"Azərbaycan Respublikası Dağlıq Qarabağ Bölgəsinin Azərbaycanlı İcması" İctimai Birliyinin saytı təqdim edilmişdir

Martın 4-də "Azərbaycan Respublikası Dağlıq Qarabağ Bölgəsinin Azərbaycanlı İcması" İctimai Birliyinin "Karabakh.az" saytı təqdim olunmuşdur.

Prezident Administrasiyası və Nazirlər Kabineti nümayəndələrinin, Milli Məclisin deputatlarının, İctimai Birliyin idarə heyəti üzvlərinin, YAP Gənclər Birliyi, "İrəli" İctimai Birliyi, Azərbaycan Tələbə Gənclər Təşkilatları İttifaqı təmsilçilərinin iştirak etdiyi tədbirdə icmanın rəhbəri, Şuşa Rayon İcra Hakimiyyətinin başçısı Bayram Səfərov saytın məqsəd və məramı barədə məlumat vermişdir.

Azərbaycan Prezidenti Administrasiyası siyasi təhlil və informasiya təminatı şöbəsinin müdiri Elnur Aslanov bir neçə gün əvvəl "Soyqırımı: Qaradağlı", "Qaçqın Anar Usubovun uzun səyahəti" filmlərinin təqdimatına həsr olunmuş mərasimləri xatırlatmış, belə tədbirlərin əhəmiyyətini vurğulamış və bildirmişdir ki, həmin filmlər ABŞ, İsrail və Almaniya ictimaiyyətinə də təqdim olunmuşdur.

Elnur Aslanov demişdir ki, xarici ölkələrdən şöbəyə daxil olmuş müraciətlərdən birində Xocalı faciəsi ilə yanaşı, Sumqayıt hadisələrinin də unudulmaması tövsiyə edilir. Çünki ermənilər həmin hadisəni dünya ictimaiyyətinə tamamilə fərqli, təxribatçı mövqedən, təhrif olunmuş şəkildə çatdırırlar. Dünya ictimaiyyəti ilə bərabər gənc nəslin dolğun məlumatlandırılması ümdə vəzifədir. İnformasiya texnologiyalarının geniş yayıldığı indiki dövrdə bu saytın yaradılması faydalı təşəbbüsdür və Azərbaycan Prezidentinin qarşıya qoyduğu "Biz informasiya müharibəsində qalib gəlməliyik" vəzifəsinin yerinə yetirilməsinə töhfə olacaqdır. Sayt təkcə icma barədə yox, həm də Qarabağ, onun mədəniyyəti, coğrafiyası, tarixi haqqında məlumat almaq istəyənlər üçün zəngin mənbə rolunu oynayacaqdır. Onun Azərbaycan, ingilis və erməni dilində olması alqışlanmalıdır. Saytda erməni dilində materialların yerləşdirilməsi tolerantlığımıza sübut, Dağlıq Qarabağda ermənilərlə birgə yaşamağa hazır olmağımız barədə dünya ictimaiyyətinə mesajımızdır.

Prezident Administrasiyasının şöbə müdiri müdafiə sənayemizin inkişafı ilə əlaqədar son günlər TV-də gedən süjetləri xatırladaraq vurğulamışdır ki, Azərbaycan inkişaf edir, gündən-günə qüdrətlənir. Ermənistanın itkiləri isə bu dövlətin yeritdiyi siyasətin məntiqi nəticəsidir. Ermənilər tez-gec zəbt etdikləri Azərbaycan torpaqlarından çəkilib sülh sazişini imzalamağa məcbur olacaqlar.

Natiq vurğulamışdır ki, yeni sayt informasiya müharibəsində atdığımız addımlardan biridir. Saytın sosial şəbəkələr vasitəsilə yayılması üçün tədbirlər görülmüşdür. Əminəm ki, sayt siyasətçilər, ümumiyyətlə, regionla maraqlananlar üçün zəngin məlumat mənbəyi olacaqdır. Bu saytı təkcə oxumaqla kifayətlənmək olmaz, həm də oradakı materialları sosial şəbəkələr vasitəsilə dostlara göndərmək lazımdır. YAP Gənclər Birliyi, "İrəli", Azərbaycan Tələbə Gənclər İttifaqları təşkilatı bu sahədə fəallıq nümayiş etdirməlidirlər. Ona nail olmalıyıq ki, tanınmış xarici siyasətçilər, analitiklər Azərbaycana bizə lazım olan məlumatlarla silahlanıb gəlsinlər.

E.Aslanov məlumat vermişdir ki, Fransada təhsil alan soydaşlarımızdan birindən alınmış məktubda o, saytın materiallarını fransız dilinə çevirməyə hazır olduğunu bildirmişdir. Bu saytın fəaliyyətində bütün azərbaycanlılar iştirak etməlidirlər. Çıxışının sonunda Prezident Administrasiyasının rəsmisi saytın rus versiyasının da vacibliyini qeyd etmişdir.

Prezident Administrasiyası siyasi təhlil və informasiya təminatı şöbəsinin əməkdaşı Fərhad Məmmədov sayt, onun strukturu haqqında ətraflı məlumat vermişdir. Bildirmişdir ki, yuxarıda adları çəkilən filmlər, "180 yaşlı Şuşa məktəbi" kitabı da sayta yerləşdirilmişdir. Burada Qarabağın rəmzi olan qala və məscidlərin, alban kilsələrinin fotoşəkillərindən geniş istifadə olunmuş, "Muğamradio"nun banneri verilmişdir. Sayğac isə Qarabağın işğalından keçən günlərin sayını göstərir. Əsas siyasi sənədlər erməni dilinə də tərcümə olunmuşdur.

YAP Gənclər Birliyinin sədri Seymur Orucov təklif etmişdir ki, saytdan "Sumqayit.com" saytına keçid də mümkün olsun.

Xocalı Rayon İcra Hakimiyyətinin başçısı Şahmar Usubov tövsiyə etmişdir ki, saytda yerləşdiriləcək materiallar əvvəlcədən ətraflı yoxlanılsın, faktlar dəqiqləşdirilsin. O, saytın fəaliyyətinə uğurlar arzulamışdır.

"Azərbaycan Respublikası Dağlıq Qarabağ Bölgəsinin Azərbaycanlı İcması" İctimai Birliyi idarə heyətinin üzvü, Milli Məclisin deputatı Rövşən Rzayev əmin olduğunu bildirmişdir ki, sayt icmanın fəaliyyətinə yeni təkan verəcəkdir. O, torpaqlarımızın geri qaytarılması, qaçqınların və məcburi köçkünlərin həyat şəraitinin yaxşılaşdırılması, icmanın fəaliyyətinə şərait yaradılması üçün dövlət başçısına minnətdarlığını bildirmişdir. Arzu etmişdir ki, gənclərimiz xaricdəki gənc soydaşlarımızla ünsiyyəti canlandırsınlar.

İdarə heyətinin üzvü, Xocavənd Rayon İcra Hakimiyyətinin başçısı Eyvaz Hüseynov diqqəti cəmiyyətimizin Qarabağ barədə məlumatlandırılmasının vacibliyinə yönəltmişdir. Yeni saytın bu sahədəki boşluğu dolduracağına, həqiqətlərimizin dünyaya çatdırılmasında böyük rol oynayacağına əminliyini ifadə etmişdir.

Nazirlər Kabineti Aparatının Qaçqınların, məcburi köçkünlərin problemləri, miqrasiya və beynəlxalq təşkilatlarla iş şöbəsinin müdiri Qurban Sadıqov saytın fəaliyyətinə uğurlar arzulamış, yaradıcılarına təşəkkür etmiş, saytın təbliğində Təhsil Nazirliyinin fəaliyyətini canlandıracaqlarına ümidvar olduğunu bildirmişdir. Təklif etmişdir ki, qaçqınların və məcburi köçkünlərin mənzil-məişət şəraitinin yaxşılaşdırılmasından bəhs edən və bir neçə dildə səsləndirilən film də saytda yerləşdirilsin.

Digər çıxış edənlər də arzu və təkliflərini söyləmişlər.

AzərTAc

Azərbaycan.- 2011.-5 mart.- S. 3.