Pekində keçirilmiş Beynəlxalq Əməkdaşlıq üzrə 2-ci Sərgi Layihələri konfransında Azərbaycana böyük maraq olmuşdur

Çin Xalq Respublikasının paytaxtı Pekində Beynəlxalq Əməkdaşlıq üzrə 2-ci Sərgi Layihələri konfransı keçirilmişdir.

Pekin Beynəlxalq Sərgi Mərkəzində təşkil olunan tədbirə dünyanın bir neçə ölkəsinin dövlət qurumlarının, özəl şirkətlərinin nümayəndələri, eləcə də diplomatik korpusun təmsilçiləri qatılmışlar.

Tədbirdə Azərbaycanın son illər dinamik inkişafı, ölkəmizdə həyata keçirilən investisiya layihələri haqqında danışılmışdır. Azərbaycanın Pekindəki səfirliyinin əməkdaşı Sərxan İsmayılov tədbir iştirakçılarına mühüm geostrateji məkanda yerləşən Azərbaycanın əlverişli sərmayə imkanları, son illər həyata keçirilən irimiqyaslı enerji və nəqliyyat layihələri barədə məlumat vermişdir. Bildirmişdir ki, düzgün iqtisadi siyasət nəticəsində Azərbaycanda sənayenin müxtəlif sahələrinə milyardlarla dollar sərmayə qoyulmuş, 800 mindən çox yeni iş yeri açılmış, əhalinin rifah halı xeyli yaxşılaşmışdır. Bunun nəticəsində bir neçə ildir ki, Azərbaycan dünyada ən sürətlə inkişaf edən ölkələr siyahısında liderlərdən biridir.

Ermənistanın ölkəmizə hərbi təcavüzü, etnik təmizləmə siyasəti barədə məlumat verən səfirliyin əməkdaşı demişdir ki, Azərbaycan rəhbərliyi münaqişənin beynəlxalq hüququn prinsiplərinə uyğun Azərbaycanın ərazi bütövlüyü çərçivəsində həllinə tərəfdardır.

Sonra tədbir çərçivəsində təşkil edilən sərgi ilə tanışlıq olmuşdur. Azərbaycan pavilyonunda ölkəmizin tarixinə, mədəniyyətinə, iqtisadiyyatına, turizm imkanlarına, Bakının müasir görkəminə dair fotoşəkillər və kitablar nümayiş olunmuşdur. Sərgi iştirakçılarının Azərbaycan pavilyonuna böyük marağı ölkəmizin beynəlxalq aləmdə nüfuzunun artmasının təzahürü idi.

Bu cür tədbirlər eyni zamanda ölkəmizin turizm imkanlarının tanıdılması baxımından da əhəmiyyətlidir. Belə ki, sərgilər "Turizm ili" çərçivəsində Azərbaycana turist axınının çoxalmasına müsbət təsir göstərir.

Tədbirin təşkilat komitəsinin sədri xanım San Yonhonq (Sun Yonghong - ingilis redaksiyası üçün) demişdir ki, Azərbaycanın sürətli inkişafı bizə məlumdur. Bilirik ki, ölkənizdə sənaye, turizm, kənd təsərrüfatında böyük nailiyyətlər əldə olunmuşdur. Bugünkü konfransda da iştirakçılara Azərbaycan haqqında ətraflı məlumat verildi. Ümid edirik ki, gələcəkdə Çin ilə Azərbaycan arasında əlaqələr daha da genişlənəcəkdir. Biz Çin şirkətlərinin Azərbaycan iqtisadiyyatının müxtəlif sahələrində təmsil olunmasını araşdırmaq üçün Azərbaycanın müvafiq qurumları, Pekindəki səfirliyi ilə sıx əməkdaşlıq edirik.

Şahin CƏFƏROV,

AzərTAc-ın xüsusi müxbiri

Azərbaycan.- 2011.- 12 iyul.- S.7.