Azərbaycan Beynəlxalq Bankı
- Moskva Rusiyanın bank sektorunda öz mövqelərini möhkəmlədir
Bir sıra ölkələrin bank sahələrini də əhatə etmiş dünya iqtisadi böhranının neqativ nəticələrinə baxmayaraq, Azərbaycan Beynəlxalq Bankı - Moskva 2010-cu ili müsbət nəticələrlə başa vurmuş və hətta Rusiyanın davamlı bankı sertifikatına sahib olmuşdur. 100 faiz Azərbaycan kapitalına əsaslanan ABB-Moskva hazırda Rusiyanın 150 ən iri bankından biridir.
ABB-Moskvanın İdarə Heyətinin sədri Fuad Abdullayev 2010-cu ilin yekunlarına həsr edilmiş mətbuat konfransında bildirmişdir ki, keçən il bu bank üçün əsas maliyyə göstəricilərinin hamısının yaxşılaşması və uğurlu inkişaf dövrü olmuşdur. Onun sözlərinə görə, 2011-ci il yanvarın 1-də bankın aktivləri 2010-cu il yanvarın 1-nə olan vəziyyətlə müqayisədə 23 faiz artaraq 17.766 milyon rubla çatmış, bankın xüsusi kapitalı isə 27,6 faiz artaraq 1.567 milyon rubla bərabər olmuşdur. İl ərzində bankın mənfəəti 146,6 faiz artaraq 95,4 milyon rubl olmuşdur.
Bankın rəhbəri bildirmişdir ki, 2010-cu il noyabrın 1-i üçün olan məlumata görə, ABB-Moskva RBK reytinqində xalis aktivlərin həcminə görə 143-cü, kredit portfelinə görə 128-ci, hüquqi şəxslərə verilmiş kreditlərə görə 111-ci yeri tutmuşdur. 2010-cu ildə müştərilərin hesablarındakı pul vəsaitlərinin qalıqları dinamik şəkildə artaraq 5.090 milyon rubla çatmışdır. Fiziki şəxslərin hesablarındakı vəsaitlər il ərzində 95,7 faiz artaraq 2.168 milyon rubla, hüquqi şəxslərin hesablarındakı vəsaitlər isə 6,5 faiz artaraq 2.921 milyon rubla çatmışdır.
F.Abdullayev xüsusi vurğulamışdır ki, il ərzində bankın kredit portfeli 20,1 faiz artaraq 11.129 milyon rubla, hüquqi şəxslərə verilmiş kreditlərin həcmi 11,1 faiz artaraq 9.445 milyon rubla çatmışdır.
Mətbuat konfransında
bildirilmişdir ki, ABB-Moskva banklararası kredit bazarında fəal
operatordur. 2010-cu ildə banklararası bazarda cəlb edilmiş
vəsaitlərin həcmi 36,1 faiz artaraq 11.445 milyon rubla bərabər
olmuşdur. Keçən il 15 milyon dollar məbləğində
maliyyələşdirmə cəlb edilməsi
üçün klub əqdi bağlanmışdır. Bu əqdin
iştirakçıları Raiffeisen Zentral Bank Osterreich AG,
Rayffayzenbank QSC, OTP Bank Plc, "OTP Bank" ASC olmuşdur.
Bankın İdarə Heyətinin
sədri Fuad Abdullayev daha sonra demişdir ki, keçən il
106 milyon dollar məbləğində 115.000 pul köçürməsi
əməliyyatı aparılmışdır. Bu əməliyyatlar
əsasən Rusiya ilə Azərbaycan arasında həyata
keçirilmişdir. Visa və MasterCard sistemlərinə aid
bank kartlarının emissiyası 26.000 vahidə
çatmışdır. 2011-ci il yanvarın 1-nə olan məlumata
görə ABB-Moskva bank kartlarına xidmət etmək
üçün 169 POS-terminal və 39 bankomat
quraşdırmışdır.
Bankın rəhbərinin
fikrincə, keçən ilin mühüm hadisələrindən
biri də bu strukturun Federal Gömrük Xidməti tərəfindən
gömrük tədiyələrinin ödənilməsinə
bank zəmanəti vermək hüququna malik olan bankların və
digər kredit təşkilatlarının reyestrinə daxil
edilməsi olmuşdur.
1 yanvar 2011-ci il üçün olan məlumata görə, ABB-Moskva Bankının satış şəbəkəsinə Sankt-Peterburq və Yekaterinburq şəhərlərindəki iki filial və əlavə ofislər şəbəkəsi, habelə bankın Moskvadakı 8 bölməsi daxildir. 2010-cu ildə bankın Sankt-Peterburqdakı və Yekaterinburqdakı filialları bazasında əlavə ofislər açılmışdır. Bankın xidmət məntəqələrinin ümumi sayı 14-ə çatmışdır. Gələcəkdə potensial müştərilərin cəmləşdiyi yerlərdə, ilk növbədə, Moskva regionunda bu cür xidmət məntəqələrinin sayını daha da artırmaq nəzərdə tutulur.
Yeri gəlmişkən xatırladaq ki, ABB-Moskva RF ərazisində fəaliyyət göstərən bir sıra nüfuzlu peşəkar və ictimai təşkilatların tamhüquqlu və fəal üzvü, Moskva Hökumətinin müvəkkil bankıdır. ABB-Moskva Azərbaycan-Rusiya Hökumətlərarası Komissiyanın fəaliyyətində yaxından iştirak edir. O, Rusiyanın bir sıra iri şirkətlərinin və korporasiyalarının tərəfdaşıdır.
Asya HACIZADƏ,
AzərTAc-ın xüsusi müxbiri
Moskva
Azərbaycan.- 2011.-16 fevral.- S. 2.