Günter Ottinger: Azərbaycan Avropa İttifaqının enerji təminatında mühüm rol oynayır

İyunun 6-da Azərbaycanın xarici işlər naziri Elmar Məmmədyarov ölkəmizdə səfərdə olan Avropa İttifaqının enerji məsələləri üzrə komissarı Günter Ottinger ilə görüşmüşdür.

Azərbaycanın Xarici İşlər Nazirliyinin mətbuat xidmətindən AzərTAc-a bildirmişlər ki, görüşdə Azərbaycan ilə Avropa İttifaqı arasında enerji sahəsində əməkdaşlığın hazırkı vəziyyəti və inkişaf perspektivləri, həmçinin regional enerji layihələri haqqında fikir mübadiləsi aparılmışdır.

E.Məmmədyarov Azərbaycanın enerji layihələrinin dünya bazarlarını əlavə enerji ehtiyatları ilə təchiz etməyə yönəldiyini və enerji daşıyıcılarının çatdırılmasında şaxələndirməyə üstünlük verdiyini vurğulamışdır. Cari ilin yanvarında Avropa Komissiyasının sədri Xose Manuel Barrozunun ölkəmizə səfəri zamanı Azərbaycan ilə Avropa İttifaqı arasında enerji sahəsinə dair imzalanmış sənədi xatırladan nazir onun əhəmiyyətini xüsusi qeyd etmişdir.

G.Ottinger Azərbaycanın Avropa İttifaqının enerji təminatında mühüm rol oynadığını bildirmişdir. Komissar bu sahədə əməkdaşlığın daha da intensiv şəkildə davam etdirilməsinin vacibliyini vurğulamışdır.

Görüşdə qarşılıqlı maraq doğuran bir sıra məsələlər müzakirə olunmuşdur.

Azərbaycan.- 2011.- 7 iyun.- S.3.