Nazirlər Kabineti iyul ayında daha bir neçə yeni qərar qəbul etmişdir

Nazirlər Kabineti iyul ayında daha bir neçə yeni qərar qəbul etmişdir.

"Prokurorluq haqqında", "Prokurorluq orqanlarında qulluq keçmə haqqında" və "Əmək pensiyaları haqqında" Azərbaycan Respublikasının qanunlarına dəyişikliklər və əlavələr edilməsi barədə" Azərbaycan Respublikasının 2009-cu il 20 oktyabr tarixli 895-IIIQD nömrəli Qanununun tətbiq edilməsi haqqında" Azərbaycan Respublikası Prezidentinin 2009-cu il 18 noyabr tarixli fərmanına əsasən Nazirlər Kabineti "Prokurorluq orqanlarında xidmət yerinin dəyişdirilməsi ilə əlaqədar yaşayış yeri olmayan və bu səbəbdən kirayə götürülmüş mənzildə yaşayan prokurorluq işçilərinə pul kompensasiyasının məbləği və verilməsi Qaydası"nın təsdiq edilməsi haqqında" qərar qəbul etmişdir.

Qərar iyulun 12-dən qüvvəyə minmişdir.

Azərbaycan Respublikası Prezidentinin 2008-ci il 30 dekabr tarixli sərəncamı ilə təsdiq edilmiş "2009-2015-ci illərdə Azərbaycan Respublikasında sığorta-pensiya sisteminin inkişafına dair Dövlət Proqramı"nın 2.5-ci bəndinin icrasını təmin etmək məqsədi ilə Nazirlər Kabineti "Məcburi dövlət sosial sığortası üzrə ödəmələrin və əmək qabiliyyətini müvəqqəti itirmiş işçilərə sığorta edənin vəsaiti hesabına ödənilən müavinətin hesablanması və ödənilməsi haqqında Əsasnamə"nin təsdiq edilməsi barədə" özünün 1998-ci il 15 sentyabr tarixli qərarında dəyişikliklər edilməsi haqqında qərar qəbul etmişdir.

Qərar iyulun 13-dən, 1.15.3-cü yarımbəndi isə 2014-cü il yanvarın 1-dən qüvvəyə minir.

"Bir sıra mərkəzi icra hakimiyyəti orqanlarının strukturlarının təsdiq edilməsi haqqında" Azərbaycan Respublikası Prezidentinin 2010-cu il 14 iyul tarixli sərəncamının 14.2-ci bəndinin icrasını təmin etmək məqsədi ilə Nazirlər Kabineti "Azərbaycan Respublikası Dövlət Torpaq və Xəritəçəkmə Komitəsinin strukturuna daxil olmayan tabeliyindəki qurumların Siyahısı"nın təsdiq edilməsi haqqında" qərar qəbul etmişdir.

"Əlilliyin və uşaqların sağlamlıq imkanları məhdudluğunun qarşısının alınması, əlillərin və sağlamlıq imkanları məhdud uşaqların reabilitasiyası və sosial müdafiəsi haqqında" Azərbaycan Respublikasının Qanununda dəyişiklik edilməsi barədə" Azərbaycan Respublikasının 2011-ci il 4 mart tarixli 85-IVQD nömrəli Qanununun tətbiq edilməsi haqqında" Azərbaycan Respublikası Prezidentinin 2011-ci il 20 aprel tarixli fərmanının 1.2-ci bəndinin icrasını təmin etmək məqsədi ilə Nazirlər Kabineti Azərbaycan SSR Nazirlər Sovetinin 1983-cü il 14 oktyabr tarixli qərarı ilə təsdiq edilmiş "Azərbaycan SSR ərazisində mənzil şəraitini yaxşılaşdırmağa ehtiyacı olan vətəndaşları uçota götürməyin və yaşayış sahələrini bölüşdürməyin Nümunəvi Qaydaları"nda dəyişiklik edilməsi barədə qərar qəbul etmişdir.

Hər iki qərar iyulun 14-dən qüvvəyə minmişdir.

"Azərbaycan Respublikası Təhsil Nazirliyinin strukturunun təsdiq edilməsi haqqında" Azərbaycan Respublikası Prezidentinin 2010-cu il 27 dekabr tarixli sərəncamının 2.1-ci bəndinin icrasının təmin edilməsi məqsədi ilə Nazirlər Kabineti "Azərbaycan Respublikası Təhsil Nazirliyinin strukturuna daxil olmayan qurumların Siyahısı"nın təsdiq edilməsi haqqında" qərar qəbul etmişdir.

Qərar iyulun 15-dən qüvvəyə minmişdir.

Konstitusiyanın 119-cu maddəsinin dördüncü abzasına əsasən Nazirlər Kabineti özünün 2007-ci il 6 aprel tarixli qərarı ilə təsdiq edilmiş "Büdcə ili ərzində vahid xəzinə hesabında olan vəsaitin qalığının (sərbəst qalığın) idarəetməyə verilməsi Qaydaları"nda dəyişikliklər edilməsi barədə" qərar qəbul etmişdir.

Dövlət büdcəsindən maliyyələşən idarə, müəssisə və təşkilatlar tərəfindən xidməti minik, xüsusi təyinatlı və digər avtonəqliyyat vasitələrinin alınması və istismarı zamanı büdcə vəsaitlərinin səmərəli istifadə olunmasını təmin etmək, bu sahədə nəzarəti gücləndirmək və normativ hüquqi bazanı təkmilləşdirmək məqsədi ilə Nazirlər Kabineti "Azərbaycan Respublikasında dövlət büdcəsindən maliyyələşən idarə, müəssisə və təşkilatlarda nəqliyyat vasitələrindən istifadə qaydalarının təkmilləşdirilməsi haqqında" qərar qəbul etmişdir.

Konstitusiyanın 119-cu maddəsinin səkkizinci abzasına əsasən Nazirlər Kabineti "Azərbaycan Respublikası vergi orqanlarının bəzi məsələləri haqqında" özünün 2010-cu il 25 noyabr tarixli qərarında dəyişikliklər edilməsi barədə qərar qəbul etmişdir.

Hər üç qərar iyulun 18-dən qüvvəyə minmişdir.

Nazirlər Kabinetinin mətbuat xidmətindən AzərTAc-a verilən məlumata görə, bu qərarların tam mətni ilə Nazirlər Kabinetinin www.cabmin.gov.az ünvanlı internet saytında və Azərbaycan Respublikasının Qanunvericilik Toplusunda tanış olmaq mümkündür.

Azərbaycan.- 2011.- 20 iyul.- S.3.