Milli Paralimpiya Komitəsi 15 illik yubileyini qeyd etmişdir

Martın 5-də Bakı Əyləncə Mərkəzində Azərbaycan Respublikası Milli Paralimpiya Komitəsi yaranmasının 15 illiyinə həsr edilmiş təntənəli tədbir keçirilmişdir.

İştirakçılar foyedə ulu öndər Heydər Əliyevin və Prezident İlham Əliyevin idmanın inkişafına və idmançılara diqqət və qayğısını əks etdirən fotoşəkillərdən ibarət stendə maraqla baxmışlar.

AzərTAc xəbər verir ki, tədbir Azərbaycanın Dövlət himninin səsləndirilməsi ilə başlamışdır.

Milli Paralimpiya Komitəsinin prezidenti İlqar Rəhimov 15 il ərzində idmançılarımızın dünya paralimpiya hərəkatı tarixinə adlarını böyük nailiyyətlərlə yazdıqlarını qeyd etmişdir: "1996-cı ilin bu günü Milli Paralimpiya Komitəsinin yaranması günüdür. O vaxt ümummilli lider Heydər Əliyevin rəhbərliyi ilə ölkəmizdə ictimai sabitliyin bərqərar olması xüsusi qeyd olunmalıdır. Çünki bu, Azərbaycanda Paralimpiya hərəkatının təşəkkül tapmasına və inkişafına xüsusi zəmin yaratmışdır. Hər sahədə inkişaf edən respublikamızda fiziki cəhətdən qüsurlu insanların da cəmiyyətin tam bərabərhüquqlu üzvü kimi qəbul edilməsi vacibdir. İdman bu mənada ən gözəl fürsət idi. Həmin dövrdə əlil idmançılarımız ulu öndər Heydər Əliyevin qayğısını yaxından hiss etməyə başlamışlar. Onun 1999-cu ildə imzaladığı sərəncamla əlilliyin qarşısının alınması və əlillərin reabilitasiyası üzrə 1999-2002-ci illər xüsusi Dövlət Proqramının bir bəndi də Paralimpiya proqramına həsr edilmişdir. Bu tarixi qərar fiziki cəhətdən qüsurlu insanların cəmiyyətə qaytarılmasında əhəmiyyətli rol oynamışdır",- deyə o bildirmişdir. İ.Rəhimov həmçinin qeyd etmişdir ki, paralimpiyaçılarımızın uğurlu çıxışları Beynəlxalq Paralimpiya Komitəsinin (BPK) diqqətindən kənarda qalmadı. 2010-cu ilin may ayında BPK-nın prezidenti Filip Kraven ölkəmizdə işgüzar səfərdə olarkən demişdi: "Azərbaycan son illər olduqca sürətli inkişaf edir. 13-cü Pekin Yay Paralimpiya Oyunlarındakı çıxışınız büna əyani sübutdur. Əlbəttə, bu nəticələr ancaq dövlət rəhbərliyinin diqqət və qayğısının nəticəsidir".

Tədbirdə çıxış edən gənclər və idman nazirinin müavini İsmayıl İsmayılov, Milli Olimpiya Komitəsinin vitse-prezidenti Çingiz Hüseynzadə idmançılarımızın qazandıqları medalların Azərbaycanda idmanın inkişaf etdiyinin göstəricisi olduğunu diqqətə çatdırmışlar. Vurğulanmışdır ki, Azərbaycan xalqının ümummilli lideri Heydər Əliyev idmana həmişə diqqət və qayğı göstərmişdir. İndi isə bu diqqət və qayğını Prezident İlham Əliyev göstərir. Bu da öz nəticələrini verir.

Məlumat verilmişdir ki, Azərbaycanda paralimpiya hərəkatında xüsusi xidmətlərinə görə Zahir Abdullayev, Ramin İbrahimov, Tofiq Məmmədov, Rza Osmanov, Kərim Sərdarov və Vladimir Zayets Prezident İlham Əliyevin 2011-ci il 16 fevral tarixli sərəncamı ilə "Tərəqqi" medalına layiq görülmüşdür.

Mərasimdə İ.Rəhimov, gənclər və idman naziri Azad Rəhimov, keçmiş gənclər, idman və turizm naziri, hazırda isə mədəniyyət və turizm naziri olan Əbülfəs Qarayev, əmək və əhalinin sosial müdafiəsi naziri Füzuli Ələkbərov, Milli Olimpiya Komitəsinin vitse-prezidenti Çingiz Hüseynzadəyə xüsusi Milli Paralimpiya Komitəsinin medalları təqdim olunmuşdur.

Qeyd edək ki, bu medal ilk dəfə Prezident İlham Əliyevə, sonra isə Beynəlxalq Paralimpiya Komitəsinin prezidenti Filip Kravenə verilmişdir.

Azərbaycan.- 2011.-6 mart.- S. 4.