Elin böyük sərvəti
Neçə
vaxtdır ki, Dövlət Aqrar Universitetinin əsaslı surətdə
yenidən qurularaq işıqlı və yaraşıqlı
zalı maraqlı görüşlər mərkəzinə
çevrilib. Bu günlərdə həmin mərkəzdə
"Heydər Əliyev irsi və milli-mənəvi dəyərlərin
qorunması" mövzusunda "dəyirmi masa"
keçirilmişdir. Tədbirdə şəhərdəki ali
məktəblərin nümayəndələri, ziyalılar,
YAP-ın fəalları iştirak etmişlər.
Əvvəlcə
universitetin rektoru, əməkdar elm xadimi, professor Mirdaməd
Sadıdovun "Milli-mənəvi dəyərlərimizin
qorunması Heydər Əliyev siyasətində aparıcı
istiqamətdir" mövzusunda geniş məruzəsi dinlənilmişdir.
O, müstəqil həyatımızın hər sahəsində,
eləcə də milli dəyərlərin mühafizəsində
və onların daha da zənginləşdirilməsində ulu
öndər Heydər Əliyevin əvəzsiz xidmətlərindən
danışmış, bu böyük şəxsiyyətin
respublikamıza rəhbərlik etdiyi illərdə
gördüyü misilsiz işləri xronoloji
ardıcıllıqla xatırlatmışdır. Qeyd
olunmuşdur ki, elimizin dahi oğlu hələ sovetlər
dövründə milli mədəniyyətimizə xüsusi
qayğı göstərirdi. Sənətkarlarımızın
əsərləri Ümumittifaq miqyasına
çıxarılır, şanlı keçmişimiz,
müqəddəs ana dilimiz, adət-ənənələrimiz
geniş təbliğ olunurdu.
Dahi
rəhbərin yolunu uğurla davam etdirən Prezident İlham Əliyev
milli-mənəvi dəyərlərin YUNESKO miqyasında
geniş təbliğinə xüsusi diqqət yetirir. Bununla
bağlı Dünya azərbaycanlılarının III
qurultayındakı nitqində ölkə rəhbəri
demişdir: "Azərbaycanda müasir dövlət
quruculuğu prosesi uğurla gedir. Eyni zamanda, biz milli mənəvi
dəyərlərimizə də çox sadiqik, onları
qoruyuruq. Azərbaycan dəyərləri bizim üçün
müstəsna əhəmiyyət daşıyır. Əsrlər
boyu Azərbaycan xalqı milli-mənəvi dəyərlərini,
ana dilini - Azərbaycan dilini qoruya bilmişdir. Bu gün Azərbaycan
dövləti bu möhkəm təməl üzərində
yaranır, güclənir və bölgədə, regionda
artıq çox mühüm amilə çevrilibdir".
Universitetin
dosenti Nizami Əlizadə, YAP Gəncə şəhər təşkilatının
sədri, professor İsrafil İsmayılov, icra hakimiyyətinin
məsul işçisi Kənan Tahirov və başqaları
çıxış edərək həyatımızın ən
müxtəlif sahələrində xalqımızın xilaskarı
Heydər Əliyevin milli-mənəvi irsimizin qorunmasına
göstərdiyi misilsiz xidmətlərindən və onun ədəbi
irsinin gənclər tərəfindən dərin maraqla öyrənilməsindən
danışdılar.
Gəncə
Regional Elm Mərkəzinin direktoru, Milli Elmlər
Akademiyasının müxbir üzvü, professor Fuad Əliyevin
"Gəncədə Nizami mərkəzinin yaradılması
Heydər Əliyev ideyalarının təntənəsidir"
mözusundakı məruzəsi də maraqla
qarşılandı. F.Əliyev qeyd etdi ki, bu gün Gəncədə
Nizami Mərkəzinin yaradılması, dünya söz səltənətinin
böyük ustadının məqbərəsi ətrafında
37 hektar ərazidə Xəmsə motivləri əsasında
canlı muzeyin təşkili ulu öndərin
ideyalarının təntənəsinin təsdiqidir. İcra
hakimiyyətinin təşəbbüsü ilə Gəncə
şəhəri başdan-başa milli üslubda yenidən
qurulur. İmamzadə kompleksi əsaslı surətdə təzələnir.
Şah Abbas məscidi təmir olunur. Dövlət
Filarmoniyası üçün müasir üslubda yeni bina
inşa edilir. Qədimi binalar öz əzəli görkəmində
bərpa olunur. Bir sözlə, dövlətə və
dövlətçiliyə minnətdar olan gəncəlilər
ulu öndərin milli-mənəvi dəyərlərin
qorunması sahəsindəki ənənələri uğurla
davam etdirir, daha da zənginləşdirirlər.
Əhməd İSAYEV
Azərbaycan.- 2011.-14 iyul.- S.5.