Təbii ehtiyatlar, energetika və ekologiya komitəsinin iclası olmuşdur

Martın 11-də Milli Məclisin Təbii ehtiyatlar, energetika və ekologiya komitəsinin iclası keçirildi. İclası aparan Milli Məclis Sədrinin müavini, Təbii ehtiyatlar, energetika və ekologiya komitəsinin sədri Valeh Ələsgərov gündəlikdə "Elektroenergetika haqqında" Azərbaycan Respublikasının Qanununa, "Qaz təchizatı haqqında" Azərbaycan Respublikasının Qanununa və "Su təchizatı və tullantı suları haqqında" Azərbaycan Respublikasının Qanununa əlavələr və dəyişikliklər edilməsi barədə qanun layihəsinin olduğunu bildirdi. Layihənin Azərbaycan Respublikasının Prezidenti tərəfindən qanunvericilik təşəbbüsü qaydasında Milli Məclisə təqdim olunduğunu deyən komitənin sədri əlavələr və dəyişikliklər barədə məlumat verdi.

Qısa müzakirə zamanı komitə üzvləri əlavələr və dəyişikliklərlə bağlı fikirlərini bölüşdülər. Qanun layihəsi müzakirə olunmaq üçün Milli Məclisin plenar iclasına tövsiyə olundu.

Azərbaycan.- 2011.-12 mart.- S. 2.