Biz döyüş əmrini
gözləyirik
Daxili İşlər Nazirliyinin
Daxili Qoşunları Vətənə və xalqa sədaqət
andına daim sadiqdir
"Azərbaycan dövləti, dövlətçiliyinin inkişafı və möhkəmlənməsi üçün Daxili Qoşunların xidməti yüksək səviyyədədir və məni qane edir".
İlham ƏLİYEV
Memarı ulu öndər Heydər Əliyevin
olduğu müstəqil Azərbaycan demokratik və hüquqi
dövlət quruculuğu yolunda inamla irəliləyir.
Keçdiyimiz 20 illik yol şərəfli olduğu qədər
də çətin və keşməkeşli,
ağrı-acılarla dolu olmuşdur. Daxildən və xaricdən
uzanan düşmən əllər zaman-zaman müstəqilliyimizi
devirməyə, böyük qurbanlar bahasına
qazandığımız azadlığı əlimizdən
almağa yönəlmişdi. Dövlət çevrilişinə
olan cəhdlər, ölkə daxilində sabitliyin
pozulmasına hesablanan təxribatlar qüdrətli sərkərdə,
bütün dünyanın qəbul etdiyi görkəmli
dövlət xadimi, müdrik siyasətçi Heydər Əliyevin
uzaqgörənliyi ilə zərərsizləşdirilmişdir.
Zamanın ağır
sınaqlarından çıxmış müstəqil Azərbaycan
Heydər Əliyevin şah əsəridir. Yenilməz iradəsi,
nurlu zəkası ilə müstəqil dövlət quran Heydər
Əliyev onu qoruyub saxlamaq üçün həyati əhəmiyyətə
malik tövsiyələrini də vermişdir. Dövlətçiliyin
və müstəqilliyin möhkəmlənməsi
yönümündə ümummilli liderimizin həyata
keçirdiyi siyasətin ən fəal
icraçılarından biri də Daxili İşlər
Nazirliyi və onun Daxili Qoşunları olmuşdur. Bu
baxımdan ulu öndərin Daxili Qoşunların yaranması
günü ilə əlaqədar imzaladığı fərman
məhz Azərbaycanın dövlət müstəqilliyinin
dönməzliyinin təminatına hesablanmışdı.
Respublikamızın ərazi bütövlüyünün
qorunmasında, Qarabağ müharibəsində Daxili
Qoşunların şəxsi heyəti mərdliklə
döyüşmüş, igidlik və qəhrəmanlıq
nümunəsi göstərmişdir.
Bərdə rayonu ərazisində
yerləşən Daxili İşlər Nazirliyinin Daxili
Qoşunlarının "N" saylı hərbi hissəsi
müasir maddi-texniki bazası, yüksək döyüş
qabiliyyəti, nümunəvi nizam-intizamı ilə diqqəti
cəlb edir. Hərbi hissə abad və yaraşıqlı
şəhərcikdir. Geniş həyətdə səliqə
ilə əkilmiş həmişəyaşıl
ağacların sayı-hesabı bilinmir. Əsgər və
zabitlər nəinki hərbi hissənin həyətini, eyni
zamanda, ətraf əraziləri də təmiz saxlayır,
abadlığa xüsusi fikir verirlər. Yazın ilıq nəfəsinin
duyulduğu, ana torpağın qış yuxusundan
ayıldığı bu günlərdə əsgərlər
yenə də həvəslə ağac əkirlər. Hərbi
hissə komandirinin maddi-texniki təchizat üzrə
müavini, polkovnik-leytenant Rauf Əliyevlə elə həyətdə
ağac əkən əsgərlərin yanında
görüşdük. Müsahibim söhbətə Dədə
Qorquddan gətirdiyi misalla körpü saldı:
- Torpağı əkib-becərməsən,
qorumağa, qorumasan, əkib-becərməyə dəyməz!
Bu torpağın hər qarışı bizim
üçün əzizdir. Müstəqil dövlətimizin
varlığı üçün başqa heç nə ilə
əvəz edilməyən ən mühüm şərt də
məhz torpaqdır, respublikamızın ərazi
bütövlüyüdür.
Komandir söhbətinə
davam edib deyir ki, bizə ictimai asayişi, vətəndaşların
konstitusiya hüquqlarının qorunması, xüsusi təhlükəli
cinayətkarların zərərsizləşdirilməsi,
mühüm dövlət obyektlərinin mühafizəsi və
başqa bu kimi vəzifələr etibar edilmişdir. Bu vəzifələri
yüksək məsuliyyət hissi ilə yerinə yetirir, bu
yolda həyatımız üçün yaranan təhlükədən
belə çəkinmirik.
Öyrənirik ki, hərbi
hissə son illər bir sıra uğurlu əməliyyatlara
imza atıb. 2009-cu ilin 18-23 oktyabrında Ağdaş rayonunun
Kotavan kəndində silahlı cinayətkarın
axtarışında və zərərsizləşdirilməsində,
2010-cu ilin yazında Saatlı və Sabirabad rayonlarında sel fəlakəti
ilə mübarizədə, keçən ilin iyul ayında Tərtər
rayonunda ictimai asayişin kütləvi şəkildə
pozulmasının qarşısının alınmasında hərbi
hissənin döyüşçüləri xüsusi
bacarıq və qabiliyyət nümayiş etdirmişlər.
Ötən ilin payızında hərbi hissədə "Alay
hücumda" xüsusi taktiki təlimin keçirilməsini
yaxından müşahidə edən daxili işlər naziri,
general-polkovnik Ramil Usubov, daxili işlər nazirinin müavini,
daxili qoşunlar komandanı, general-leytenant Zakir Həsənov
və yüksək rütbəli digər hərbçilər
əsgər və zabitlərin fiziki
hazırlığını, onların müasir
döyüş texnikasını məharətlə idarə
etməsini, mürəkkəb tapşırıqları
peşəkarlıqla yerinə yetirməsini yüksək qiymətləndirmişlər.
Hərbi hissə ilə
yaxından tanışlıq sözün həqiqi mənasında
adamda qürur hissi doğurur. Daxili marağımızın
diktəsi ilə əsgər yataqxanasında döşəkağlarına
qədər hər şeyə nəzər yetirdik. Əsgərlər
üçün bişirilən yeməklərin dadına da
baxdıq. Çamaşırxanaya, hamama, çayxanaya baş
çəkdik. Gördüklərimiz qəlbimizi fərəhlə
doldurdu. Dövlətin öz əsgərinə yaratdığı
şərait, göstərdiyi qayğı və diqqət
inkişafımızın, qazandığımız iqtisadi
uğurların bir baxış rakursundan aydın sezilən
görüntüləri idi.
Cənab İlham Əliyev hələ
yeniyetməlik dövründə ulu öndərimizi
müşayiət edərək bu hərbi hissəyə
üç dəfə gəlmişdir. Silahlı Qüvvələrin
Ali Baş Komandanı kimi də 2009-cu il martın 2-də hərbi
hissədə olmuşdur. Təbii ki, Ali Baş Komandanın gəlişi
hərbi hissənin həyatında unudulmaz əlamətdar
hadisəyə çevrilmiş, eyni zamanda, dərin iz
qoymuşdur. Dövlət başçısının
tapşırıq və tövsiyələri əsasında hərbi
hissənin maddi-texniki bazası daha da möhkəmlənmiş,
əsgər və zabitlərin sosial ehtiyacları yüksək
səviyyədə təmin edilmişdir. Hərbi şəhərcikdə
60 ailəlik zabit yataqxanasında bütün məişət
rahatlığı yaradılmışdır. Hərbi şəhərcik
mərkəzləşdirilmiş müasir tipli isitmə
sistemi ilə qızdırılır. Həyətdə suyu
içməyə yüksək səviyyədə yararlı
olan subartezian quyusu qazılmışdır. Şəhərcik
elektrik enerjisi, təbii qaz və su ilə fasiləsiz təmin
edilir.
Hərbi hissədə
rastlaşdığımız maraqlı bir fakt barədə ətraflı
danışmağı əhəmiyyətli sayırıq. Tərbiyə
işləri üzrə bölmə rəisi-baş təlimatçı,
mayor Zirəddin Hüseynovun dedikləri:
- Burada gördüklərinizə
bir cəhəti də əlavə etmək istərdim. Xidmətə
yeni gələn əsgərlərlə
apardığımız söhbətlər təsirsiz qalmır.
Gənclərimiz siqaret çəkmək kimi zərərli vərdişdən
tamamilə xilas olmuşlar. Biz hər bazar günü
üçün xüsusi tədbirlər planı
hazırlayırıq. Hərbi hissə komandiri tərəfindən
təsdiq olunan bu tədbirlər planında siqaretin
sağlamlığa vurduğu zərər barədə
söhbətlərə geniş yer ayırırıq.
Qarşımıza qoyduğumuz məqsədə
çatmışıq. İndi hərbi hissədə siqaret
çəkən yoxdur. Bununla bağlı valideynlərdən
çoxsaylı minnətdarlıq eşidirik. Hərbi xidmətə
gələnə qədər siqaretə öyrəşmiş
cavanlar burada ətrafına baxıb bu zərərli vərdişi
tərgitməyə məcbur olurlar. Bunu kimlərsə sadə
və əhəmiyyətsiz bir məsələ hesab edə
bilər. Amma biz bu işdə israrlıyıq.
Hərbi hissədə
aparılan siyasi-ideoloji işin səviyyəsi də təqdirəlayiqdir.
Burada hər bölüyün öz divar qəzeti var. Əsgərlər
qəzetə ad seçməkdə sərbəstdirlər.
"Komanda" və "Hədəf" adlı divar qəzetləri
öz yüksək siyasi və bədii səviyyəsinə
görə fərqlənirlər. İctimai-siyasi və mədəni-maarif
işləri otaqları əsgərlərin sevimli yeridir. Əsgərlər
burada dövri mətbuatla
Tərbiyə işləri
üzrə bölmə rəisinin otağında stolun
üstündə bir qovluq diqqətimizi cəlb etdi.
Üstünə "Valideyn məktubları"
yazılmış qovluqda respublikamızın müxtəlif
bölgələrindən göndərilmiş yüzlərlə
məktub vardı. Sıradan birini götürüb oxuduq. Cəlilabad
şəhərindən göndərilmiş məktubda
yazılır:
"Daxili Qoşunların "N" saylı hərbi
hissəsinin komandiri, polkovnik cənab Sahib Məmmədova
Çox hörmətli hərbi
hissə komandiri! Bir valideyn kimi çox qürur hissi
keçirirəm ki, mənim oğlum müstəqil Azərbaycan
Respublikasının Daxili Qoşunlarında xidmət edir.
Gündən-günə təkmilləşən Daxili
Qoşunlarımız hər bir vətəndaşımızın
qürur qaynağı və güvənc yeri olmuşdur.
Hörmətli komandir, oğlum Kərimov Elvin Yasər oğlu
uşaq vaxtından nizam-intizamlı böyümüş, həmişə
valideynlərinin qulluğunda durmuş, heç vaxt bizi incitməmişdir.
Mənim oğlum vətənpərvərdir. Vətənini,
millətini çox sevir, çalışqandır.
Bütün bunları nəzərə alaraq mən bir valideyn
kimi sizlərə inanıram və inandığım
üçün mən öz övladımı sizə əmanət
edirəm. Allah müstəqil Azərbaycanın
bayrağını daim uca etsin. Tanrı sizi saxlasın.
Hörmətlə: Kərimov Yasər, valideyn"
Buradakı gənclərlə qısa görüş istər-istəməz həmsöhbətin əhval-ruhiyyəsini yüksəldir. İşğal altındakı torpaqlarımızın azad edilməsi uğrunda döyüşlərə atılmaq arzusuyla çırpınan odlu ürək sahiblərinin gözlərində qığılcımlar oynayır. Komandir Sahib Məmmədov hərbi hissədəki yüksək əhval-ruhiyyənin qələbəyə olan böyük inamdan doğduğunu ifadə edərək dedi ki, ən böyük arzumuz Qarabağı azad etməkdir. Döyüşçülərimizin hərəsi bir aslandır. Belə oğulları olan Vətən basılmaz. Biz hər an döyüş əmrini gözləyirik!
Azərbaycan xalqı igid oğullarının bu fədakar əzminə tam əmindir!..
Lazım QULİYEV
Azərbaycan.- 2011.-10 mart.- S. 6.