Bakıda "AutoShow" 7-ci Azərbaycan Beynəlxalq avtomobil sərgisi açılmışdır

Martın 16-da Bakı Sərgi Mərkəzində Böyük Britaniyanın İTE Group PLC və onun Azərbaycandakı tərəfdaşı İteca Caspian LLC şirkətlərinin təşkilatçılığı, Nəqliyyat Nazirliyi, Baş Dövlət Yol Polisi İdarəsi və Sahibkarlar (İşəgötürənlər) Təşkilatları Milli Konfederasiyasının dəstəyi ilə "AutoShow" 7-ci Azərbaycan Beynəlxalq avtomobil sərgisi, həmçinin "AutoParts" 4-cü Azərbaycan Beynəlxalq ehtiyat hissələri, aksessuarlar və xidmət avadanlığı sərgisi açılmışdır.

AzərTAc xəbər verir ki, açılış mərasimində Nəqliyyat Nazirliyinin "Avtonəqliyyatservis" departamenti rəisinin müavini Kaviz Abdullayev, Sahibkarlar (İşəgötürənlər) Təşkilatları Milli Konfederasiyasının baş katibi Məhəmmədəli Əfəndiyev, İteca Caspian LLC-nin direktoru Fərid Məmmədov çıxış edərək Prezident İlham Əliyevin rəhbərliyi ilə ölkəmizdə həyata keçirilən sosial-iqtisadi inkişafın əhalinin rifah halının yüksəlməsinə xidmət etdiyini diqqətə çatdırmışlar. Qeyd olunmuşdur ki, respublikamızın yol-nəqliyyat infrastrukturunun təkmilləşdirilməsi, iş adamlarına yaradılan əlverişli şərait və insanların rifah halının yüksəlməsi bu sahəyə marağı artırmışdır. Builki sərgi daha çox avtomobil modellərini əhatə edir. Sərgidə 14 ölkədən, o cümlədən Azərbaycan, Almaniya, İtaliya, Rusiya, Türkiyə, İsveçrə və s. dövlətlərdən 105 şirkətin məhsulları nümayiş olunur. Xəzəryanı regionun ən böyük avtomobil sərgisində "Hyundai", "Jaguar", "İnfiniti", "Land Rover", "Nissan", "Audi", "Şkoda", "Volkswagen" və digər qabaqcıl avtomobil istehsalçılarının distribüterləri iştirak edirlər. Builki sərgi adi formatını dəyişmişdir. Belə ki, sərginin birinci iş günü mətbuat nümayəndələri və sərgiyə dəvət edilmiş xüsusi qonaqlar üçün ziyarət proqramı ilə başlayacaqdır. Növbəti üç iş günü isə bütün ziyarətçilər üçün açıq olacaqdır.

Rəmzi qırmızı lent kəsildikdən sonra iştirakçılar sərgi ilə tanış olmuşlar. Debütant olan Naxçıvan avtomobil zavodu sərgidə üç "Naz Lifan" modeli ilə təmsil olunmuşdur. Ümumiyyətlə isə zavod bu tipli avtomobilin dörd modelini istehsal edir. "Naz Lifan" avtomobilləri havalandırma və təhlükəsizlik sisteminə malikdir.

"Hyundai Auto Azerbaijan" sərgidə şirkətin bir çox modellərini nümayiş etdirməklə yanaşı, iki yeni modelin - "Hyundai Accent" və "Hyundai Elantra" modellərinin Azərbaycan bazarında təqdimatını da gerçəkləşdirmişdir.

Qonaqlar üçün "Hyundai Auto Azerbaijan", "Nurgün Motors" və "Euro Stile LTD" şirkətlərinin avtomobillərini "test-drive" (yoxlanma) etmək imkanı da yaradılmışdır.

"Anadolu İsuzu" avtomobil sənaye şirkətinin təqdim etdiyi "İsuzu Turkuaz" və " Suzu Citimark" sərnişin avtobusları isə yüksək rahatlığı ilə fərqlənir. Hər iki sərnişin avtobusu işlənmiş qazlarda zərərli maddələr tərkibini nizamlayan "Avro-5" ekoloji standartlarına cavab verir.

Sərgidə üç iri sektor - minik nəqliyyatı, kommersiya tipli nəqliyyat və bütün növ nəqliyyat vasitələri üçün ehtiyat hissələri və aksessuarlar təqdim edilir. "AutoParts" sərgisində avtomobil yağları, filtrlər, avtokosmetika və avtomobil kimyasının digər məhsullarının istehsalçıları və distribüterləri bir araya gəlmişlər. Qaraj-servis avadanlığı sahəsində ixtisaslaşmış Rusiya şirkətləri builki sərginin debütantı qismində çıxış edirlər. Kanada istehsalçıları isə ilk dəfə olaraq sərgidə innovasiyalı məhsullarını təqdim edirlər. Bu, avtomobillərin və digər obyektlərin şüşələrinin təhlükəsizliyi, möhkəmliyinin artırılması üçün nəzərdə tutulmuş və zərbə, güclü külək, güllə atəşi, partlayış və yanğın hallarında müdafiəni təmin edən zirehli məhsullardır.

Sərgi martın 19-dək davam edəcəkdir.

Azərbaycan.- 2011.-17 mart.- S. 5.