Azərbaycan Tunelçilər Birliyi Beynəlxalq Tunel Assosiasiyasına tamhüquqlu üzv qəbul edilmişdir

Azərbaycan Tunelçilər Birliyi (ATB) Finlandiyanın paytaxtı Helsinki şəhərində keçirilən Beynəlxalq Tunel Assosiasiyasının Baş Assambleyasında (İTA) qurumun tamhüquqlu üzvü kimi təsdiq edilmişdir.

AzərTAc xəbər verir ki, beynəlxalq sertifikatı "Azərtunelmetrotikinti" Səhmdar Cəmiyyətinin və Azərbaycan Tunelçilər Birliyinin sədri Şaiq Əfəndiyevə təqdim edən İTA-nın prezidenti İn Mo Li Birliyin quruma üzv olmasını dəstəklədiyini bildirmiş və ölkəmizlə gələcəkdə işbirliyindən məmnun olacağını diqqətə çatdırmışdır.

Şaiq Əfəndiyev demişdir ki, Azərbaycan Tunelçilər Birliyi ictimai təşkilat kimi 1992-ci ildə yaradılmışdır. Birlik tunellərin və metropolitenin axtarışı, layihələşdirilməsi, tikintisi və istismara verilməsi, ekoloji tələbləri nəzərə almaqla şəhərlərin yeraltı sahələrindən səmərəli istifadə olunması ilə bağlı texniki məsələlərin işlənib hazırlanması işlərini yerinə yetirir.

Tunelləri tikən və istismar edən təşkilatların işinin mütərəqqi formalarının kompleks şəkildə öyrənilməsi, həmin işin yaxşılaşdırılması üzrə yeni müddəaların işlənib hazırlanmasına yardım edən ATB müntəzəm surətdə elmi-təcrübəvi konfransların, mütəxəssislərin görüşlərinin və digər tədbirlərin keçirilməsində xüsusi rol oynayır.

ATB xaricdə və MDB məkanında fəaliyyət göstərən təşkilatlarla da sıx əməkdaşlıq edir.

Azərbaycan.- 2011.- 9 iyun.- S. 10.