Mübarizliyin zəfər, şəhidliyin şərəf yolu

Deyirlər ki, xoşbəxtlik xəfif meh kimi gəlir. Gəlişi o qədər zərif olur ki, hiss edilmir. Bədbəxtlik isə tufanı xatırladır - dağıda-dağıda, yıxıb uçura-uçura gəlir.

Zəfər və şərəf yolu keçmiş xalqımızın tarixində və taleyində xoşbəxtliklə bədbəxtlik bir-birini əvəzləyib. Xoşbəxtliyə qovuşduğumuz günlər, bədbəxtliyin ağrı-acısını yaşadığımız zamanlar az olmayıb! Faciələrin ağrı-acısı göz yaşları içərisində, zəfər və qələbə isə sevinclə yaşanıb. Ruhu və cismi ilə torpaqdan qidalanan, boy verib boylanan ulularımızın Dədə Qorqud timsallı nəsihətləri gələcək nəsillərin şərəf və ləyaqət yolunu açıb...

Bakı şəhəri Nəsimi rayonu Azərbaycanın Milli Qəhrəmanı Tahir Həsənov adına 23 saylı orta məktəbin şagirdləri tərəfindən hazırlanmış (Xocalı faciəsinin növbəti, 19-cu ildönümü ilə əlaqədar) ədəbi-bədii kompozisiyanın mahiyyəti də məhz mübarizliyin zəfər, şəhidliyin şərəfli yol olmasını bir daha tamaşaçılara çatdırmaq idi.

Məktəbin direktoru İradə Rəhimli tədbirdən öncə Azərbaycanın Milli Qəhrəmanı Tahir Həsənovun adını daşıyan təhsil ocağının keçdiyi şərəfli yola nəzər salaraq pedaqoji kollektivin Vətən üçün layiqli övladlar yetirməsindən söz açdı:

- Qəhrəmanlığın yeni bir ünvanını tanıdan, 23 illik ömür yolu keçmiş Tahir Həsənov da Mübariz İbrahimov kimi torpaqlarımızın azadlığı və bütövlüyü, müstəqilliyimizin daimi və əbədiliyi uğrunda şəhid olub! Məktəbimiz adını daşıdığı qəhrəman Tahir və Mübariz sanki bir ömür yaşayıblar - hər ikisi də torpaq uğrunda şəhid olmağın şərəfini göstərməklə yanaşı, düşmənə necə layiqli cavab verməyin yolunu gənc nəslə öyrədiblər. Tahir Həsənovun adı 1992-ci ildə gəmiyə, 1993-cü ildən isə məktəbimizə verilib. Qətiyyətlə deyərdim ki, məktəbimiz Milli Qəhrəmanın adını şərəflə daşıyır. Azərbaycanın Milli Qəhrəmanı Mübariz İbrahimovun oxuduğu Biləsuvar rayonunun Əliabad kənd orta məktəbi ilə kollektivimizi birləşdirən, əməkdaşlıq və dostluq səviyyəsinə qaldıran da məhz hər iki vətən övladının bir amal uğrunda mübarizə apararaq şəhidlik zirvəsinə yüksəlməsi, Azərbaycanın Milli Qəhrəmanı fəxri adına layiq görülməsidir.

Mübariz İbrahimovun oxuduğu məktəbin müəllim və şagird kollektivinin adıçəkilən tədbirə qatılması da yuxarıda söylənilən fikirlərin təsdiqi idi. Milli qəhrəmanların müəllimləri xalqımızın tarixən başına düşmən tərəfindən açılan müsibətlərin qanlı səhifələrində adları yaşayacaq igidlərimizin sayının çox olmasını heç də təsadüfi saymadılar. Vətən torpağının hər qarışı uğrunda mübarizəyə qoşulan gənc nəslin yetişməsində orta məktəblərin pedaqoji kollektivlərinin üzərinə daha çox məsuliyyət düşməsini qeyd edən Milli Məclisin deputatı, professor Fəzail İbrahimli, həmçinin Mübariz İbrahimovun qulluq etdiyi hərbi hissənin komandiri, polkovnik Rüstəm Bəbirovun çıxışlarından bir daha hiss olundu ki, hər iki təhsil ocağının üzərinə daha böyük məsuliyyət düşür. Çünki onlar Vətənə əsl vətəndaş yetirmiş və nümunəyə çevrilmişlər.

Məktəbin Azərbaycan dili və ədəbiyyatı müəllimi Pikəxanım Nəcəfovanın quruluşu əsasında 8 c və 9 b sinif şagirdlərinin məzunlarla birgə hazırladığı tədbir tamaşaçılara, sadəcə, Xocalı faciəsinin ağrı-acılarını yaşatmadı, ifaların hər birindəki mübarizlik, döyüşkənlik, Vətənə məhəbbət, düşmənə nifrət özünü göstərdi. Gənc nəslin qəlbində vətənpərvərlik duyğularının baş qaldırmasında bu kimi tədbirlərin rolunu yüksək qiymətləndirən qonaqlar şagirdlərin ifasında Dədə Qorqudun torpağı necə əkib-becərməyi və qorumağı tapşırdığının şahidinə çevrildilər. Xalqımızın igid, cəsur, düşmən gülləsindən qorxmayan qəhrəmanlarının obrazını yaradan həvəskar aktyor və bədii qiraətçilər isə Vətən uğrunda şəhidliyin şərəfini yaşamağı bir daha təlqin və təqdir etdilər.

Xatırlatmaq yerinə düşərdi ki, respublika ictimaiyyətinə layiqli vətəndaşlar yetirmiş adıçəkilən qocaman məktəbin pedaqoji kollektivi Azərbaycanın Milli Qəhrəmanı Mübariz İbrahimovun oxuduğu təhsil ocağı ilə sıx əlaqə saxlayır və əməkdaşlıq edir.

Tədbirdə iştirak edən Bakı şəhəri üzrə təhsil idarəsinin müdir müavinləri Qənirə Soltanova və Hüseyn Hüseynov da Xocalı soyqırımının 19-cü ildönümünə həsr edilmiş ədəbi-bədii kompozisiyanı və Milli Qəhrəman Mübariz İbrahimovun oxuduğu məktəbin kollektivinin tədbirə qatılmasını vətənpərvərliyin bariz nümunəsi kimi qiymətləndirdilər. Bildirildi ki, hər iki Milli Qəhrəmanın örnək ömür yolu barədə təhsil ocaqlarında bu kimi tədbirlərin keçirilməsi həm də düşmən üzərində qələbəyə inamı artırmaqdır. 23 yaşlı hər iki igid və cəsur Vətən oğlunun şərəfli-şanlı ömür yolu gənc nəslin torpağa bağlılıq hissinin yüksəldilməsində də vacib amillərdəndir.

Tədbiri Azərbaycan torpaqlarının bütövlüyü uğrunda mübarizənin əks-sədası kimi də qiymətləndirmək mümkündür. Xocalıda, Şuşa və Laçında, Ağdam və Kəlbəcərdə, Füzuli və Cəbrayılda, Zəngilanla Qubadlıda, külli Qarabağda, Zəngəzur və Göyçədə söndürülmüş ocaqların yenidən yandırılması üçün hər bir şagirdin qəlbində sanki Vətən məhəbbətindən qığılcımlanan tonqallar çatılmışdı. Ən maraqlı və təqdir olunan məsələlərdən biri isə tədbirdə məktəbin məzunlarının da eyni ruhda çıxış etməsi idi. İstər Prezident təqaüdçüsü, məşhur Mehmandarovlar nəslinin soydaşıyıcısı, skripkaçı Mustafa Mehmandarovun, istər "Yeni ulduz" respublika mahnı müsabiqəsinin qalibi Azad Şabanovun, istərsə də milli geyimləri və rəqsləri ilə döyüş əhvali-ruhiyyəsi yaradan, folklor nümunələrinin yaşadıcılarının ifaları uzun müddət yadda qalacaqdır.

Məhəmməd NƏRİMANOĞLU

Azərbaycan.- 2011.-26 fevral.- S. 3.