Bu yol bizi doğma yurda qovuşduracaq

Çox hörmətli, zati-aliləri cənab İlham Əliyev!

Biz - Ağdam rayonu ictimaiyyətinin bir qrup nümayəndəsi Qarabağa və qarabağlılara göstərdiyiniz həyati əhəmiyyətə malik davamlı qayğı və diqqətə görə Sizə bütün el-obanın minnətdarlığını çatdırmağı özümüzə borc bilirik.

Ərazisinin dörddə üç hissəsi Ermənistan silahlı qüvvələri tərəfindən işğal edilmiş Ağdam rayonunun sakinləri illərdən bəri məcburi köçkün həyatının məşəqqətlərini yaşamış, sözün həqiqi mənasında kirpikləri ilə od götürmüşlər. Sizin hakimiyyətə gəlişiniz ərəfəsində, seçkiqabağı görüşlərdə Bərdədəki Türk "Qızıl Ay" çadır şəhərciyinin sakinləri ilə görüşünüzdə verdiyiniz vəd - "Azərbaycanda bir çadır şəhərciyi də qalmayacaqdır" barədə öhdəliyiniz artıq çoxdan şərəflə yerinə yetirilmişdir.

Cənab Prezident! Sağ olun ki, Sizin böyük qayğınız sayəsində ağdamlı məcburi köçkünlər indi doğma rayonumuzun ərazisində salınmış yeni qəsəbələrdə hər cür rahatlığı olan yaraşıqlı mənzillərdə yaşayırlar. Sizin təşəbbüsünüzlə rahat evlərlə yanaşı müasir tipli xəstəxanalar, məktəblər, mədəniyyət evləri, başqa sosial obyektlər də tikilib istifadəmizə verilmişdir. Hər kəsdə böyük razılıq və minnətdarlıq hissi doğuran bir mühüm məsələ də kəndlərimizə təbii qaz çəkilişidir. Bu işi daha da sürətləndirmək üçün Neft Şirkətinin rəhbərliyinə verdiyiniz tapşırıqlardan da mətbuat vasitəsilə xəbərimiz var. Bizim yaxşı, firavan yaşamağımız üçün Siz lazım olan hər şeyi edirsiniz. Məhz bu qayğının sayəsində biz azğın düşmənlə təmas xəttinin beş addımlığında, bir güllə məsafəsində yaşamaqdan nəinki qorxmuruq, əksinə, hər an silaha sarılıb müqəddəs saydığımız gözlənilən savaşa atılmağa hazırıq!

Cənab Prezident, bir neçə gün əvvəl "Ağdam rayonunun sosial-iqtisadi inkişafının sürətləndirilməsinə dair əlavə tədbirlər haqqında" imzaladığınız sərəncam bizə ölçüyə sığmayan yüksək əhvali-ruhiyyə, qələbə əzmi bəxş etmişdir. 46 min nəfər əhalinin yaşadığı 21 kəndi, 6 məcburi köçkün qəsəbəsini birləşdirən Quzanlı - Xındırıstan - Əhmədağalı - Əfətli avtomobil yolunun tikintisi üçün 6 milyon manat vəsait ayırmağınız bu cəbhə bölgəsinə davamlı qayğı və diqqətinizin növbəti ifadəsidir. Ağdamlılar inanırlar ki, Sizin xeyir-duanızla tikiləcək bu yol bizi doğma yurda qovuşduracaqdır. Biz bu yolu qələbə yolu kimi qəbul edirik. Sizin müdrik siyasətiniz, yenilməyən qətiyyətiniz qələbənin çox yaxında olmasından soraq verir. Qoy iqtisadi böhran burulğanında boğulan Ermənistan rəhbərləri cəbhə xəttində adi kənd yollarının tikintisi üçün milyonlarla manat vəsait ayıran bir dövlətin gündən-günə artan iqtisadi qüdrətindən məntiqi nəticə çıxarsınlar.

Çox hörmətli cənab İlham Əliyev! Biz ağdamlılar həmişə sizinləyik. Tarixin ən çətin məqamlarında Heydər Əliyev siyasi kursuna sədaqətli olmuşuq. Bu mövqe dəyişməzdir. Sizin qayğınız, diqqətiniz bizə yenilməz inam verir. İnanırıq ki, dövlətimizin sükanı etibarlı əllərdədir. Qüdrətli rəhbərimiz doğma Azərbaycanı daha işıqlı sabahlara qovuşdurmağa qadirdir. Tanrı Sizi qorusun. Siz Azərbaycan xalqına çox lazımsınız.

Ağdam rayon ictimaiyyətinin nümayəndələri adından:

İdris Quliyev - Qaradağlı kənd sakini

Abbas Vəliyev - Rzalar kənd sakini

Elxan Əliyev - Evoğlu kənd sakini

Balay Mahmudov - Paşabəyli kənd sakini

Allahverdi Məmmədov - Zəngişalı kənd sakini

Faiq Vəliyev - Mahrızlı kənd sakini

Sədrəddin Ələsgərov- Sosialist Əməyi Qəhrəmanı, Quzanlı qəsəbə sakini

Şərif Əliyev - Əhmədağalı kənd sakini

Əlyar Allahverdiyev - Bənövşələr kənd sakini

Mayıl Paşayev - Xındırıstan qəsəbə sakini

Şahin Nəsirov - Hacıturalı kənd sakini

Azərbaycan.-2011.- 17 iyul.- S.1.