Bakıda "Strukturlaşan dialoq" mövzusunda seminar keçirilir

AzərTAc xəbər verir ki, fevralın 9-da Bakıda Avropa İttifaqının (Aİ) təşkilatçılığı ilə "Strukturlaşan dialoq" mövzusunda seminar başlanmışdır.

Üç gün davam edəcək seminarın məqsədi Avropa İttifaqının "Şərq tərəfdaşlığı" proqramı çərçivəsində tərəfdaş ölkələrdə vətəndaş cəmiyyətinin inkişafına yardım etmək, QHT-lərlə hökumət strukturları arasında konstruktiv əməkdaşlığı genişləndirməkdir.

Azərbaycan Prezidenti Administrasiyasının ictimai-siyasi məsələlər şöbəsinin müdiri Əli Həsənov çıxışında müstəqillik illərində Azərbaycanda demokratiyanın inkişafından, ölkəmizdə vətəndaş cəmiyyətinin formalaşması prosesindən, hökumət və dövlət qurumları ilə əməkdaşlıqdan və digər məsələlərdən danışmışdır. O demişdir ki, son illərdə Azərbaycan Respublikası mötəbər idman yarışları, siyasi və mədəniyyətlərarası dialoq, beynəlxalq ictimaiyyəti, qlobal dünyanı maraqlandıran məsələlərlə bağlı çoxsaylı tədbirlərə ev sahibliyi edir. İndiki seminar da bu qəbildən olan tədbirlərdən biridir. Seminarda Avropa İttifaqından, qitəni təmsil edən müxtəlif nüfuzlu strukturlardan, Aİ ilə qonşuluq siyasəti və digər proqramlar çərçivəsində əməkdaşlıq edən 17 ölkədən 130-dək nümayəndə iştirak edir. Seminarda dünyada müxtəlif strukturlar arasında dialoqun mövcud vəziyyəti, problemlər və perspektivləri ilə bağlı məsələlər müzakirə olunacaqdır. Müstəqilliyini bərpa etdikdən sonra Azərbaycanda hüquqi dövlət, vətəndaş cəmiyyəti quruculuğu, QHT-lərlə dövlət qurumları arasında münasibətlər sahəsində mühüm işlər görülmüşdür.

Ə.Həsənov vurğulamışdır ki, əgər dövlətin vətəndaşları sərbəst şəkildə seçib-seçilmək hüququ qazanırsa, onların hakimiyyət strukturlarını seçkilər və alternativlik əsasında formalaşdırmaq imkanı varsa, bu, artıq demokratiyanın ilkin nümunələridir. Amma insan hüquqları təkcə demokratiyadan, hüquqi normalardan asılı deyildir. İnsan hüquqlarının tam qorunması üçün həm hər bir ölkənin milli şəraiti, həm də regional, habelə beynəlxalq şərait imkan yaratmalıdır. Azərbaycan hələ müstəqilliyini bərpa etməzdən əvvəl qonşu Ermənistanın hərbi təcavüzünə məruz qalmışdır. Azərbaycan torpaqlarının 20 faizi işğal olunmuş və 1 milyon azərbaycanlı doğma yurdlarından didərgin salınmışdır.

Ona görə də Azərbaycan dövləti nə qədər təkmil olsa, onun hüquq təminat sistemi nə qədər mükəmməl işləsə belə, adi insan hüquqlarından məhrum olmuş 1 milyon qaçqın-köçkünün normal insan hüquqlarını təmin etmək gücündə deyildir. Biz hesab edirik ki, insan hüquqlarının təkmilləşməsi, strukturlaşmış təminatı təkcə milli dövlətlərdən deyil, bütövlükdə dünyada mövcud olan hüquqi şəraitdən, beynəlxalq hüququn normalarının təsbit olunması və reallaşmasına nəzarət edən BMT-nin fəaliyyətindən asılıdır. Biz faktik olaraq Azərbaycanda beynəlxalq hüququn normalarına riayəti təmin etməli olan ATƏT-dən, NATO-dan və onların Cənubi Qafqazla bağlı yürütdüyü siyasətdən tam razı deyilik. Ona görə ki, bu təşkilatlar dövlətlərarası münaqişələrin həllinə, xüsusən də, kütləvi şəkildə insanların hüquqlarının pozulmasına qarşı yönəlmiş təcrübənin təkmilləşməsində müəyyən qətiyyətsizlik göstərirlər. Ancaq onu da deməliyik ki, müasir dünyada Avropa İttifaqı, ATƏT, BMT, NATO və digər qurumlar olmasaydı, münaqişələrin sayı daha çox olar, insan hüquqlarının pozulması halları daha çox müşahidə edilər və insanlar daha çox əziyyət çəkərdilər. İnanırıq ki, bu seminarda insan hüquqlarının yerli, regional və beynəlxalq şəraiti və hər bir müstəvidə onun strukturlaşmış təsisatlarının yaranması, fəaliyyəti və digər məsələlər müzakirə olunacaqdır.

Prezident Administrasiyasının şöbə müdiri Avropa İttifaqının son vaxtlar dünya siyasətində, beynəlxalq münasibətlərdə mühüm təsisata çevrildiyini xüsusi vurğulamış, təşkilatın belə bir tədbiri təşkil etməsini yüksək qiymətləndirmişdir. O, bir daha demişdir ki, biz çox istərdik seminarda mövcud problemlərimiz, xüsusən də, 1 milyondan çox azərbaycanlının adi insan hüquqlarından məhrum olması və 20 ilə yaxın bir müddətdə qaçqın-köçkün həyatı yaşaması müzakirə edilsin. Çünki qloballaşan dünyada 1 milyon insanı bütün beynəlxalq təşkilatların səyi, gücü ilə doğma yurdlarına qaytara bilmiriksə, onda insan hüquqları sahəsində böyük uğurlar qazanmağımızdan söhbət gedə bilməz.

Sonra çıxış edən Avropa İttifaqının Bakıdakı nümayəndəliyinin rəhbəri R.Kobia seminarın yüksək səviyyədə təşkilinə görə iştirakçılar adından Azərbaycan dövlətinin başçısına minnətdarlıq etmişdir. O demişdir ki, tədbirin Bakıda keçirilməsi Azərbaycanın vətəndaş cəmiyyətinin, demokratiyanın inkişafına, insan hüquq və azadlıqlarının qorunmasına verdiyi yüksək qiymətin göstəricisidir. Gənc dövlət olan Azərbaycan son illər ərzində bütün sahələrdə çox böyük uğurlar qazanmışdır. Qlobal maliyyə böhranına baxmayaraq, ötən iki ildə Azərbaycan iqtisadiyyatı inkişafdan qalmamışdır. Bunun özü vətəndaş cəmiyyətinin, demokratiyanın inkişafına, QHT-lərin formalaşmasına müsbət təsir göstərən əsas amildir. Avropa İttifaqı da Azərbaycanla əməkdaşlığa xüsusi önəm verir. Avropa Komissiyasının sədri Xose Manuel Barrozunun bu yaxınlarda Azərbaycana səfəri buna parlaq misal ola bilər. R.Kobia demişdir ki, biz qeyri-hökumət təşkilatları ilə birlikdə layihələri gerçəkləşdiririk. QHT-lərin layihələrinin maliyyələşdirilməsi üçün Aİ 10 milyon avro yardım ayırmışdır. Aİ qaçqın və məcburi köçkün problemini də yaxşı başa düşür. İmkanlarımız daxilində bu problemin həllinə çalışırıq. Vətəndaş cəmiyyəti təsisatlarını, QHT-ləri bu işə fəal qoşmaq niyyətindəyik və düşünürük ki, müəyyən uğur qazana biləcəyik.

Sonra Avropa Parlamentinin deputatı Ayvo Aajle, Macarıstan nümayəndəsi xanım Liva Makey və başqaları çıxış etmiş, nəzərdə tutulmuş layihələrdən, gələcək əməkdaşlığın perspektivlərindən danışmışlar.

Çıxış edənlər Azərbaycanda müşahidə etdikləri inkişafı yüksək qiymətləndirmişlər. Dinamik inkişaf edən Avropa ölkəsi kimi Azərbaycanın bu tədbirdə iştirak edən ölkələr üçün nümunə olacağı xüsusi vurğulanmışdır. Eyni zamanda, seminarda bütövlükdə insan hüquqlarının təminatı, regionda, dünyada və milli səviyyədə ayrı-ayrı kateqoriyadan olan insanların həyat və şəraitinin təmin olunması və digər məsələlərə də toxunulmuşdur.

Seminar fevralın 12-dək davam edəcəkdir.

Azərbaycan.- 2011.-10 fevral.- S. 5.