Ana ürəyi

Mehriban nəfəsli məhəbbətində

Kim deyər xəsisdir ana ürəyi?

Xeyr, tükənməyən səxavətində

Üfüqsüz dənizdir ana ürəyi.

Bəzən od-alovlu şimşəyə bənzər,

Bəzən bir yanıqlı tütəyə bənzər.

Bəzən təzə - yumşaq ipəyə bənzər,

Əzizdən əzizdir ana ürəyi.

Yansa mənzil-mənzil işıq yayar o,

Soyusa övladı yetim qoyar o.

Yanmaqdan nə bezər, nə də doyar o,

Günəşlə əkizdir ana ürəyi.

Dəysə ayağına bir çayın daşı,

Göynəyər ananın qəlbinin başıE

Yıxılsan, yaranı yuyar göz yaşı,

Büllurdan təmizdir ana ürəyi.

Səndən zaman-zaman uzaqda gəzsə,

Aranda dolaşsa, yaylaqda gəzsə,

Bürküdə, yağışda, sazaqda gəzsə,

Demə ki sənsizdir ana ürəyi.

O böyük ürəyi nə sıx, nə yax sən,

Ana əməyinə hörmətlə bax sən!

Nə tala, nə xərclə, nə də ki sağ sən,

Nə qul, nə kənizdir ana ürəyi.

O bir nərə çəksə döyüşdə əgər,

Dağlar. Qarlı dağlar baş-başa dəyər.

Ay donar, yerində, ulduz göy döyər,

Sanma ki acizdir ana ürəyi.

Odur kəhkəşanı bütün zamanın,

Bizik ulduzları o kəhkəşanınE

Doğma sinəsində Azərbaycanın

Bakıdır, Təbrizdir ana ürəyi.

Əli Tudə

Azərbaycan.- 2011.- 8 mart.- S. 6.