Bakının inkişafı üçün hamı çalışmalıdır

Paytaxt şəhərlər həmişə izdihamlı, qonaqlı-qaralı olur. Hər hansı bir ölkəyə gələnlər çox zaman yalnız onun paytaxtında olmağa vaxt tapır və həmin şəhərdə gördüklərinə əsasən ölkə haqqında fikir yürüdürlər.

Paytaxt həm də ona görə diqqət çəkir ki, hansı bölgədə yaşamalarından asılı olmayaraq ölkənin bütün vətəndaşları onu əziz və doğma şəhər kimi sevirlər.

Deyilənlərin hamısını Azərbaycanın paytaxtı Bakı şəhərinə də şamil etmək olar. Bakı bənzərsiz şəhər olduğu üçün onu görməyə can atanların sayı heç vaxt azalmır. Coşqun Xəzərin sahilində yerləşməsi, qeyri-adi - amfiteatr quruluşunda inşa olunması, saysız-hesabsız tarixi-memarlıq abidələri və s. ona təkrarsız mənzərələr bəxş edir, insanların zövqünü oxşayır.

Son illərdə Azərbaycan iqtisadiyyatının dünyaya inteqrasiya etməsi, ölkəmizdə qlobal neft-qaz və ixrac layihələrinin həyata keçirilməsi, birgə müəssisələrin fəaliyyət göstərməsi Bakıda çoxsaylı xarici vətəndaşların yaşamasına da səbəb olub. Qısası, Bakı dünyanın böyük, gözəl və işgüzar şəhərlərindən biridir. Təbii ki, belə bir şəhərin problemlərinin də olması heç kəsi təəccübləndirməməlidir.

Bakıya qayğı Azərbaycan dövlətinin həmişə diqqət mərkəzində olub. Ümummilli lider Heydər Əliyevin hələ respublikaya rəhbərliyinin birinci dövründə Bakıda yeni yaşayış massivləri salınıb, nəhəng müəssisələr tikilib. Paytaxtın başdan-başa yaşıllaşdırılması kimi nəcib təşəbbüsün də müəllifi məhz ulu öndər olub.

Bu ənənələr indi də davam edir. Prezident İlham Əliyevin sərəncamı ilə Bakıda neçə-neçə infrastruktur layihələri həyata keçirilib. Son bir neçə il ərzində şəhərimizdə 23 yolötürücü, körpülər, tunellər inşa edilib, yollar genişləndirilib, yeni yollar salınıb, şəhərdə 32 piyada keçidi istifadəyə verilib. Köhnə keçidlər bərpa olunub. Bütün bunlar gündən-günə böyüyən şəhərdə rahatlığın, təhlükəsizliyin təmin olunmasına yönəldilmiş tədbirlərdir.

Ölkə başçısı şəhərin yalnız mərkəzinin abadlığının deyil, onun ərtaf qəsəbə və kəndlərinin də qayğısına qalır. Son illərdə bu məqsədlə imzalanan sərəncamları və görülən tədbirləri xatırlamaq kifayətdir.

Bununla belə, Bakı daim inkişaf edən, böyüyən, sakinlərinin sayı artan şəhərdir. Odur ki, onun qayğıları da böyüyür, yeni problemlər ortaya çıxır. Bu mənada Prezident İlham Əliyevin sədrliyi ilə Bakı şəhərinin və paytaxtətrafı qəsəbələrin sosial-iqtisadi inkişafına dair müşavirənin keçirilməsi xüsusi əhəmiyyət kəsb edib. Paytaxt həyatının elə bir sahəsi yoxdur ki, həmin müşavirədə ona toxunulmasın. Məsələn, müşavirədə paytaxt yollarının abadlığı, tıxac probleminin aradan qaldırılması, piyadaların və sərnişinlərin rahat gediş-gəlişi üçün görülən ardıcıl işlərin böyük əhəmiyyət daşıması vurğulanıb. Müşavirədə dövlət başçısı bu barədə deyib: "Əlbəttə ki şəhər böyüyür, Azərbaycan əhalisi artır. Vaxtilə Bakıda infrastruktur layihələrinin həyata keçirilməsi daha az əhaliyə hesablanmışdır. Bu gün əhali artıb və biz elə etməliyik ki, bütün infrastruktur, bütün kommunal xidmətlər, bütün nəqliyyat imkanlarımız böyüyən şəhərə uyğun olsun. Son illər ərzində şəhərimizdə bu məqsədlə genişmiqyaslı işlər aparılmışdır. Xüsusilə yol-nəqliyyat sektorunda çox ciddi tədbirlər görülmüşdür. O tədbirlər vaxtlı-vaxtında görülmüşdür. Çünki əgər o tədbirlər görülməsəydi, bu gün Bakıda şəhər nəqliyyatı iflic vəziyyətə düşə bilərdi. Biz bəzi böyük şəhərlərin problemləri ilə tanışıq. Görürük ki, o şəhərlərdə bəzi hallarda yol hərəkəti dayanır, bir neçə saat iflic vəziyyətə düşür. Bunun qarşısının alınması üçün bir neçə il bundan əvvəl şəhərimizdə geniş yol-tikinti layihələri icra edilməyə başlanmışdır".

Keçən ilin sonunda Oğuz-Qəbələ-Bakı su kəməri istifadəyə verildi. Həmin vaxtdan paytaxtın su ilə təminatında əsaslı dönüş yarandığı göz qabağındadır. Yaxın vaxtlarda kəmər tam gücü ilə fəaliyyət göstərəcək və paytaxt əhalisinin 70 faizi keyfiyyətli su ilə təmin olunacaq. Müşavirədə qeyd edilmişdir ki, şəhərin qalan hissəsinin içməli su ilə davamlı surətdə təmin edilməsi üçün əlavə tədbirlər görülməlidir.

Paytaxtın istiliklə təmin edilməsi məsələsi də gündəmdə olmuşdur. Yaxın zamanlarda Bakının və şəhərətrafı qəsəbələrin inkişafına dair qəbul ediləcək yeni proqram çərçivəsində bu məsələlərin də öz həllini tapacağı bildirilmişdir.

Müşavirədə Bakının köhnə, fəaliyyət göstərməyən sənaye müəssisələrinin yerində yeni parkların, yaşıllıq zonalarının salınması və onların insanların istifadəsinə verilməsi istiqamətində işlərin davam etdiriləcəyi vurğulanmışdır. İndi belə müəssisələr tədricən köçürülür. Çünki şəhərin mərkəzində sənaye müəssisələri olmamalıdır. Onların yerində yeni yaşayış binalarının, istirahət guşələrinin, ictimai binaların yaradılması prosesi davam etdirilir. Bu işlər növbəti illərdə də aparılacaq.

Bütün bunlar şəhərin ekoloji vəziyyətini yaxşılaşdırır. Təkcə keçən il Bakıda 3 milyon ağac əkilib. İndi əsas məsələ o ağaclara qulluq etmək, onları qorumaqdır. "Ekologiya ili" olan 2010-cu il başa çatsa da, şəhərdə yaşıllaşdırma işləri davam etdirilir. Dövlət başçısının göstərişinə əsasən, boş yerlərdə yeni ağaclar əkiləcək, Bayıl yamacında böyük bir meşə zolağı yaradılacaq. Beləliklə, Bakını əhatə edən quru dağlar meşə ilə örtülərək həm ətrafa gözəllik bəxş edəcək, həm də ekoloji vəziyyət yaxşılaşacaq.

Ölkə rəhbəri paytaxtın ətrafındakı qəsəbələrin inkişafı məsələsinə də ayrıca toxunaraq demişdir ki, onların inkişafı üçün nə lazımdırsa, ediləcəkdir: "Bakının ətrafında yerləşən qəsəbələrdə 800 mindən artıq əhali yaşayır. Bu, özlüyündə böyük bir şəhərdir və bu qəsəbələr şəhər səviyyəsinə gətirilməlidir. Bunu etmək üçün, yenə də deyirəm, maliyyə vəsaiti lazımdır - o, bizdə vardır. Siyasi iradə lazımdır - o da bizdə vardır. Artıq bizdə peşəkar kadrlar da vardır. Texnikamız, şirkətlərimiz vardır ki, bütün bu işləri onlar görə bilərlər".

Göründüyü kimi, sözügedən müşavirədə qaldırılan məsələlər, qarşıya qoyulan vəzifələr, verilən tapşırıqlar Bakının və Bakıətrafı qəsəbələrin sakinlərinin rahatlığı üçündür. Onları yerinə yetirmək üçün isə təkcə əlaqədar təşkilatlar, müvafiq qurumlar deyil, bütün sakinlər səy göstərməli, abadlıq və gözəllik naminə öz töhfələrini verməlidirlər.

F.SADIQLI

Azərbaycan.- 2011.-19 mart.- S. 1.