"Axıska" kooperasiyasının zəmiləri bol məhsuldan xəbər verir

Qızılı rəngə çalan zəmi göz işlədikcə uzanıb gedir. Dənlərin ağırlığına tab gətirməyən dolu sünbüllərin boynu bükülüb. Hətəmşah sünbullərdən birini qırıb ovcunda ovxaladı. Sonra bir əlindən o biri əlinə sovurdu.

Ovcunda nar dənələri kimi iri və sağlam xeyli buğda dənəsi qaldı. Buğda dənələrini həvəslə sayıb uzun illərdən bəri əkinçilik sahəsində qazandığı təcrübə əsasında hesablama apardı. Bir sünbüldəki dənlərin sayını orta hesabla hər kvadratmetrə düşən bitkilərin - sünbüllərin sayına vurdu, sonra hər hektarın məhsuldarlığını müəyyənləşdirdi. Hər hektardan azı 35 sentner məhsul götürüləcəyi real idi. Ürəyi fərəhlə doldu. Üzünə təbəssüm qondu. Qeyri-ixtiyarı pıçıldadı: Şükür Allaha, bu il çörəyimiz bol olacaq.

Hətəmşah Məcidov Sabirabad rayonunda yeni yaradılmış "Axıska" kooperasiyasına rəhbərlik edir. 110 ailəni birləşdirən kooperasiyanın istifadəsində 350 hektar torpaq sahəsi var. Axıska türkləri uzun illərdir ki, Sabirabad rayonunda məskunlaşıblar. Yerli əhali ilə elə qaynayıb qarışıblar ki, heç bir fərq hiss olunmur. Onlar torpağı sevən, zəhmətə bağlı, sadə və mehriban insanlardır. Hələ sovet dönəmində kolxozda işləyərkən də yüksək əmək nailiyyətləri qazanardılar. Camaat arasında böyük nüfuz sahibi olan yüksək təşkilatçılıq bacarığı ilə seçilən, hamının qayğısına qalmağa çalışan Hətəmşah Məcidov o vaxtlar kolxoz sədri işləyirdi. İndi yenə böyük bir kəndə aqsaqqallıq edir.

Hətəmşah qərarını qətiləşdirmək üçün asta mehin təsirindən dəniz kimi dalğalanan zəminin ortalarına doğru xeyli irəlilədi. Bir neçə yerdə sünbülləri diqqətlə nəzərdən keçirdi, dənin yetişkənlik vəziyyətini yoxladı. Özlüyündə verdiyi qərarı bir daha təsdiqlədi. Elə zəminin ortasında Dəmirxana telefon açdı:

- Dəmirxan, salam, mənim tapşırığımı uşaqlara çatdır. Sabah "Böyük yer"də biçinə başlayırıq. Kombaynlar tezdən sahənin kənarında olsun ki, şeh götürülən kimi başlaya bilək.

Kooperasiyanın fəallarından olan Dəmirxan Eminov bu şad xəbərdən fərəhləndi: "Xeyirli, uğurlu olsun, qardaş, - dedi. - Narahat olma, taxıl kombaynları neçə vaxtdan bəri hazırdır. Uşaqlar darıxa-darıxa qalıb, sizin komandanızı gözləyirlər".

Artıq qərar qəbul edilmişdi. Sabah "Axıska"nın taxıl zəmilərində biçinə başlanacaqdı. Hətəmşah ayrı-ayrı adamlara da zəruri göstərişlərini verdi. Biçinçilərə iş üstündə çay-çörək vermək üçün də tədarük gördü, "taxıl biçini əkinçi üçün toy-bayramdı," - dedi. Öz heyvanlarından bir ətlisini elə zəminin kənarında kəsib süfrə açmağı tapşırdı.

Hətəmşah biçinə hazırlıqla bağlı nə tələb olunurdusa, hamısını etdi. Hər kəsə öz vəzifəsini bir daha xatırlatdı. Elə bil xeyli yüngülləşdi, varlığına qeyri-adi bir rahatlıq gəldi.

Sabahı kənddə əsl bayram əhval-ruhiyyəsi yaşanırdı. Kooperasiyanın fəalları məhsulu biçiləcək zəminin kənarına toplaşmışdılar. Bir tərəfdə sıra ilə dayanmış 3 ədəd taxılyığan kombayn komanda gözləyirdi. Yeri gəlmişkən onu da qeyd etmək lazımdır ki, artıq iki ildən bəri fəaliyyət göstərən "Axıska" kooperasiyası müxtəlif təsərrüfat işlərini texniki imkanları hesabına görür. Təsərrüfatda 19 ədəd müxtəlif markalı kənd təsərrüfatı maşın-mexanizmi var. İndi 280 hektar taxıl əkini sahəsinin məhsulunu da kənardan texnika cəlb etmədən yığıb götürmək əzmindədirlər.

Aydın səmadan təbəssümlə boylanan günəş Axıska kəndlisinə xoş müjdəli günlər vəd edir. Bir azdan zəmilərin şehi çəkilir. Kombaynlar bol məhsullu zəmiyə girib ağır-ağır irəliləyir. Yerbəyerdən səslər ucalır: bərəkətli olsun, xeyirli olsun...

Hətəmşah isə hələ də arxayınlaşmır, zəmidə iz açan kombaynın arxasınca gedib biçinin keyfiyyətini yoxlayır, küləşlə birlikdə kövşənə dən tökülüb-tökülmədiyini müəyyənləşdirir. Apardığı müşahidənin nəticəsindən razı qaldığı təbəssüm yağan çöhrəsindən aydın hiss olunur. Taxıl biçininin uğurlu başlanğıcından aldığı xoş təəssüratı bizimlə həvəslə bölüşür:

- Zəmilərin bu günü üçün, doğrusu, çox zəhmət çəkmişik. Buna görə heç kəsə minnət qoya bilmərik. Çünki süfrəmizin çörəyi üçün çalışırıq. Amma bu işdə bizə qol-qanad verən dövlətimizin dəstəyidi. Taxıl əkib-becərdiyimizə görə hər il dövlət büdcəsindən xeyli vəsait alırıq. Güzəştli qiymətlərlə bizə lazım olan qədər mineral gübrələr verilir. Rayonumuzun icra başçısı Nazim İsmayılov bizimlə bir neçə dəfə görüşüb. Aqrar sahədə yenilik olan kooperasiyanın işini canlandırmaq üçün qayğısını əsirgəmir. Dövlət hər müraciətimizə, hər təklifimizə diqqətlə yanaşır, üzləşdiyimiz problemlərin operativ həllini təmin edir.

Qeyd edim ki, yeni kooperasiyanın üstünlükləri çoxdur. Atalarımız güc birlikdədir, - deyiblər. Hər hansı bir iş nə qədər ağır olsa da, birgə işləməklə, kollektiv çalışmaqla onu yüngülləşdiririk. Bu, kənd təsərrüfatı sahəsində daha aydın hiss olunur. Bizim kooperasiya 110 ailəni birləşdirir. Bu, çox böyük güc deməkdir. Biz bu gücü məqsədyonlü şəkildə idarə etməklə böyük uğurlar qazanırıq. Bu il taxılımızın bol olacağı şübhəsizdir. Bundan əlavə, bostan-tərəvəz, heyvandarlıq məhsulları istehsalında da böyük artıma nail olacağıq. Kooperasiyanın əsas üstünlüyü ondadır ki, əkin sahələrindəki pərakəndəlik artıq aradan qaldırılıb. Əvvəllər kəndin ayrı-ayrı ərazilərində hər birinin sahəsi 1,3,5 hektar, yaxud bundan az, ya da çox olan pambıq, bostan-tərəvəz məhsulları əkilirdisə, indi əkin sahələri komplektləşdirilib. Belə olanda becərmə işlərinin səmərəsi artır, hər hektarın məhsuldarlığı yüksəlir. Təbii ki, istehsal olunan məhsulların maya dəyəri də əhəmiyyətli şəkildə aşağı düşür. Cəsarətlə deyə bilərəm ki, seçilən yol düzgündür. "Axıska"nın şöhrəti tezliklə respublikaya yayılacaqdır.

Bizə qalan isə uğur arzulamaqdır. İşiniz avand, ruziniz bol, yolunuz açıq olsun!

Lazım QULİYEV

Azərbaycan.-2011.-17 iyul.-S.1.