Türkiyəli jurnalistlər Şamaxıda Türk şəhidliyi kompleksində və Cümə məscidində olmuşlar

Azərbaycanda səfərdə olan Türkiyənin aparıcı kütləvi informasiya vasitələrinin nümayəndələri Bakı-Şamaxı yolu yaxınlığında yerləşən Türk şəhidliyi kompleksini ziyarət etmişlər.

Türkiyəli jurnalistlər Türk şəhidliyi kompleksindəki məzarın üzərinə gül dəstələri düzmüşlər.

Milli Məclisin deputatı Qənirə Paşayeva qonaqlara Azərbaycanın istiqlal mübarizəsi, Qafqaz İslam Ordusunun köməyi ilə torpaqlarımızın bolşevik və daşnak qüvvələrindən azad edilməsi, bu ərazidə gedən döyüşlər və şəhidlik kompleksinin tarixi barədə məlumat vermişdir. Bildirmişdir ki, burada 1918-ci ildə Azərbaycan torpaqları uğrunda canından keçmiş Qafqaz İslam Ordusunun minbaşısı (mayoru) İzzət Əfəndi dəfn edilmişdir.

Şamaxı Rayon İcra Hakimiyyəti başçısının müavini Əşrəf Şükürov qeyd etmişdir ki, ötən əsrin 30-cu illərində buradakı məzarın bərpasına cəhd göstərən Şamaxı sakini ailəsi ilə birlikdə güllələnmişdir. Bildirilmişdir ki, xalqımızın ümummilli lideri Heydər Əliyev 1970-ci illərdə məzarın dağıdılması ilə bağlı göstərilən cəhdlərin qarşısını qətiyyətlə almışdır.

Sonra türkiyəli jurnalistlər 1918-ci ildə Şamaxıda erməni daşnakları tərəfindən törədilmiş soyqırımının izlərini hələ də özündə saxlayan Cümə məscidində olmuşlar. Məlumat verilmişdir ki, 1918-ci il qırğınları zamanı qətlə yetirilən şamaxılılardan min nəfəri Cümə məscidinə doldurularaq yandırılıb məhv edilmişdir. Həmin faciəni sübut edən yanıq izləri hələ də məscidin divarlarında qalır.

Görüşdə iştirak edən Türkiyənin "Radikal", "Hürriyyət", "Todays Zaman", "Zaman", "Milliyyət" və "Haber Türk" kimi nüfuzlu qəzetlərinin nümayəndələri ətraflı məlumata görə təşəkkürlərini bildirmiş, eşitdiklərini və gördüklərini insanlıq əleyhinə dəhşətli cinayət kimi qiymətləndirmişlər.

Azərbaycan.- 2011.- 22 iyul.- S.3.