Bakıda "Müdafiə Nazirliyi və Parlament əlaqələri" mövzusunda ikigünlük seminar keçirilir

İyulun 20-də Bakıda "Müdafiə Nazirliyi və Parlament əlaqələri" mövzusunda ikigünlük seminar başlamışdır.

Corc Marşal adına Avropa Təhlükəsizlik Araşdırmaları Mərkəzi mütəxəssislərinin aparacaqları seminar Azərbaycanın Müdafiə Nazirliyi və ABŞ-ın Avropa Komandanlığı arasında imzalanmış "Hərbi əməkdaşlıq üzrə iş planı"na uyğun təşkil olunmuşdur.

Müdafiə Nazirliyinin mətbuat xidmətindən AzərTAc-a bildirmişlər ki, seminarda hərbi-mülki əlaqələr, silahlı qüvvələrə demokratik nəzarət, hərbin rolu, hərbi peşəkarlığın özəlliyi, hərbi sahədə parlament nəzarəti və digər mövzularda müzakirələr aparılacaqdır.

Tədbirdə Müdafiə Nazirliyinin, Prezident Administrasiyasının, Milli Məclisin, ölkənin güc strukturlarının və digər nazirliklərin nümayəndələri iştirak edirlər.

Azərbaycan.-2011.-21 iyul.- S.2.