəndində VII imam Museyi Kazımın qızı Rəhimə xanımın dəfn olunduğu müqəddəs pir yerləşir. Mənbələrin məlumatına görə, Məhəmməd (s.ə.s) Peyğəmbərin ölümündən sonra ailəsinə təzyiqlər başlanarkən, bu pak ailədən olan İmam Rza Xorasan şəhərinə, bacısı Hökümə xanım Bakıdakı Bibiheybət ərazisinə, Museyi Kazımın digər qızı Rəhimə xanım isə Nardaran kəndinə pənah gətirib. Bakının Nardaran kəndinə imam ailəsindən olan Rəhimə xanım da ailəsi ilə birgə gəlmişdir. Rəhimə xanım vəfat etdikdən sonra Nardaranın yerli sakinləri müqəddəs xanımı böyük ehtiramla dəfn edib, məzarını isə ocaq-pir kimi qoruyub. Sonradan təbii fəlakət nəticəsində həmin müqəddəs pir torpağın altında qalıb. Ehtimal edilir ki, XIII-XIV əsrlərdə Xəzər dənizinin suyu çəkilərkən kəndin şimalında boşluq yarandığından, şimaldan gələn küləklər ərazini quma qərq etmişdir. Sonradan kənd sakinləri qazıntı işləri apararkən, dəniz kənarında qumların altından müqəddəs piri aşkar ediblər. Memarlıq baxımından tarixçilər aşkar olunan həmin türbəni XII-XIII əsrlərə aid edib. Vaxtı ilə Şirvanşahlar dövlətində üçüncü şəxs hesab olunan böyük sədr Xacə Hacı Həmzə ibn Qutlu Mahmud məscidin inşasına yardım etmişdir. Burada dəfn olunan qəbirin başdaşında Şeyx Sədi, Şeyx Xoda Pulad adlarına da rast gəlinir. Məscid düzbucaqlı formada tikilsə də, türbə tağvari tavanla əhatə olunub.
Təranə CƏBİYEVA,
Tarixçi
Azərbaycan.- 2011.-9 fevral.- S. 7.