Azərbaycan
jurnalistikasında çalışanlar peşəkar olmaqla yanaşı, vətənpərvər
olmalıdırlar
- Ölkədə mətbuatın
özü durulaşır. Bunun
sırasında, sözün həqiqi mənasında,
mətbuat ənənələrini, normalarını yaşadanlar, onu inkişaf etdirənlər, Azərbaycan cəmiyyətini
informasiya ilə təmin edənlər
ayrı-ayrı qeyri-sağlam məqsədlərlə
mətbuata gələnlərdən seçilirlər. Yavaş-yavaş həqiqi mətbuat qeyri-həqiqi
mətbuatla sərhəd saxlayır, bu da, sözün həqiqi mənasında,
Azərbaycanda milli mətbuatın gələcəyi
ilə bağlı optimist fikrə gəlməyə
əsas verir.
Son zamanlar mətbuatın inkişafı ilə
bağlı mühüm addımlar
atılıb. Mətbuatın inkişafına dövlət dəstəyi
konsepsiyası qəbul olunub. Buna müvafiq olaraq, KİV-in
İnkişafına Dövlət Dəstəyi Fondu yaradılıb. Mətbuat işçilərinə
dövlət qayğısı artırılıb. Mətbuatla
bağlı ayrı-ayrı illərdə dövlət
başçısının sərəncamları
imzalanıb. Bütün bunlar
mətbuata dövlət dəstəyinin göstəricisidir.
Azərbaycan cəmiyyətində
də yavaş-yavaş medianın
yaxşını pisdən seçməyi və yaxşı media nümunələrinə dəstək verilməsi,
reklam, qəzetlərin alınması kimi sahələrdə irəliləyiş
müşahidə olunur.
Bütün
bunlardan çıxış edərək
demək olar ki, bu gün Azərbaycanda
medianın vəziyyəti gündən-günə
yaxşılaşır, müstəqil media
mövcuddur, söz, mətbuat
və məlumat azadlığı bərqərar olub. İstənilən jurnalist
istənilən hadisə ilə bağlı, dövlət quruculuğu prosesləri, ayrı-ayrı məmurların
fəaliyyəti, bu və digər sahələrin
fəaliyyəti ilə bağlı sərbəst informasiya toplamaq, onu sərbəst təhlil etmək və sərbəst
yaymaq imkanına malikdir.
Elektron informasiya vasitələri ilə bağlı da vəziyyət getdikcə
yaxşılaşır. Son zamanlar Azərbaycanda teleradio
fəaliyyəti ilə bağlı ciddi
irəliləyiş olub. Azərbaycanın
həm mərkəzi, həm region
televiziyaları, həm də digər elektron
KİV-ləri, radiolar, internet
televiziya və radioları, internet mediasının fəaliyyəti getdikcə
genişlənir. Azərbaycan müasir
dünyanın informasiya məkanında öz mətbuatı, informasiya
vasitələri ilə getdikcə daha aktiv, daha geniş
şəkildə təmsil olunur.
Hər bir jurnalist jurnalist olması
ilə yanaşı, həm də konkret
ölkənin vətəndaşıdır, konkret
ölkənin milli-mənəvi dəyərlərinin
daşıyıcısıdır, konkret bir ölkənin maraqlarının müdafiəçisidir.
Bu anlamda biz dəfələrlə
bu fikri bildirmişik və indi də
bu çağırışı edirik ki, Azərbaycan
jurnalistləri unutmasınlar ki, onlar Azərbaycanı təmsil edirlər.
Unutmasınlar ki, bu
ölkənin maddi, mənəvi və sosial problemləri eyni zamanda onların özlərinə aiddir. Bu ölkənin təhlükəsizliyi
ilə bağlı məsələlər bir
vətəndaş kimi onların özünü və ailəsini də əhatə
edir. Jurnalistlər söz və mətbuat azadlığı
prinsiplərini rəhbər tutaraq fəaliyyət
göstərdikləri zaman eyni zamanda vətənpərvərlik
hissini unutmasınlar, ayrı-ayrı
ölkələrin Azərbaycanla bağlı qaranlıq məqsədlərinə,
qaranlıq fəaliyyətinə dəstək olmasınlar.
Biz bu
çağırışları etmişik.
Keçid dövrü
yaşayan ölkələrin əksəriyyətində
bu hallar olur, eyni zamanda
bizdə də olub və var,
görünür ki,
gələcəkdə də olacaq. Əsas
odur ki, bu tendensiya təşkil
etməməlidir, kütləvi şəkildə
olmamalıdır. Azərbaycan jurnalistikasında
çalışan insanlar peşəkar
olduqları kimi vətənpərvər də
olmalıdırlar, Vətəni, dövləti sevməlidirlər
və onun təəssübünü
çəkməlidirlər.
Azərbaycan cəmiyyəti
"reket jurnalistika"nı
qınağa çəkməlidir. Cəmiyyət
"reketçilik"lə, şər, böhtan,
təhqirlə məşğul olan mətbuatı
qınağa çəkməlidir. İlk
növbədə cəmiyyət həmin qəzetləri
almamalıdır. Bu qəzetləri almaqdan, oxumaqdan imtina etməlidir. Təsəvvür
edin ki, Azərbaycanda
elə qəzetlər var ki,
həftədə bir dəfə
buraxılır və fəaliyyəti yalnız bu və ya digər
insanı qaralamaq, onu
təhqir etmək, onunla bağlı yalan, böhtan informasiyalar toplamaq, yazmaq və o insanı təhdid
edərək bu və ya digər şeylərə məcbur etməkdir.
Bunlara qəzet deməyə adamın dili də gəlmir. Bununla
bağlı son zamanlar
Mətbuat Şurası belə qəzetlərlə ciddi mübarizəyə başlayıb və doğru edir. Bu, ictimaiyyətin, cəmiyyətin tələbidir.
Demək olar ki, Azərbaycanda
çıxan son həftəlik mətbuatın
70-80 faizini ifşa
ediblər. Xüsusən "reketlik"lə məşğul
olan, ayrı-ayrı insanları təhdid
edən, onları şərləyən, böhtan
atan qəzetləri ifşa
ediblər və bu siyahı da demək olar ki, bütün Azərbaycan
ictimaiyyətinə çatıdırılıb. Belələri
bundan sonra da olacaqsa, onlara
qarşı yenə də mübarizə
aparılmalıdır. Təkrar qeyd edirəm,
mətbuatın funksiyasını, jurnalistin
peşəkarlığını, əxlaq kodeksini
pozan bu tipli jurnalistlərə, mətbuat
orqanlarına, qəzetlərə aramızda yer
olmamalıdır.
Azərbaycanda jurnalistlərin sosial problemlərinin həlli ilə
bağlı işlər davam etdirilir, bundan sonra da davam
etdiriləcək. Bildiyiniz kimi,
keçən il həm fondun
xətti ilə, həm də cənab Prezidentin
bilavasitə sərəncamı ilə mətbuata birdəfəlik
maddi yardım göstərildi. KİV-lərin
maddi-texniki bazasının
yaxşılaşdırılması məqsədilə qrantlar ayrıldı. Mətbuat işçilərinin
mənzil şəraitinin
yaxşılaşdırılması istiqamətində
dövlət addım atır. Gələcəkdə də
belə addımlar olacaq. Dövlət
jurnalistlərin peşəkarlığını artırmaq,
onların peşəkar fəaliyyətini inkişaf
etdirmək sahəsində mühüm tədbirlər
görür. Xüsusilə jurnalistlərin
təcrübələrinin artırılması, təhsili,
onların bu və ya
digər xarici dilə yiyələnməsi
və s. istiqamətində işlər görülür. Qəzetlərin reklam fəaliyyətlərinin
yaxşılaşdırılması istiqamətində
dövlətin çağırışları var. Bu sahə üzrə
müəyyən ideyalar var.
Fikirləşirik ki, onların maddi vəziyyətlərini
yaxşılaşdıraq.
Jurnalistlər üçün
tikiləcək bina inşaata
hazırdır, bütün sənədləri,
inşaat pasportu və
s. hazırdır və bu
günlərdə onun inşasına
başlanılacaq.
O evlər Azərbaycan
mediasında ən çox haqqı olanlara veriləcək. Ölkə
başçısının tapşırığı bundan ibarətdir. Azərbaycan
mediasında ən çox haqqı olan insanlar neçə
illərdir ki, fəaliyyət göstərirlər,
neçə illərdir ki, sözün həqiqi mənasında,
jurnalistikanın inkişafı üçün
lazımi işləri görüblər, birinci
növbədə onlar və sonra ciddi ehtiyacı olanlar evlə təmin ediləcək.
Azərbaycan.- 2011.- 19 iyul.- S. 3.