Bizi qələbəyə və ucalıqlara aparan yol

Çox hörmətli, zati-aliləri cənab İlham Əliyev!

Biz - Füzuli rayonu ictimaiyyətinin nümayəndələri cəbhə bölgəsində yaşayan əhaliyə göstərdiyiniz hədsiz qayğı və diqqətə, son dərəcə isti və doğma münasibətə görə bütün rayon sakinləri adından Sizə minnətdarlığımızı bildiririk.

Cənab Prezident! Sizin dəfələrlə cəbhə bölgəsinə etdiyiniz səfərlər, çətin günlərdə, bərk ayaqda yanımızda olmağınız bizə sözün həqiqi mənasında həyat eşqi vermiş, işğal altındakı torpaqlarımızın tezliklə azad ediləcəyinə olan inamımızı birə min artırmış, bölgənin bütün əhalisini böyük Qələbəyə səfərbər etmişdir. Bu yerləri müharibənin od-alovu iki dəfə yandırıb xarabaya çevirmişdir. Ermənistan silahlı qüvvələri Füzulini işğal edəndə hər yeri yandırıb külə döndərdilər. Sonra Milli ordumuz Horadizi və ona yaxın xeyli ərazini işğaldan azad etdi. Sizin son dərəcə böyük köməyiniz sayəsində müharibənin xarabalıqları üzərində Horadiz adlı bir şəhər ucaldıldı. Gözəl və yaraşıqlı, müasir sosial obyektlərə, hər cür infrastruktura malik bu şəhər məhz Sizin Füzuli camaatına çox böyük hədiyyənizdir.

Cənab Prezident! Sizin böyük səmimiyyətiniz və qayğınız bizdə ruh yüksəkliyi yaradıb. Öz vətəndaşına münasibətdə humanist, qayğıkeş və mehriban, prinsipial, müdrik və uzaqgörən olan Prezidentimizlə qürur duyuruq. Siz ulu öndər Heydər Əliyevin başladığı işləri bu gün uğurla davam etdirirsiniz. Bu siyasi kursa biz də həmişə sədaqətli olmuşuq. Bu gün də hamımız Sizinləyik.

Cənab Prezident! El gözü tərəzidir. Rəhbərlik etdiyiniz dövlətin gündən-günə artan iqtisadi imkanları məqsədli şəkildə bizim yaxşı yaşamağımıza, firavan dolanışığımıza xidmət edir. Bölgəmizdə Tibb mərkəzinin, Olimpiya idman kompleksinin, analoqu olmayan Muğam Mərkəzinin, yeni məktəblərin, xəstəxanaların tikilib istifadəyə verilməsi, yaşayış məntəqələrinin sürətlə qazlaşdırılması, yeni su xətlərinin çəkilişi Sizin qayğınızın böyüklüyündən xəbər verir. "Füzuli rayonunun sosial-iqtisadi inkişafının sürətləndirilməsinə dair əlavə tədbirlər haqqında" imzaladığınız 13 iyul 2011-ci il tarixli Sərəncam bölgədə əsl bayram əhvali-ruhiyyəsi yaratmışdır. Sərəncama əsasən 16 min nəfər əhalinin yaşadığı 8 yaşayış məntəqəsini birləşdirən Əhmədbəyli-Alxanlı-Zobucuq avtomobil yolunun tikintisi və yenidən qurulması üçün dövlət büdcəsindən 7 milyon manat vəsait ayrılmışdır.

Cənab Prezident! Sizin təşəbbüsünüzlə həyatımızı gözəlləşdirməyə hesablanan bütün layihələr uğurla həyata keçirilir. İndi isə növbədə yoldur. Yol həyat deməkdir. Hər şey yoldan başlanır. Bizim heç vaxt dəyişməyən bir yolumuz var. O, ulu öndərimiz Heydər Əliyevin yoludur. Zaman-zaman bu yolda bizə çoxlu maneələr də yaradıblar. Bu yolda büdrəsək də, yıxılmamışıq. Bu, çətin və eyni zamanda çox şərəfli yoldur. Biz Qələbəyə məhz bu yolla çatacağıq!

Cənab Prezident! Bu şərəfli yolda bələdçimiz, istiqamət verənimiz Sizsiniz. Biz Sizinlə güclüyük, hər şeyə qadirik. Ölkəmizə, bölgəmizə gətirdiyiniz yeniliklərə, uğurlara görə qürur hissi keçirir, Vətənin yüksəlişi naminə gördüyünüz böyük işlərə görə Sizə minətdarıq. Sizə yeni-yeni uğurlar arzulayırıq.

Füzuli rayon ictimaiyyətinin nümayəndələri adından:

Zakir Əliyev - Yuxarı Kürdmahmudlu kənd sakini

Qəhraman Abdullayev - Alıxanlı kənd sakini

Vəfa Süleymanova - Əhmədalılar kənd sakini

Aslan Aslanov - Bala Bəhmənli kənd sakini

Almaz Həşimova - YAP Füzuli rayon təşkilatının sədri

Mənsum Əliyev - Böyük Bəhmənli kənd sakini

Fəxrəddin Həsənov - Üçüncü Zobucuq qəsəbəsinin sakini

Soltan Rüstəmov - Aşağı Kürdmahmudlu kənd sakini

Əli Mustafayev - Horadiz şəhər sakini

Vaqif Hacıyev - Alıxanlı kənd sakini

Azərbaycan.- 2011.- 22 iyul.- S.1.