Kiyevdə Qara Dəniz İqtisadi Əməkdaşlıq Təşkilatı Parlament Assambleyasının Bürosunun iclası işə başlamışdır

Ukrayna Parlamentinin mətbuat xidmətindən verilən məlumata görə, bu gün Ukrayna Ali Radasının sədri, Qara Dəniz İqtisadi Əməkdaşlıq Təşkilatı Parlament Assambleyasının (QDİƏT PA) prezidenti Vladimir Litvin Kiyevdə QDİƏT PA Bürosunun 44-cü iclasını açmışdır. İclasda Azərbaycan nümayəndə heyəti iştirak edir.

V.Litvin QDİƏT PA-nın 37-ci Baş Assambleyasının işinin konstruktiv olacağına ümid etdiyini bildirmişdir. Onun fikrincə, Assambleyanın iclası “Qara dəniz regionunda parlamentlərarası əməkdaşlığın dinamikasını artırmağa imkan verəcəkdir”.

Xatırladaq ki, iyunun 30-dan iyulun 2-dək Kiyevdə Qara Dəniz İqtisadi Əməkdaşlıq Təşkilatı Parlament Assambleyasının 37-ci Baş Assambleyasının iclası və Assambleyanın Daimi Komitəsinin iclası keçiriləcəkdir.

Milli nümayəndə heyətlərinin üzvləri “yaşıl” iqtisadiyyata keçidin qanunvericilik yolu ilə təmin edilməsi, QDİƏT üzvü olan dövlətlərdə genetik modifikasiyaya məruz qalmış orqanizmlərdən iqtisadiyyat və ətraf mühit baxımından istifadə edilməsi, elmi-texniki tərəqqinin qanunvericilik dəstəyinin təmin edilməsində parlamentlərin rolu və QDİƏT iştirakçısı olan dövlətlərdə Dünya Səhiyyə Təşkilatının sanitar standartlarına riayət edilməsi məsələlərini müzakirə edəcəklər.

Assambleya kadr məsələlərinə, o cümlədən QDİƏT-in vitse-prezidentlərinin və Assambleyanın beynəlxalq katibliyinin rəhbərliyinin seçilməsi məsələlərinə də baxacaqdır.

İyulun 2-də QDİƏT-də sədrliyin Ukraynadan Albaniyaya keçməsi mərasimi olacaqdır.

Zeynal Ağazadə,

AzərTAc-ın xüsusi müxbiri

Kiyev

Azərbaycan.- 2011.- 1 iyul.- S. 4.