"Beyləqan"la Beyləqana səyahət

Vəsimə İsmayılqızının "Beyləqan" adlı ensiklopedik toplusu nəfis tərtibatla, orijinal üslubda nəşr olunmuşdur. Kitab 11 bölmədən ibarətdir. Bölmələr mövzusunun ruhuna uyğun məqalə, şəkil, xəritə, sxem və cədvəllərlə zənginləşdirilmişdir. Müəllif hər bir məqaləni bir elmi mənbə səviyyəsində təqdim edir. Məqalələr kitabın tələbatına uyğun olaraq yığcam, lakonik üslubda tərtib olunsa da, özünün məna dərinliyi, məzmun dolğunluğu ilə oxucu tələbatını tam ödəyir. Kitabın tərtibi zamanı diyarın qədimliyini büruzə verən əlamətlərdən biri də bir sıra fotoşəkillərin, xəritələrin və sxemlərin orijinalda olduğu kimi ağ-qara təsvirdə verilməsidir.

Beyləqan keşməkeşli tarixə malik olan diyarlarımızdandır. Müəllif bölgənin tarixini peşəkar tarixçilərə məxsus səriştə ilə təqdim edir. Kitabda hər məqaləni oxuduqca göz önündə Mil düzünün, bütövlükdə Azərbaycanın, qədim Turan ellərinin zəngin təbiəti, iqlimi, maddi sərvətləri, mənəvi dəyərləri, məğrur insanları canlanır.

Kitabda yer alan tarixi şəkillər adamı ötən əsrə aparır. Ümummilli lider Heydər Əliyevin Beyləqan rayonuna səfərlərini əks etdirən fotolar və məqalələr isə bugünkü Beyləqanın firavan və əzəmətli günlərinin başlanğıcı kimi diqqət mərkəzinə gəlir.

Prezident İlham Əliyevin Beyləqan səfərləri isə regiona dövlət qayğısının təzahürü kimi böyük qürur hissi ilə qələmə alınmışdır. Belə səfərlərdə ölkə Prezidenti Azərbaycan Respublikası regionlarının sosial-iqtisadi inkişafına dair Dövlət Proqramının və digər dövlət proqramlarının həyata keçirilməsi, regionun infrastrukturunun genişləndirilməsi istiqamətində beyləqanlılara yaxın dövlət dəstəyinin olduğunu dəfələrlə vurğulamışdır.

Kitabın diqqətçəkən və maraqlı bölmələrindən biri də Beyləqanın mənəvi sərvəti olan insanlarına ayrılmış "Şəxsiyyətlər" adlanır. Bu bölmə öz əməlləri ilə yurda şöhrət gətirmiş şəxslərin fotoşəkillərindən və onlara həsr olunmuş məqalələrdən ibarətdir və bunlar çox əhəmiyyətlidir.

Dövlət siyasətinin həyata keçirilməsi üçün Çernobıl fəlakəti zamanı sağlamlıqlarını itirmiş şəxslər, İkinci Dünya müharibəsində iştirak etmiş, həlak olmuş, itkin düşmüş şəxslərin siyahısı kitabda xüsusi yer alır.

Kitabda oxucunun hisslərini kədərli notlar üstündə kökləyən bölmə isə "Qarabağ müharibəsi şəhidləri" adlanır. Bölməyə Beyləqan şəhidlərinin fotoşəkillərindən və onlara həsr olunmuş məqalələrdən ibarət qəhrəmanlıq qalereyası kimi baxmaq olar.

"Beyləqan folkloru", "Beyləqan mətbəxi", "Beyləqanın söz dünyası" bölmələrinin də kitaba daxil edilməsi əsərin dəyərini artırır. Vəsimə İsmayılqızı qələmindən ərsəyə gəlmiş, Beyləqana və beyləqanlılara ünvanlanmış bu əsər Azərbaycanın elm, sənət, təhsil, mədəniyyət və salnamə tarixində özünəməxsus yer tutacaqdır.

B.ƏZİZLİ

Azərbaycan.- 2011.- 1 iyun.- S. 7.