Göyün yeddinci qatında
"Azal" müstəqil Azərbaycanın
uğurlarını dünyaya car çəkir
Təyyarə bələdçisi xüsusi bir təbəssüm və nəzakətlə salona daxil olan sərnişinlərə yerlərini tapmaqda, əllərindəki əşya və yol çantalarını yerləşdirməkdə kömək edir. Bir azdan hamı bir nəfər kimi qoruyucu kəmərləri taxacaq, tavandakı xəbərdarlıq cihazları işıqlanacaq, enmə-uçuş zolağında "var-gəl edib yerini rahatlayan" hava gəmisinin mühərrikləri son dəfə var qüvvəsi ilə nərildəyərək ox kimi masmavi səmanın bağrına sancılacaqdı.
Bax beləcə, hər gün Azərbaycan Hava Yollarına məxsus təyyarələr mindən çox sərnişini dünyanın ən müxtəlif guşələrindəki ünvanlarına çatdırır. Təyyarəyə mindiyimiz andan hər birimiz "Azal"ın müştəridən daha çox "ev"inə təşrif buyurmuş əziz qonağına çevrilirik. Və bu evdə sənin məhz əziz qonaq olduğunu, arzulanan şəxs olduğunu nümayiş etdirmək üçün əldən-ayaqdan gedirlər. Bəs necə, bugünkü ciddi rəqabət əsrində bazarın diktəsi mənfəətlə yanaşı, adi peşə nəzakəti, insani davranış mədəniyyəti məsələsini də aktuallaşdırıb.
Müstəqillik illərinin
aviasiyası
Bəlkə də bir qədər fəlsəfi səslənəcək, amma insan sosial varlıq olmaq etibarilə fərdiyyətçi və subyektivdir. Onun fərdi təsəvvürləri eşitdiklərindən daha çox gözləri ilə gördükləri, müşahidə etdikləri əsasında formalaşır. Əski sovet dönəmində müttəfiq respublika sakinlərinin güzəranı bir-birindən cüzi fərqlənirdi. Rifah göstəricisi olan avtomaşınların, istehlak mallarının çeşidi yekrəng idi. Aviasiyaya gəldikdə isə "doğma sosialist sənayesi" nə istehsal edirdisə, ona da qane olurduqEhava gəmiləri bu gün çoxumuza narahat və yöndəmsiz görünən "İl", "Tu", "YAK" təyyarələrindən, daxili naviqasiyada isə hətta "kukuruznik"lərdən ibarət idi. Bu gün isə...
Bu gün "Mən azərbaycanlıyam!" fəxarətini qürurla daşıyan hər bir ölkə vətəndaşı bilir ki, ulu öndər Heydər Əliyevin Azərbaycan qarşısında, Azərbaycan xalqı və milləti qarşısında ən böyük xidmətlərindən biri bu ölkənin deklarativ müstəqilliyini onun həqiqi müstəqilliyinə çevirə bilməsi oldu. Məhz belə bir müstəqillik Azərbaycana çox şey bəxş etdi, onu böyük uğurların sabit limanına çevirdi. Aviasiyadan söhbət düşmüşkən deyək, məgər bu gün dünyanın ən məşhur paytaxtlarının, böyük şəhərlərinin hava limanlarında Azərbaycanın üçrəngli bayrağının rənginə bələnmiş ən müasir hava laynerlərini görəndə köksümüz öz ölkəmizdən yana keçirdiyimiz qürur duyğusundan qabarmırmı? Gəlin etiraf edək, bu gün Heydər Əliyev Beynəlxalq Aeroportu ilə şəhər mərkəzini birləşdirən və ulu öndərin adını daşıyan prospektdən dünyanın hansı ölkəsində var?
Heç şübhəsiz, müstəqillik illəri Azərbaycan nəqliyyat sisteminin çox vacib qollarından biri, bəlkə də birincisi və belə demək mümkünsə, elitarı sayılan hava nəqliyyatının da inkişafına möhkəm təkan vermişdir. Bəlkə də "Azərbaycan Hava Yolları"nın son iki onillikdə keçdiyi yolu MDB-li "həmkarları" heç yaxın onilliklərdə də qət edə bilməyəcəklər. Bu, mübaliğə deyil, müqayisəli fakt və rəqəmlərdə özünü daha bariz və qabarıq şəkildə ortaya qoyan canlı gerçəklikdir. Dövlət qayğısının və mükəmməl idarəetmənin bariz təzahürüdür. Və belə bir irəliləyişin, liderlik ampluasının obyektiv-zəruri şərtləri vardır. Belə ki, müstəqil Azərbaycanın ulu öndər Heydər Əliyevin adı ilə bağlı olan tarixi ciddi ictimai-siyasi təbəddülatlar və sosial-iqtisadi sarsıntıların "köynəyindən" uğurla sıyrılıb çıxmış bir dövr idi. Tarazlı və düşünülmüş siyasi kurs, ölkənin milli mənafelərinə hesablanmış neft siyasəti və uğurlu iqtisadi islahatlar hər sahədə inkişafı, irəliləyişi qaçılmaz edirdi. Belə bir şəraitdə Azərbaycanın Qərbə çıxışı bir qədər bəsit şəkildə ifadə etsək, metro, taksi, qatarla deyil, təyyarə vasitəsilə reallaşdırılırdı. Ölkənin təyyarə parkı artıq sırf nəqliyyat vasitəsi olmaqla yanaşı, həm də bir simvol idi, Azərbaycanın siyasi iradə vasitəsilə qazanılmış iqtisadi qüdrətinin göstəricisi idi.
Azərbaycan Prezidenti İlham Əliyevin hakimiyyət illəri Azərbaycanın müstəqillik tarixinin ən coşqun inkişaf salnaməsini yazmaqdadır. Bu salnamədə "Azərbaycan Hava Yolları" Qapalı Səhmdar Cəmiyyətinin fəaliyyətinin məxsusi səhifələri vardır. Əgər Azərbaycanın inkişaf mənzərəsini tək elə bir sahənin inkişaf tempi ilə ifadə etmək zərurəti yaransa idi, nümunə qismində "Azal"ın nailiyyətlərini təqdim etmək yetərli sayılardı.
Azərbaycan Respublikası 1992-ci il oktyabrın 9-da Beynəlxalq Mülki Aviasiya Təşkilatının (İCAO), 2002-ci ilin noyabr ayından isə Avropa Mülki Aviasiya Konfransının üzvüdür. Hazırda 29 dövlətlə hava əlaqəsi barədə hökumətlərarası razılaşma imzalanıb, 22-si ilə razılaşma ekspertlər səviyyəsindədir. 12 ölkə ilə belə razılaşmanın əldə edilməsi barədə işgüzar danışıqlar aparılır. Bütövlükdə Azərbaycan mülki aviasiya üzrə 22 beynəlxalq konvensiyaya qoşulub.
"Azal" müstəqil Azərbaycanın mülki aviasiyasının öncülü olmaqla fəaliyyət göstərdiyi ötən illər ərzində əldə etdiyi zəngin təcrübə və peşəkarlıq sayəsində daxili və xarici aviadaşımaların həyata keçirilməsində özünü etibarlı tərəfdaş kimi tanıtmışdır. Bu məqam QSC-nin prezidenti Cahangir Əsgərovun öz fəaliyyətində qarşıya qoyduğu başlıca prioritetlərdəndir və bu gün ortada olan konkret nəticələr həmin konsepsiyanın müvəffəqiyyətlə həyata keçirildiyindən xəbər verir.
Bu gün qanadlarında Azərbaycanın üçrəngli bayrağını daşıyan "Azal" dünyanın 14 ölkəsinə, o cümlədən 26 şəhərə müntəzəm uçuşlar həyata keçirir. Azərbaycana isə 15 ölkənin 33 şəhərindən 19 şirkət tərəfindən aviareyslər reallaşdırılır. "Azərbaycan Hava Yolları"nın dünyanın 12 ölkəsində nümayəndəliyi fəaliyyət göstərir.
Müstəqillik illərində respublikanın hava nəqliyyatı da sürətlə inkişaf etmişdir. Əgər 1996-cı ildə respublikanın hava parkı "B-727-235", "B-707", "Tu-154" və "Tu-134", "An" tipli təyyarələrdən ibarət idisə, 1997-ci ildən bəri aviaparkımız 10 ədəd "Airbus-320" və "319", 7 ədəd "ATR", dörd ədəd "Gulfstream",
3 ədəd
"Cessna" və 6 ədəd "Boeinq" tipli təyyarələrlə
zənginləşmişdir. 15 ədəd ən modern "Eurocopter", "Super
Puma", "Mi", "Sikorsky" helikopterləri
alınmışdır.
Əməkdaşlıq həm də inteqrasiya deməkdir
Azərbaycanın artan
iqtisadi qüdrəti, tərəfdaş ölkələrlə
ticari-mədəni əlaqələrin yüksələn
tempi, respublikamızın turizm imkanlarının genişlənməsi
ölkəmizi bütün dünya üçün cəlbedici
məkana çevirməkdədir ki, bu da milli hava yolları
üçün yeni-yeni əməkdaşlıq imkanları,
təzə marşrutlar deməkdir. Mart ayının 18-dən
Bakı-İzmir-Bakı marşrutu üzrə yeni reys
açılmış, ayın 28-dən isə
Bakı-Kiyev-Bakı müntəzəm reysi bərpa
edilmişdir. Uçuşlarının
coğrafiyasını genişləndirən "Azal"
mayın 16-dan etibarən Simferopol-Bakı reysini istismara
buraxmışdır. Ümumiyyətlə, may ayı yeni reyslərin istismara verilməsi
baxımından məhsuldar olmuşdur. Belə
ki, ötən ay bir həftə intervalla Türkiyənin
"Azal"ın
beynəlxalq hava nəqliyyatı bazarındakı peşəkar
və etibarlı tərəfdaş imici dünyanın məşhur
aviaşirkətləri tərəfindən lazımınca dəyərləndirilir. Belə ki,
aprel ayının əvvəlindən etibarən Azərbaycan
Hava Yolları ilə BMİ aviakompaniyası arasında əldə
olunmuş razılığa əsasən Londonla (Hitrou
aeroportu) Bakı arasında hava gəmilərinin birgə
istismarı həyata keçirilir. Bu
razılaşma hər iki paytaxtın sərnişinlərinə
rahat "Airbus" A319 və A320 təyyarələri ilə
həftəlik 10 reys təklif etmək imkanı
yaratmışdır. Bir qədər əvvəl
Fransanın "Air Franse" (Şarl de Qoll aeroportu)
aviaşirkəti ilə bağlanmış analoji müqavilə
Sena sahilindəki Parislə Xəzərə
sığınmış Bakı arasında həftədə
üç reys həyata keçirməyi mümkün
etmişdir.
"Azal"ın həm
professional, texniki baxımdan, həm də imic olaraq
qarşısında duran ən böyük məqsədlərindən
biri uzaq məsafələrə, məsələn, ABŞ-a uçuşları həyata keçirməkdir.
Bunun üçün müəyyən audit prosedurlarından
keçmək lazım gəlir. Hazırda bu
prosesə planauyğun hazırlıq işləri gedir. Azərbaycanlı şahinlər ümid edirlər
ki, 2014-cü ildə Amerikanın hava məkanını fəth
edə biləcəklər. Nə
üçün məhz üç ildən sonra? Belə ki, Azərbaycan tərəfi məhz həmin
tarixdə iki ədəd "Boeinq-787" drimlaynerini almaq barədə
fəal danışıqlar aparır. Qürurverici
faktdır ki, MDB məkanında ilk dəfə məhz Azərbaycan
"arzuların layneri" adlandırılan bu cür
supermüasir, dünyanın ən inkişaf etmiş ölkələrinin
malik olduğu hava gəmilərini öz aviaparkına daxil edəcəkdir.
Ölkənin hava məkanına daxil olacaq yeni təyyarələr,
heç şübhəsiz, Yer kürəsinin ən müxtəlif
ünvanlarına yeni uçuşlar, yeni əlaqələr,
Azərbaycanın dünyaya yenidən tanıdılması sahəsində
növbəti addım olacaqdır.
Yeni təyyarələr
bu gün müasirlik və sürətlə yanaşı, həm
də uçuşların təhlükəsizliyi
anlayışını aktuallaşdırır. Çünki
səmaya qalxan hər təyyarənin arxasınca yüzlərlə
nigaran göz baxır, yüzlərlə insan ən müxtəlif
dillərdə sağ-salamat yerə enmək üçün
dualar edir. Və dünyanın hansı
guşəsində yerə enməsindən asılı
olmayaraq, sərnişinlər bir qayda olaraq pilotlara təşəkkürlərini
alqışları ilə çatdırırlar. Bu mənada, "Azərbaycan Hava Yolları" QSC
müasir təyyarələrin alınmasını həm də
məhz təhlükəsizlik baxımından prioritet kimi dəyərləndirir.
Sərnişinlərə xidmətin səviyyəsini yüksəltmək
və aviaparkı beynəlxalq standartlar səviyyəsində
komplektləşdirmək məqsədilə fevral ayında
altı ədəd hər biri 174 yerlik "Aerobus-320" təyyarəsi
alınmışdır. Daha bir ədəd bu tip təyyarə
ölkəmizə bu gün - Mülki Aviasiya
İşçilərinin Peşə Bayramı Günü gətirilir.
Yenə də iyun ayında Azərbaycanın
hava məkanında 198 yerlik "Boeinq 767-300-ER" layneri vətəndaşlıq
hüququ qazanacaqdır. Eynitipli ikinci belə
bir təyyarənin alınması isə gələn ilə
planlaşdırılır.
Müstəqilliyin geridə
qalan son 20 ili Azərbaycanın mülki aviasiyasının
infrastrukturunun, material-texniki bazasının inkişaf və
formalaşma mərhələsi kimi xarakterizə edilə bilər.
Bura həm regionlarda müasir standartlara cavab verən
beynəlxalq aeroportların inşa edilməsini, həm yeni,
rahat və təhlükəsiz laynerlərin
alınmasını, eləcə də yeni marşrutların
istismara verilməsini aid etmək olar.
Ölkə
Prezidenti İlham Əliyevin regionların sosial-iqtisadi
inkişafı ilə bağlı həyata keçirdiyi
kompleks tədbirlərin nəticəsi olaraq bölgələrin
xarici iqtisadi əlaqələrdə, eləcə də beynəlxalq
daşımalarda iştirakının həcmi əhəmiyyətli
dərəcədə artır. Məsələn,
respublikanın cənub bölgəsinə diqqətin
artması Lənkəran aeroportunu "darıxmağa"
qoymur. Hazırda bu şəhərlə
Moskva arasındakı hava əlaqəsini bir neçə
aviaşirkət həyata keçirir. Gəncədən
Moskva, Sankt-Peterburq, Kiyev, Naxçıvan və Bakıya sərnişin
reysləri həyata keçirilir. Bütün
bunlar nəyin göstəricisidir? Deməli,
Prezident tərəfindən düzgün yönəldilmiş
iqtisadi siyasət bölgələrin sosial mənzərəsini,
əhalinin rifah halını yaxşılaşdırmaqla
yanaşı, nəqliyyat infrastrukturunun inkişafına da təkan
verir.
Sevindirici
faktdır ki, bu ilin fevral ayında Avropa İqtisadiyyat
Palatası (EEİG) Direktorlar Şurasının yekdil qərarı
ilə "Azərbaycan Hava Yolları" Qapalı Səhmdar
Cəmiyyəti Qızıl dərəcəli Avropa Xidmət
Standartına layiq görülmüşdür. Belə bir
yüksək qiymət yalnız seçilmiş, nümunəvi
kompaniya tələblərinə cavab verən, yüksək
keyfiyyətli xidmət göstərən müəssisələrə
verilir. Hazırda "Azal" MDB
aviakompaniyaları arasında lider statusunu qoruyub saxlayır və
Beynəlxalq Hava Nəqliyyatı Assosiasiyasında (İATA)
Milli Aviadaşıyıcı kimi layiqli yer tutur.
Heç
şübhəsiz, bu məsələdə
uçuşların təhlükəsizlik səviyyəsinin
artması və regionda ən yaxşı aeronaviqasiya sisteminin
məhz bizdə olması da öz sözünü deyir. Heydər Əliyev
Beynəlxalq Aeroportu BMAT təsnifatı üzrə ən
yüksək - üçüncü kateqoriyaya layiq
görülmüşdür. Bu o deməkdir
ki, Bakıda istənilən hava şəraitində, istənilən
tip hava gəmisi enə bilər.
"Dünyanın ən gözəl aeroportu Bakıda
olacaqdır"
Sirr deyil ki,
dünyanın hər bir yerində olduğu kimi, bizdə də
təyyarənin trapından ayağını Azərbaycan
torpağına basan əcnəbinin paytaxtımız, ölkəmiz,
mədəniyyətimiz haqqında ilk təəssüratları
aeroport binasında formalaşır. Və bəzən bu təəssüratı
sonradan dəyişmək də çox çətin olur.
Bakıda beynəlxalq standartlara cavab verən ilk aerovağzal
kompleksi ulu öndər Heydər Əliyevin təşəbbüsü
ilə 1999-cu ildə inşa olunmuş, qısa bir müddət
ərzində uçuş-enmə zolaqları və yönəldici
yollar yenidən qurulmuş, uçuşları idarəetmə
sistemləri, radionaviqasiya və meteoavadanlıqlar müasirləri
ilə əvəz edilmiş, uçuşların təhlükəsizliyini
və rahatlığını təmin edən silsilə tədbirlər
reallaşdırılmışdır. Bu gün böyük fəxrlə
ulu öndərin adını daşıyan aeroport binası
memarlıq həlli, texniki təchizatı ilə MDB məkanındakı
analoqlarını bir boy qabaqlasa da, ölkənin müasir
inkişaf tempi ilə, Prezident İlham Əliyevin milli
aviasiyanın inkişafına ayırdığı prioritet
mövqe ilə ayaqlaşa bilmir. Bu ilin mart ayında yeni
aerovağzal kompleksinin tikintisinə başlanması ilə
bağlı ali Prezident iradəsi məhz
belə bir ehtiyacdan doğan zərurət kimi dəyərləndirilə
bilər.
Təməlqoyma
mərasimində iştirak edən dövlət
başçısı demişdir ki, iki ildən sonra
Bakıda yeni, gözəl və əzəmətli aeroport
istifadəyə veriləcəkdir. İndiki aeroport
artıq Azərbaycanın inkişafına uyğun deyildir.
Azərbaycan sürətlə inkişaf edir,
ölkəmizə gələnlərin sayı artır. Beləliklə, yeni və daha müasir aeroportun
tikintisinə böyük ehtiyac var idi və çox istəyirik
ki, bu aeroport həm funksional baxımdan, həm də gözəlliyi
ilə seçilsin. Əminəm ki,
dünyanın ən gözəl aeroportu məhz Bakıda
olacaqdır.
Yeni
aerovağzalın tikilməsində məqsəd sərnişin
və yükdaşımalarla bağlı xidmətin səviyyəsini
daha da yüksəltmək, həmçinin
uçuşların təhlükəsizliyini dünya
standartlarına uyğunlaşdırmaqdır. Əgər bu
gün "Azal" gündə 2500-3000-ə yaxın sərnişin
daşıyırsa, yeni layihə həyata keçirildikdən
sonra bu rəqəm üç dəfə artaraq ildə 3
milyon sərnişin təşkil edəcəkdir. 1995-ci
ildə "Azal"ın təyyarələri ilə 29 min ton
yük daşınmışdısa, ötən il bu göstərici 51 min ton olmuşdur. Və
sahə mütəxəssislərinin hesablamalarına görə,
2010-2029-cu illərdə dünya aviasiya bazarında sərnişin
və yük aviatrafiki müvafiq olaraq 5,3 və
5,9 faiz artacaqdır. Bu isə aviakompaniyalar
üçün milyardlarla mənfəət deməkdir.
Bakıda yeni aerovağzalın tikintisi "Azərbaycan
Hava Yolları" QSC-yə həmin layihənin fəal
iştirakçıları sırasında olmağa imkan
yaradacaqdır.
Milli və
modern memarlıq elementlərinin sintezi əsasında
üçbucaq formasında inşa ediləcək dördmərtəbəli
yeni aerovağzal binası istifadəyə verildikdən sonra
buradan beynəlxalq reyslər yerinə yetiriləcəkdir. Yeni terminalda
18 eskalator və 20 sərnişin lifti quraşdırılacaq,
beynəlxalq aviasiyada istifadə olunan ən son elmi-texniki
yeniliklər tətbiq ediləcəkdir. Aerovağzal
binasının ərazisində eyni vaxtda səkkiz təyyarəni
qəbul edə biləcək teleskopik traplar olacaqdır.
Mövcud terminal da tam müasirləşdiriləcək,
buradan yerli aviareyslər həyata keçiriləcəkdir.
Beşmərtəbəli
Uçuşları İdarəetmə Mərkəzinin
binasında ən son texnologiyalara əsaslanan meteoroloji radar
sistemləri quraşdırılacaq, uçuş-enmə
zolağının eni və uzunluğu dünyanın ən
böyük aerobuslarını qəbul etməyə imkan verəcək,
perron və yönəldici yollar yenidən qurulacaqdır.
Aeroportun mürəkkəb nəqliyyat
infrastruktur kompleksi olmaqla yanaşı, həm də gözəl
bir memarlıq abidəsi, estetik vahid olduğuna diqqəti
yönəldən Prezident bu tikintidən nə gözlədiyi
barədə belə demişdir: "Hazırda Bakıda və
ölkəmizin digər şəhərlərində yeni
gözəl binalar tikilir. O binalar ölkəmizin
inkişafını göstərir. O binalar yeni Azərbaycanın
rəmzlərinə çevrilir. O cümlədən bu
aeroport - ölkəmizin giriş qapısı müasir Azərbaycanın
inkişafını və indiki vəziyyətini əks etdirməlidir.
Mən əminəm ki, Heydər Əliyev Beynəlxalq
Aeroportu dünya miqyasında öz gözəlliyi və
funksional keyfiyyətləri ilə seçiləcəkdir".
Bu gün Azərbaycanın
regionda lider statusunu təsbit edən faktorlar içərisində
iqtisadi qüdrəti, siyasi nüfuzu, zəngin karbohidrogen
ehtiyatları ilə paralel, transmilli geoiqtisadi maraqların kəsişməsində,
mühüm nəqliyyat dəhlizlərinin
qovşağında yerləşməsi də önəmli
rol oynayır.
Azərbaycan artıq nəinki Cənubi Qafqazda,
bütövlükdə Avrasiya məkanında ən müxtəlif
beynəlxalq tədbirlərə ev sahibliyi
edən əməkdaşlıq paytaxtına
çevrilmişdir. Ölkəmizin ərazisindən
keçən istər hava, avtomobil, istərsə də dəmir
və dəniz yolları, onların rahatlığına və
təhlükəsizliyinə yüksək zəmanət Azərbaycanın
və Bakının tranzit mərkəz kimi cəlbediciliyini
artırmışdır. Bunun nəticəsidir
ki, təkcə elə aviasiya vasitəsilə Bakı səmasından
daşınan yüklərin həcmi ilbəil artır.
Ümummilli lider Heydər Əliyev
deyirdi: "Azərbaycan Hava Yollarının ən
mühüm vəzifəsi uçuşların təhlükəsizliyini
təmin etməkdir". Təsadüfi deyil ki,
bu gün "Azal" tərəfindən tətbiq edilən
təhlükəsizlik standartları ən yüksək beynəlxalq
tələblərə cavab verir. Belə
bir optimist qənaət dünyada ən nüfuzlu mülki
aviasiya təşkilatı olan İCAO-nun ötənilki
auditinin nəticələrinə əsaslanır.
Hazırda QSC-nin rəhbərliyi və
işçi heyəti tərəfindən təhlükəsizlik,
uçuşların müntəzəmliyi, sərnişinlərə
xidmət mədəniyyəti və keyfiyyəti, habelə
dünya aviasiya ictimaiyyətinin gözündə
aviakompaniyanın ümumi imicinin möhkəmləndirilməsi
məqsədilə aviaşirkətin fəaliyyətinin təkmilləşdirilməsi
istiqamətində gündəlik və məqsədyönlü
iş aparılır.
Bu gün əminliklə
söyləmək olar ki, "Azərbaycan Hava Yolları"
Qapalı Səhmdar Cəmiyyətinin əldə etdiyi
uğurların fəlsəfəsi çox sadədir: dövlət
başçısının bu vacib sahəyə mütəmadi
qayğısı, ağıllı və praqmatik idarəetmə
və bir də insan kapitalı. Bəli, bu təşkilatda
ölkənin sənaye infrastrukturunun şox spesifik, unukal kadr
ehtiyatı cəmlənib. Burada hələ
sovet aviasiya məktəbinin sonuncu "mogikanları" ilə
çiyin-çiyinə milli təyyarəçilik məktəbinin
nümayəndələri də çalışır.
Azərbaycanda milli aviasiya kadrları
hazırlayan elm-təhsil ocağının
açılması müstəsna hadisədir. Hələ
ulu öndər Heydər Əliyev deyirdi ki: "Mən
xoşbəxtəm ki, Azərbaycan mülki aviasiyasının
öz milli kadrları - təyyarəçiləri, mühəndis
və mütəxəssisləri var və onlar bizim
aviasiyamızı gələcəkdə də inkişaf etdirəcəklər".
Milli Aviasiya
Akademiyası həqiqətən, Azərbaycanın müstəqilliyinin
nailiyyətlərindən biridir. Həmin təhsil
müəssisəsinə tanınmış alim, akademik Arif
Paşayevin rəhbərlik etməsi isə buradakı təhsilin,
elmi potensialın və maddi bazanın vəziyyəti barədə
ən səhih məlumatı verir. Bu gün dövlətlərarası
aviasiya komitəsinin mütəxəssislərin
hazırlanması və təkmilləşdirilməsinə
hüquq verən sertifikatına layiq görülmüş ali məktəbdə 2000 nəfərdən
artıq tələbə 20 ixtisas üzrə aviasiyanın
sirlərinə yiyələnir.
Sıralarında
altı min nəfərdən artıq aviasiya işçisini
birləşdirən şirkətdə texniki-iqtisadi göstəricilərin
yaxşılaşdırılması ilə yanaşı,
sosial məsələlərin həllinə də xüsusi
diqqət verilir. Aeroportun ərazisində fəaliyyət
göstərən müasir tibb müəssisəsi
uçuş və xidmət heyətinin
sağlamlığının keşiyində dayanıb.
Yaxın vaxtlarda Binə qəsəbəsindəki
Milli Aviasiya Akademiyasının yaxınlığında
"Aviator" şəhərciyi salınacaqdır. Bakının qələbəliyindən uzaq, rahatlıq,
estetika və təhlükəsizlik baxımından
bütün tələblərə cavab verən ilk
dördbloklu binada 120 aviator mənzillə təmin
olunacaqdır.
* * *
Bu gün Azərbaycanın mülki aviasiya işçilərinin peşə bayramıdır. Ölkə Prezidentinin 2006-cı il 18 may tarixli sərəncamı ilə hər il iyun ayının 2-si mülki aviasiya işçilərinin peşə bayramı günü kimi qeyd olunur. Dövlət başçısı aviasiya işçilərinin fədakar əməyini heç vaxt unutmur. Prezidentin 31 may tarixli sərəncamı ilə bu il də mülki aviasiyanın inkişafındakı xidmətlərinə görə altı nəfər "Tərəqqi" medalı ilə təltif edilmiş, beş nəfərə "Əməkdar pilot", bir nəfərə isə "Əməkdar mühəndis" fəxri adı verilmişdir.
Hələ uzaq 1938-ci ildə respublikamızda ilk aviasiya qrupu yaradılmışdı. O vaxtdan onillər keçib. Ölkəmiz inkişaf etdikcə onun aviasiya təsərrüfatı da simasını dəyişib, müasirləşib, modernləşib, müstəqil Azərbaycanın daha bir qürur və iftixar mənbəyinə çevrilib.
Xalid Niyazov,
Məhərrəm Səfərli,
"Azal"ın xidmət rəisi
Azərbaycan.- 2011.-2 iyun.- S. 2.