Milli Məclisdə görüş

Azərbaycanda səfərdə olan Polşa Respublikasının Prezidenti Bronislav Komorovski iyulun 25-də Milli Məclisə gəlmişdir.

Parlamentin binası önündə ali qonağı Milli Məclisin Sədri Oqtay Əsədov və digər rəsmi şəxslər qarşıladılar.

Polşa dövlətinin başçısı əvvəlcə Milli Məclisin iclas salonuna baxdı, parlamentin binasındakı Heydər Əliyev Xatirə zalı ilə tanış oldu.

Sonra Prezident Bronislav Komorovski ilə Milli Məclisin Sədri Oqtay Əsədovun görüşü keçirildi.

O.Əsədov bildirdi ki, Azərbaycan müstəqilliyini bərpa etdikdən sonra iki ölkə arasında geniş əlaqələr qurulmuşdur. Dövlət başçılarının müxtəlif dövrlərdə səfərləri zamanı imzalanmış sənədlər qarşılıqlı münasibətlərin daha da möhkəmlənməsinə xidmət etmiş, əlaqələrin inkişafı dinamik xarakter almışdır. Cənubi Qafqazda həyata keçirilən qlobal layihələrin fəal iştirakçısı olan Azərbaycan Avropanın enerji təhlükəsizliyinə mühüm töhfələr verir. Təkcə neft-qaz sahəsində deyil, qeyri-neft sektorunda da əməkdaşlığı dərinləşdirmək üçün geniş imkanlar vardır.

Parlamentlərarası əlaqələrin inkişafının əhəmiyyətindən danışan Milli Məclisin Sədri hər iki ölkənin qanunverici orqanında dostluq qruplarının olmasını müsbət dəyərləndirmiş, onların fəaliyyətinin daha da canlandırılmasının səmərəli əməkdaşlığın aparılmasına müsbət təsir göstərəcəyini söyləmişdir. O bildirdi ki, Avropa İttifaqının Tvinninq layihəsi çərçivəsində Milli Məclislə Polşa Seymi arasında əməkdaşlıq qurulmuşdur. Biz nüfuzlu beynəlxalq təşkilatlar çərçivəsində də əməkdaşlıq edirik.

Dağlıq Qarabağ problemindən bəhs edən O.Əsədov dedi ki, bu münaqişə regionun siyasi və iqtisadi inkişafına, Avratlantik məkana inteqrasiya proseslərinə ciddi maneələr yaradır. Biz problemin beynəlxalq hüquq normalarına uyğun, Azərbaycanın ərazi bütövlüyü çərçivəsində ədalətli həllinin tərəfdarıyıq. İnanırıq ki, beynəlxalq birliyin, o cümlədən Polşanın dəstəyi sayəsində bu problem tezliklə aradan qalxacaqdır.

Prezident Bronislav Komorovski Azərbaycanın müstəqillik dövründə əldə etdiyi nailiyyətləri çox yüksək dəyərləndirdi. O dedi ki, Azərbaycanın belə sürətlə inkişaf etməsi düşünülmüş iqtisadi siyasətin məntiqi nəticəsidir. Ali qonaq Bakı ilə Varşava arasında münasibətlərin dərinləşməsinin günün tələbi olduğunu vurğuladı.

Prezident bildirdi ki, Polşa təkcə energetika sahəsində deyil, qeyri-neft sektorunda da Azərbaycanla əməkdaşlığın dərinləşməsində maraqlıdır. O, 20 il Polşa qanunverici orqanının deputatı olduğunu xatırlatdı, parlamentlərin dövlətlərarası münasibətlərin inkişafında xüsusi rol oynadığını bildirdi.

Görüşdə qarşılıqlı əlaqələrin inkişaf perspektivləri, regional münaqişələrin həlli yolları, parlamentlərarası əməkdaşlığın inkişafı və digər məsələlər ətrafında fikir mübadiləsi aparıldı.

AzərTAc

Azərbaycan.- 2011.- 26 iyul.- S. 4.