Milli Məclisdə görüş

İyulun 5-də Milli Məclis Sədrinin birinci müavini, Azərbaycanın NATO Parlament Assambleyasında nümayəndə heyətinin rəhbəri Ziyafət Əsgərov NATO Baş katibinin Cənubi Qafqaz və Mərkəzi Asiya üzrə xüsusi nümayəndəsi Ceyms Appaturay ilə görüşmüşdür. Görüşdə NATO-Azərbaycan əlaqələrinin uğurlu inkişafından, qarşılıqlı tərəfdaşlığın gələcək perspektivlərindən danışılmışdır.

Ziyafət Əsgərov demişdir ki, Azərbaycan NATO-nun ən yaxşı tərəfdaşlarından biridir. Ölkəmiz 1994-cü ildən NATO-nun "Sülh naminə tərəfdaşlıq" proqramına qoşulub. Bu qurumla əlaqələrimiz siyasi dialoq, plüralizm, terrorizmə qarşı mübarizə və digər istiqamətlərdə uğurla inkişaf edir. Həmçinin Azərbaycan terrorizmlə mübarizədə NATO-nun mövqeyini dəstəkləyir.

Ölkəmiz Avratlantik Tərəfdaşlıq Şurası çərçivəsində də aktiv fəaliyyət göstərir və bu sahədə NATO ilə 200-dən çox tədbir keçirilmişdir.

Dağlıq Qarabağ, Ermənistan-Azərbaycan münaqişəsindən söz açan Ziyafət Əsgərov demişdir ki, mövcud problemin həll olunmaması bölgədə sülh və əminamanlığın təminatına ciddi əngəl yaradır. İşğalla bağlı BMT Təhlükəsizlik Şurasının məlum 4 qətnaməsini, ATƏT, Avropa Şurasının qərarlarını xatırladan Ziyafət Əsgərov Ermənistanın təcavüzkar siyasətdən hələ də əl çəkmədiyini diqqətə çatdırmışdır.

Ceyms Appaturay demişdir ki, NATO Azərbaycana strateji baxımdan xüsusi önəm verir. Münasibətlərimiz ildən-ilə dərinləşir. Azərbaycan sülməramlılarının Əfqanıstanda sülhyaratma tədbirlərində fəal iştirakı münasibətlərimizə ən yaxşı nümunə ola bilər. Regionda qlobal layihələrin həyata keçirilməsində göstərdiyiniz diqqət təqdirəlayiqdir. Azərbaycanın bölgədə terrorizmə qarşı mübarizə aparması da NATO tərəfindən yüksək qiymətləndirilir.

Ceyms Appaturay daha sonra bildirmişdir ki, NATO Ermənistan-Azərbaycan, Dağlıq Qarabağ münaqişəsinin sülh yolu ilə həllində maraqlıdır. Münaqişə hər iki tərəf üçün məhdudiyyətlər yaradır. Münaqişənin davam etməsi bölgədə sülh və təhlükəsizliyin bərqərar olmasına başlıca maneədir. NATO Azərbaycanın ərazi bütövlüyünü, suverenliyini dəstəkləyir.

Sonda tərəflər qarşılıqlı maraq doğuran digər məsələlər ətrafında da fikir mübadiləsi aparmışlar.

Azərbaycan.- 2011.- 6 iyul.- S. 4.