Dövlət başçısı gənclərin sürətlə irəliləməsinə yaşıl işıq yandırıb

Azərbaycan Respublikasının Prezidenti İlham Əliyevin müxtəlif sahələrdə uğurlar qazanmış bir qrup gənci və tələbə gənclər təşkilatlarının nümayəndələrini qəbul etməsi bütün gəncliyin tərəqqisində və intellektual mülkiyyətin dinamik inkişafında dönüş yarada biləcək əlamətdar hadisə idi. Prezidentin çıxışını dinlədikcə, ideyalarından danışan, təkliflərini verən gənclərə qulaq asdıqca 17 il bundan əvvəl ulu öndər Heydər Əliyevin Prezident Aparatında tələbələrlə təşkil etdiyi, iştirakçısı olduğum görüşü xatırladım.

Universitet müəllimi olsam da, yaşıma görə gəncəm. Lakin həyatımda baş verən çətinliklər, Qarabağ müharibəsindən keçən yeniyetməlik illərim, ölkəmizin tarixində və öz həyatımda baş verən hadisələr mənə bu iki tarixi görüş haqqında söz deməyə imkan verir.

1994-cü ildə Prezident Aparatında ulu öndər Heydər Əliyevin ali məktəblərə yüksək balla daxil olan tələbələrlə keçirdiyi görüşdə iştirak etmək mənə də nəsib olmuşdu. Onda artıq 3-cü il idi ki, tələbə qəbulunda test üsulu tətbiq edilirdi. Çıxış edənlərin bəziləri testin üstünlüyündən danışaraq, köhnə qəbul qaydaları olsaydı ali məktəbə girə bilməyəcəklərini etiraf etdilər. Ulu öndər bütün çıxışlara diqqətlə qulaq asdı, sonra isə soruşdu ki, yenə çıxış etmək istəyən varmı? Tribunaya işarə edərək dedi:

- Buyurun bu gün sizin üçün meydan yaranıb.

Mən Prezidentin dəvətindən cəsarətləndim, düşündüm ki, ali məktəbə müharibə gedən bölgədən qəbul olunan tələbə kimi belə yüksək tribunadan çıxış etməliyəm. Ulu öndərə müraciətlə birinci onu dedim ki, test üsulunun tətbiq olub-olmamasından asılı olmayaraq ali məktəbə girəcəyimi bilirdim. Orta məktəbi cəbhə bölgəsində - Tərtər rayonunda oxumuşam. Uşaqlığım müharibədə keçib. Bunları deməkdə məqsədim odur ki, oxumaq heç nəyə baxmır. Nə müharibə, nə də ki, digər çətinliklər məni kitabdan ayıra bilmədi, çalışdım, hazırlaşdım və ali məktəbə qəbul oldum.

Ulu öndər onda mənim çıxışımı maraqla dinləyirdi. İndi o illəri bir də xatırlayıram. Həqiqətən çətin idi, düşmən hər gün hücum edirdi, torpaqlarımız əldən gedirdi. Xəstəxanada yaralılara baş çəkirdik, şəhidləri görürdük.

20 il bundan əvvəl mənim kimi cəbhə bölgələrində yaşayan şagirdlərin əksəriyyəti daha çətin anlarla üzləşirdilər. Onların arasında məktəbləri dağılan, torpaqları işğal olunan, müəllimləri, qohum-qardaşı itkin düşən, yaralanan və həlak olan minlərlə gənc var idi. Bugünün gənc üçün mənim yaşıdlarımın başına gələnlər artıq keçmişdir. Çünkü onlar ata və qardaşlarını döyüşə yola salmırlar, müharibənin günahsız qurbanlarının hüzn mərasimlərini görmürlər.

İndi hökm sürən sakitliyin, atəşkəsin, inkişafın nə demək olduğunu biz bugünkü gənclər təbii ki, daha dərindən başa düşürük və ona daha çox sevinirik. Ona görə ki, biz müharibənin içində yaşamışıq.

Bu gün sabit, təhlükəsiz ölkədə yaşayan gənclərimiz, müasir dünya gündəmində baş verən prosesləri dərk etməli, ölkəmizdə hökm sürən əmin-amanlığın qədrini bilməklə yanaşı, dövlətimizi irəli aparan ideyalar haqda düşünməlidirlər.

Azərbaycanın müstəqilliyinə təhlükə törədən əksər amillər aradan götürülsə də, hələ ki, müharibə şəraitində yaşamaqda davam edirik. Vətənimizin uğurlarına qısqanclıqla yanaşan bir sıra antiazərbaycançı beynəlxalq güc mərkəzləri bu gün də ölkəmizin iqtisadi dayaqlarının və hərbi qüdrətinin zəifləməsi, daxili sabitliyin pozulması və yeni çaxnaşmaların yaranması üçün siyasi texnologiyalardan istifadə edirlər. Bu təhlükələri sovuşduran başlıca amil dövlət başçısının praqmatik siyasəti, ulu öndərdən əxz etdiyi böyük dövlətçilik təcrübəsini bütün istiqamətlərdə daha da geniş tətbiq etməsi ilə bağlıdır. Bütün dünyəvi dəyərlərə, demokratik prinsiplərə qətiyyətlə yanaşan cənab İlham Əliyev tükənməz enerji ilə ölkəmizin, regionun ən qüdrətli dövlətinə çevrilməsi üçün əzmlə çalışır. Bu səylər nəticəsində bölgədə ən güclü, mütəşəkkil və düşmənə qalib gələ bilən ordu quruldu.

Prezident İlham Əliyevin xarici siyasətdə də ulu öndərimiz tərəfindən müəyyənləşdirilmiş vahid strategiya və dəyişməz prioritetlərə sadiqlik nümayiş etdirməsi dünya dövlətlərinin Azərbaycana inamını, etimadını gücləndirən ən başlıca amildir. Prezident İlham Əliyev hər hansı inkişafın təbii sərvətlərin zənginliyindən daha çox, demokratikləşdirmə proseslərindən, qanunun aliliyinin qorunmasından, vətəndaş cəmiyyəti təsisatlarının inkişafından asılı olmasını xüsusi qeyd edir.

Dövlət başçısının gənclərlə sonuncu görüşü formatına və məzmununa görə uğurların davamı kimi qiymətləndirilməlidir. Cənab İlham Əliyevin bu görüşdə gəncləri diqqətlə dinləməsi, bir çox məqamlarda onlarla razılaşması, dəstək verməsi, gəncləri düşündürən, narahat edən bütün məsələlərin proqramda əksini tapacağını vəd etməsi mənə ulu öndərin bizimlə görüşünün də belə konstruktiv keçməsini xatırlatdı. Bu görüşdə Prezident bütünlükdə Azərbaycan gəncliyini narahat edən məsələlərə toxunmaqla gəncliyə diqqətli olduğunu, problemləri dərindən bildiyini və onların aradan götürülməsi yolları üzərində çalışdığını bəyan etdi. Ölkənin indiki inkişaf dinamikası ilə gənclərin peşə hazırlığının uzlaşmasının vacibliyini vurğuladı.

Dövlət başçısının çıxışında toxunduğu məsələlərdən biri də ölkəmizdə fəaliyyət göstərən böyük şirkətlərdə azərbaycanlı gənclərin xüsusi çəkisinin olması ilə bağlı olduğunu dedi: "...Son illərdə təhsil sistemində aparılan islahatlar minlərlə güclü mütəxəssisin yetişdirilməsinə imkan vermişdir. Bu kadrların xarici dil biliklərini artırmaqla, ixtisaslarına uyğun qısamüddətli ezamiyyət kursları təşkil etməklə onların səviyyəsini xarici şirkətlərin tələblərinə uyğunlaşdırmaq mümkündür. Bu minvalla xüsusilə xidmət, turizm və İKT sektorunda yerli kadrların xüsusi çəkisinin üstünlüyünü daha sürətlə əldə etmək mümkündür".

Sevindirici haldır ki, bu günlərdə 80 illiyini dövlət səviyyəsində qeyd etməyə hazırlaşan Azərbaycan Dövlət İqtisad Universitetində təhsil siyasətinin uğurla aparılmasına təsir edən əsas amillər inkişaf etmiş ölkələrin aparıcı universitetləri ilə əməkdaşlıq edilməsi, universitet təmsilçilərinin beynəlxalq konfranslarda təmsil olunması və yer tutması, dünya təhsil sisteminə uyğunlaşmış auditoriyaların və kitabxanaların formalaşması, peşəkar mütəxəssislərin hazırlanması üçün zəruri elmi mühitin yaradılması ilə bağlıdır. Universitetdə keçirilən məzun yarmarkaları, olimpiadalar tələbələrin harmonik inkişafını stimullaşdırır. Bu günlərdə ümummilli lider Heydər Əliyevin anadan olmasının 88-ci ildönümü münasibətilə Azərbaycan Dövlət İqtisad Universiteti ilə Vergilər Nazirliyinin birgə keçirdiyi olimpiadada respublikanın aparıcı ali məktəblərindən 237 tələbə iştirak etdi. Bundan başqa universitetdə formalaşan xüsusi istedadlar qruplarında dərslər xarici dillərdə tədris edilir.

Ulu öndər həmişə vurğulayırdı ki, əsl mütəxəssis bir neçə il qabağı görməyi bacarmalıdır. Bu baxımdan gənclərin Prezidentlə keçirilən sonuncu görüşündə qaldırdığı məsələlər aktuallığı ilə seçilirdi. Sənaye, elm və təhsil üçbucağının yaradılması və onların Qərbdəki kimi inteqrasiya olunmuş şəkildə orqanik inkişafının təmin edilməsi, elmi-texniki sahələrdə peşəkar təşkilatların təsis olunması və artıq fəaliyyət göstərən təşkilatların nüfuz dairəsinin genişlənməsi, qeyd edildiyi kimi, Azərbaycanda elmin və iqtisadiyyatın üzvi inkişafına təkan verə bilər. Ölkəmizdə və xaricdə təhsil alan fitri istedadı ilə seçilən tələbələrin intellektual potensialı gələcəkdə Azərbaycanın texnologiyalar ixrac edən ölkəyə çevrilməsində önəmli rol oynaya bilər. Gənclərin qlobal elmi ötmək istəyi onu deməyə imkan verir ki, Azərbaycan gəncliyi müasir dünya elmi ilə bəhsə girə biləcək qədər çevik və dinamik inkişaf edir. Elmi-texniki sahələrdə yaradıcı gənclərin ortaya çıxarılması və onların inkişafına təkan verilməsi, peşəkar mühəndislərin yetişdirilməsi, Prezident mükafatlarının təsis edilməsi görüşdə dövlət başçısı qarşısında qaldırılan önəmli məsələlər idi. Belə təkliflərin verilməsi ölkəmizdə böyük elmi biliklərə və qabaqcıl dünya təcrübəsinə dərindən bələd olan yeni nəslin, yeni gəncliyin formalaşmasını sübut edir. Bütün cəmiyyətlərin aparıcı qüvvəsini ideyalar təşkil edir. Gənclərimiz dövlət başçısı ilə görüşərkən belə geniş diapazonda qlobal problemlərə toxunaraq, onların həlli yollarını çətinlik çəkmədən göstərməklə inkişafının növbəti mərhələsinə keçidin uğurlu olacağını bir daha göstərdilər. Dövlət başçısı isə qaldırılan dəyərli ideyaların, verilən təkliflərin Dövlət Proqramında əksini tapacağına zəmanət verdi.

Cənab İlham Əliyev bu görüşdə bir daha yeni keyfiyyətli praqmatik və islahatlara meyilli lider olduğunu nümayiş etdirdi. Dövlət başçısı gənclərin mütərəqqi təkliflərini, ideyalarını dəstəkləyərək, gələcəkdə Azərbaycanı inkişaf etmiş ölkələrin sırasına daxil etmək əzmində olduğunu qətiyyətlə bildirdi. İstedadlı gənclərin mükafatlandırılması, üç sənaye mərkəzinin, gənclər fondunun yaradılmasına və gənclərin elmi axtarışlarının maliyyələşdirilməsinə müsbət münasibətini bildirdi.

Əslində bu görüş Azərbaycan gəncliyi və dövlətçiliyi tarixində əlahiddə unikallığı ilə seçildi. Bu növbəti tədbirdən daha çox intellektual beyinlərin ideya və təkliflərin müzakirəsinə qoşulduğu işçi forumu xatırladırdı. Hər birimiz Azərbaycan Prezidenti İlham Əliyevin bütün çıxışlara necə dərindən və həssaslıqla yanaşmasının şahidi olduq. Bu, dövlət başçısının gəncliyə, onun intellektual təfəkkürünə və analitik düşüncə tərzinə verdiyi yüksək qiymət idi.

Elmdə belə bir fikir var ki, ən çətin məsələlərin sadə bir həlli olur. Azərbaycan Respublikasının Prezidenti İlham Əliyevin müxtəlif sahələrdə uğurlar qazanmış bir qrup gənc və tələbə gənclər təşkilatlarının nümayəndələri ilə bir-neçə saat davam edən görüşündə aparılan müzakirələr ölkənin inkişafında yeni pilləyə yüksəlmək üçün vacib olan ideyaları gündəmə çıxardı. Bu tədbir siyasi nöqteyi-nəzərdən daha yüksək qiymətə layiqdir. Dövlət başçısı sübut etdi ki, ölkənin inkişafı meydanlardan, mitinqlərdən yox, problemlərin və onların həlli yolunu araşdıran intellektual diskussiyalardan keçir. Qarşıdurmalar, bəzi ölkələri cənginə alan ixracat inqilabları dövlətləri nə qədər qan tökməyə, parçalanmaya, tənəzzülə sürükləyirsə, sivil dialoq, analitik təfəkkürün ortaya qoyulması bir o qədər çox sabit dövlətlər üçün perspektivlərə xidmət edir, cəmiyyəti aparıcı qüvvə kimi bir ideya ətrafında birləşdirir, irəli aparır.

Tələbələrin intellektual bacarıqlarının və qabiliyyətlərinin Azərbaycanın inkişafı və gələcəyi üçün düzgün istiqamətləndirilməsini vacib sayan Prezidentin imzaladığı fərmana əsasən dövlət proqramı çərçivəsində dünyanın 24 ölkəsinin 200-dən artıq ən məşhur universitetlərinə azərbaycanlı tələbələr oxumağa gedirlər. Ümumiyyətlə dünyanın 30-dan çox ölkəsində tələbələrimiz təhsil almaqdadırlar. Dövlət başçısı Azərbaycanda təhsilin səviyyəsinin daha yüksək həddə qaldırılmasının zəruriliyini vurğuladı.

Əslində bu görüş Azərbaycan dövlətçiliyi tarixində mahiyyətinə, məzmununa və fəlsəfi istiqamətinə görə yeniliklərdən, iqtisadi islahatlara doğru atılan qəti addımlardan və Azərbaycan tarixində gəncliyin qarşısında açılan böyük üfüqlərdən ibarətdir. Azərbaycan Prezidenti İlham Əliyev bu görüşdə bir daha ulu öndərin kadr siyasətinə sədaqətli olduğunu nümayiş etdirməklə yanaşı, XXI əsrin ruhuna uyğun daha köklü islahatlara qadir olan lider keyfiyyətlərini ortaya qoydu. Dövlət başçısı Azərbaycan gəncliyinin qarşısında yaşıl işıq yandırmaqla yanaşı, bir mayak kimi onların yolunu işıqlandırmaq gücünə qadir olduğunu bir daha sübut etdi. Ölkəmizin çiçəklənməsi üçün biz gənclər praqmatik təfəkkürə malik olan möhtərəm Prezident İlham Əliyevin ətrafında sıx birləşməli, bütün intellektual imkanlarımızı Azərbaycanımızın intibahı naminə səfərbərliyə almalıyıq.

Zöhrab PAŞAYEV,

Azərbaycan Dövlət İqtisad

Universitetinin müəllimi

Azərbaycan.- 2011.- 5 iyun.- S. 3.