Azərbaycan ilə Çin arasında diplomatik əlaqələr qurulduqdan sonar münasibətlərimiz daha da genişlənmişdir

Azərbaycan müstəqilliyini bərpa etdikdən sonra çox sürətli inkişaf yolu keçmiş, bir sıra mühüm uğurlara imza atmışdır. Bu sözləri Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov iyulun 14-də Bakıda səfərdə olan Ümumçin Gənclər Federasiyasının nümayəndə heyəti ilə görüşdə söyləmişdir.

S.Seyidov bildirmişdir ki, Azərbaycan beynəlxalq münasibətlər sistemində Çin ilə əməkdaşlığa xüsusi önəm verir. Hər iki ölkənin parlamentləri əməkdaşlığın genişləndirilməsinə yaxşı töhfə verir. Bildirilmişdir ki, dövlətimiz gənclərin problemlərinin həllinə xüsusi diqqət və qayğı göstərir. Gənclər siyasəti ilə bağlı qanunun və xüsusi dövlət proqramlarının qəbulu bunun bariz nümunəsidir. Prezident İlham Əliyevin həyata keçirdiyi məqsədyönlü siyasət nəticəsində gənclərin sosial rifahının yüksəlməsinə hər cür şərait yaradılmışdır. Milli Məclis də gənclər siyasəti ilə bağlı qanunvericiliyi daim təkmilləşdirir.

Ümumçin Gənclər Federasiyası katibinin müavini Çu Fen bildirmişdir ki, 1992-ci ildə Azərbaycan ilə Çin arasında diplomatik əlaqələr qurulduqdan sonra ikitərəfli münasibətlərimiz uğurla inkişaf etmiş, əməkdaşlığımız daha da genişlənmişdir. Bu gün Azərbaycan ilə Çin beynəlxalq təşkilatlarda bir-birilərinin mövqelərini daima dəstəkləyirlər.

Qonaq qeyd etmişdir ki, ölkələrimiz arasında idman, mədəniyyət, turizm və digər sahələrdə əlaqələri inkişaf etdirmək üçün bir çox sənədlər imzalanmış, möhkəm hüquqi baza yaradılmışdır. İnanırıq ki, bütün bunlar hər iki ölkənin gənclər təşkilatları arasında əlaqələrin inkişafına öz töhfəsini verəcəkdir.

Dağlıq Qarabağ münaqişəsinə toxunan Ç.Fen qeyd etmişdir ki, Çin hər zaman Azərbaycanın ədalətli mövqeyini və ərazi bütövlüyünü dəstəkləyir, problemin beynəlxalq hüququn norma və prinsiplərinə uyğun həllinə tərəfdardır.

Sonda qonaqlar Milli Məclisin iclas salonu və deputatlar üçün yaradılmış iş şəraiti ilə tanış olmuşlar.

AzərTAc

Azərbaycan.- 2011.- 15 iyul.- S. 3.