Milli Təhlükəsizlik Nazirliyinin Heydər Əliyev adına Akademiyasında məzunların növbəti buraxılışı olmuşdur

Milli Təhlükəsizlik Nazirliyinin Heydər Əliyev adına Akademiyasında məzunların növbəti buraxılışına həsr olunmuş mərasim keçirilmişdir.

Mərasimdə Milli Təhlükəsizlik Nazirliyinin və Dövlət Sərhəd Xidmətinin rəhbərləri, milli təhlükəsizlik orqanlarının veteranları və məzunların valideynləri iştirak etmişlər.

Əvvəlcə Akademiyanın Döyüş Bayrağı hərbi marşın sədaları altında sıra meydanına gətirilmiş, ümummilli lider Heydər Əliyevin abidəsi önünə əklil qoyulmuşdur.

Ulu öndər Heydər Əliyevin və Azərbaycanın suverenliyi və ərazi bütövlüyü uğrunda həlak olanların xatirəsi bir dəqiqəlik sükutla yad edilmişdir.

Azərbaycanın Dövlət himni səsləndirilmişdir.

Mərasimdə çıxış edən milli təhlükəsizlik naziri general-leytenant Eldar Mahmudov məzunları, onların valideynlərini, akademiyanın professor-müəllim heyətini təbrik etmişdir. Nazir bildirmişdir ki, təcrübəli müəllimlərdən aldıqları biliklər, mənimsədikləri peşəkarlıq vərdişləri vəzifə borclarını layiqincə yerinə yetirməkdə məzunlara kömək olacaqdır. Fəaliyyət göstərdiyi müddətdə, xüsusən son illərdə Akademiyada təlim-tədris işində xeyli nailiyyətlərin əldə edildiyini söyləyən Eldar Mahmudov məzunların xidmətə başladıqları sahələrdə əzmlə çalışmalarının ulu öndərin peşəkarlıq və vətənpərvərlik məktəbinə, Heydər Əliyevin milli maraqların qorunması amallarına sədaqətin göstəricisi olduğunu vurğulamışdır.

Qeyd olunmuşdur ki, nazirliyin müxtəlif struktur bölmələrində və Dövlət Sərhəd Xidmətində fəaliyyətə başlayacaq gənc zabitlər üçün buraxılış günü xüsusilə unudulmazdır. Gənc zabitlər ulu öndər Heydər Əliyevin adını daşıyan təhsil ocağını bitirməkdən qürur duymalıdırlar.

Bu mötəbər ali təhsil müəssisəsində qazandıqları nəzəri və praktik biliklərin gələcək fəaliyyətdə gənc zabitlər üçün yaxşı təməl olacağını bildirən nazir vurğulamışdır ki, məqsəd birdir: Vətənin təhlükəsizliyini qorumaq, müstəqilliyi və dövlətçiliyi möhkəmlətmək.

Nazir demişdir ki, sərhədlərin, təhlükəsizliyin qorunmasına, ümumən milli maraqların etibarlı təminatına xidmət edəcək zabitlər bilməlidirlər ki, əzm, qətiyyət, fədakarlıq, vəzifə borcuna məsuliyyətlə yanaşma və peşəkarlıq olmadan bu, mümkün deyildir. Akademiya gənc zabit korpusunun yetişdirilməsi kimi çətin və məsuliyyətli bir vəzifənin öhdəsindən layiqincə gəlir, təlim-tədrisin, xidmət və istirahət şəraitinin təşkili baxımından müasir tələblərə tam cavab verir. Maddi-texniki bazanın ardıcıl gücləndirilməsi, digər kompleks tədbirlər yüksək ixtisaslı kadrların hazırlanmasına, yeni nəslin əsl vətəndaş kimi yetişməsinə xidmət edir. Bu işdə dövlət başçısının bir neçə il əvvəl Milli Təhlükəsizlik Nazirliyinin Heydər Əliyev adına Akademiyasının ən yüksək dünya standartlarına cavab verdiyini qeyd etməsi əsl stimul olmuşdur. İşimizə verilən bu yüksək qiymət bizi daha da məsul edir.

Akademiyada gənclərin vətənpərvərlik ruhunda tərbiyəsinə xüsusi önəm verildiyini deyən Eldar Mahmudov bunun uğurlu fəaliyyətin başlıca amili olduğunu bildirmişdir. Vətənpərvərlik amilinə ciddi diqqət yetirməkdə əsas məqsəd, ilk növbədə, Ermənistanın işğal etdiyi ərazilərimizin azad olunmasıdır. Ərazi bütövlüyümüzün təmin olunması üçün bütün imkanların tam səfərbər edilməsi Azərbaycan Respublikasının Prezidenti, Ali Baş Komandan İlham Əliyev tərəfindən bütün dövlət orqanlarının qarşısına qoyulmuş bir nömrəli vəzifədir. Bu sahədə sərhəd xidməti və təhlükəsizlik orqanlarının da bütün potensialı səfərbər olunmuşdur. Bu işlərdə gənclərin üzərinə böyük vəzifələr və məsuliyyət düşür. Azərbaycan gəncliyi daim dövlətin qayğısını hiss edir. Qayğıya layiqli cavab isə Vətənə və dövlətə sədaqətdir. Ulu öndər gənclərin hərtərəfli inkişafını ölkənin tərəqqisinin başlıca mənbəyi hesab edirdi. Bu siyasətin yeni tələblərə uyğun davam etdirilməsi mühüm uğurlara şərait yaradır. Gənclərin ölkə həyatının bütün istiqamətlərində öz layiqli yerlərini tutmaları üçün bu günlərdə Azərbaycan Prezidenti tərəfindən "Azərbaycan gəncliyi 2011-2015-ci illərdə Dövlət Proqramı"nın təsdiq edilməsi haqqında" Sərəncam imzalanmışdır. Dövlət başçısının belə münasibəti gənclərlə əlaqədar siyasətin ardıcıl aparılmasının göstəricisidir.

Nazir bildirmişdir ki, dövlət müstəqilliyinin bərpasının 20-ci ildönümü ilə əlaqədar Prezidentin imzaladığı sərəncam Azərbaycanın bütün dövlət orqanlarının qarşısında mühüm vəzifələr qoyur. Akademiyanın builki buraxılışı da belə bir əlamətdar dövrə təsadüf edir. "Biz 20 illik yubileyi bütün sahələrdə uğurları daim artırmaqla, ölkədə başlanmış yeni inkişaf mərhələsinə hər gün töhfə verməklə qarşılamalıyıq. Həm də ulu öndərin "müstəqilliyimiz daimidir, əbədidir və dönməzdir" devizinə qüsursuz əməl etməliyik. Müstəqilliyimizi ardıcıl qorumalı və möhkəmləndirməliyik".

Eldar Mahmudov demişdir ki, ölkəmizdə hərbi, sosial-iqtisadi və ictimai-siyasi həyatın hər bir sahəsində aparılan islahatlar Azərbaycanı möhkəmləndirir, dövlətimizə böyük nüfuz qazandırır. Dinamik inkişaf edən Azərbaycan bölgənin lideridir. İqtisadi artım sürətinə görə ölkəmiz son illər dünya miqyasında ön sırada gedir. Bütün bunlar qlobal və regional xarakterli təhdidlərin artdığı şəraitdə bizi ölkənin təhlükəsizliyinə daha etibarlı təminat yaratmağa çağırır. Eyni zamanda, təhlükəsizliyə cavabdeh orqanların əməkdaşlarından daha yüksək peşəkarlıq, bilik səviyyəsi, tapşırıqların icrasında çeviklik və səriştə tələb olunur. Son illər Milli Təhlükəsizlik Nazirliyində bütün istiqamətlər üzrə əməliyyat-xidməti uğurla həyata keçirilir. Lakin ölkənin sürətli tərəqqisinə xidmət edən bu nailiyyətlər bizi qətiyyən arxayınlaşdırmır, əksinə, səylərimizi ardıcıl surətdə yüksəltməyə sövq edir.

Nazir Azərbaycan Respublikasının Prezidenti, Ali Baş Komandan İlham Əliyevin bütün əmr və göstərişlərinin, tövsiyələrinin bundan sonra da dərhal və qüsursuz yerinə yetiriləcəyini bildirmiş və gənc zabitlərə gələcək fəaliyyətlərində uğurlar arzulamışdır.

Sonra çıxış edən Dövlət Sərhəd Xidmətinin rəisi general-leytenant Elçin Quliyev məzunları təbrik etmiş, silahlı qüvvələrimizin tərkibinə növbəti zabit korpusunun verilməsində xidməti olan hər kəsə, o cümlədən Milli Təhlükəsizlik Nazirliyinin rəhbərliyinə, akademiyanın professor-müəllim heyətinə, məzunların valideynlərinə minnətdarlığını bildirmişdir. O, gənc zabitlərin hazırlanmasında dövlətin diqqət və qayğısını xüsusi qeyd etmişdir. Əsası ulu öndər Heydər Əliyev tərəfindən qoyulmuş ordumuzun qüdrətinin artırılması, təhlükəsizliyimizin daha da möhkəmlənməsi işində Azərbaycan Prezidenti, Ali Baş Komandan İlham Əliyevin gördüyü işlərdən danışan DSX-nin rəisi zabitlərin peşəkarlığının, Vətənə, xalqa sədaqətlə xidmətin bu sahədə rolunu vurğulamışdır.

Heydər Əliyev adına Akademiyanın rəisi general-leytenant Ziya Yusifzadə çıxışında Prezident İlham Əliyevin milli təhlükəsizlik orqanlarına diqqət və qayğısı, Milli Təhlükəsizlik Nazirliyinin bilavasitə səyləri sayəsində akademiyanın inkişafından danışmışdır. Ziya Yusifzadə sıralarında iki Heydər Əliyev təqaüdçüsünün də olduğu məzunların tədris müddətində daim yüksək nailiyyətlər qazandıqlarını, akademiyanın elmi, ictimai, siyasi həyatında fəal iştirak etdiklərini, 21 zabitin akademiyanı fərqlənmə diplomu ilə bitirdiyini bildirmişdir.

Akademiyanın məzunu leytenant Cavid Quliyev çıxış edərək, ümummilli lider Heydər Əliyevin adını daşıyan ali hərbi təhsil ocağını bitirmələrindən qürur hissi keçirdiklərini vurğulamışdır. Digər məzun leytenant Həmzə Nəcəfov kursantlara göstərilən yüksək diqqət və qayğıya görə Azərbaycan Prezidenti, Ali Baş Komandan İlham Əliyevə, Milli Təhlükəsizlik Nazirliyinin, Dövlət Sərhəd Xidmətinin və akademiyanın rəhbərliyinə, müəllim kollektivinə minnətdarlıq etmiş, bütün məzunlar adından Vətənə sədaqətlə xidmət edəcəklərini bildirmişlər.

Sonra milli təhlükəsizlik naziri Eldar Mahmudov və Dövlət Sərhəd Xidmətinin rəisi Elçin Quliyev akademiyanı fərqlənmə ilə bitirən məzunlara diplomları təqdim etdilər. Digər zabitlərə də diplomlar təqdim olunduqdan sonra zabit və kursantlar hərbi maşın sədaları altında tribunanın qarşısından keçmişlər.

Mərasim akademiyadakı "Şöhrət" Muzeyində davam etdirilmiş, milli təhlükəsizlik naziri Eldar Mahmudov və Dövlət Sərhəd Xidmətinin rəisi Elçin Quliyev tərəfindən akademiyanı fərqlənmə ilə bitirən gənc zabitlərə qiymətli hədiyyələr verilmişdir. Akademiyanın xidmətdə fərqlənmiş bir qrup əməkdaşının təltif olunması barədə milli təhlükəsizlik nazirinin əmri elan olunmuşdur. Ulu öndər Heydər Əliyevin büstünün və muzeyin önündəki abidəsi qarşısında xatirə şəkilləri çəkdirilmişdir.

Milli təhlükəsizlik naziri Eldar Mahmudov, Dövlət Sərhəd Xidmətinin rəisi Elçin Quliyev, akademiyanın rəisi Ziya Yusifzadə məzunların valideynləri ilə səmimi söhbət etmiş, Vətənə belə layiqli övladlar yetişdirdiklərinə görə təşəkkürlərini bildirmişlər.

AzərTAc

Azərbaycan.- 2011.- 14 iyul.- S.5.