Radikal müxalifətin sosial bazası tam tükənib

Fərəc QULİYEV: "Bu qüvvələr xaricdəki ermənipərəst dairələrlə fəal əməkdaşlıq qurub"

Radikal müxalifət dairələrinin Azərbaycanın əleyhinə fəaliyyət göstərən qüvvələrlə sıx əməkdaşlıq etdiyi heç kimə sirr deyil. Şübhəsiz ki, ifrat radikal müxalifətə "dayı"lıq edən antiazərbaycançı şəbəkə də bu "siyasi qüvvələr"dən alət kimi istifadə edir. AXCP və Müsavat Partiyası funksionerlərinin Azərbaycanda gedən pozitiv işlərlə bağlı qeyri-konstruktiv mövqe nümayiş etdirmələri və nəzarət altında saxladıqları mətbuat səhifələrində sərsəm bəyanatlar səsləndirmələri onların idarə olunduğunu bir daha sübuta yetirir. Xarici havadarlarının maliyyə dəstəyi ilə istənilən yola baş vurmağa, hətta iğtişaşlar törətməyə hazır olan bu ifrat radikal dairələrin iç üzünü artıq xalq yaxşı tanıyır. Mitinq eyforiyasında olan bu destruktiv qüvvələrin xaricdən "əmr" aldıqları da deyilənləri təsdiqləyir. 12 mart mitinqinin uğursuzluğu göstərdi ki, partiyaları daxilində demokratiya yarada bilməyən, qarşıdurmalar, intriqalar törədərək bundan öz maraqları naminə istifadə edən partiya sədrlərinin arxasınca heç kim getmir. Yenidən mitinq keçirmək istəyində olan və aksiya zamanı hakimiyyət orqanları ilə qarşıdurma yaradacaqlarını açıq şəkildə bəyan edən ifrat radikallar bir daha nəyə qadir olduqlarını göstərirlər.

Milli Məclisin deputatı, Milli Dirçəliş Hərəkatının sədri Fərəc Quliyev də müxalifət həmkarlarının siyasi mübarizə metodlarını yanlış sayır:

- Özünü müxalifət hesab edən bu "qüvvələr"in siyasi mübarizə metodlarını normal qəbul etmirəm. Biz də müxalifət təşkilatıyıq. Hesab edirəm ki, sovet dönəmində aparılan siyasi mübarizə metodlarını müstəqil respublikamızda tətbiq etmək yersizdir. Həmin dövrdə SSRİ-dən ayrılmaq və müstəqillik uğrunda mübarizə aparırdıq. Bu gün isə müstəqil respublika olaraq ölkəmizi gücləndirmək və daha da inkişaf etdirmək istiqamətində çalışmalıyıq. Siyasi mübarizə, bir növ, yarış xarakteri daşımalıdır. Siyasi qüvvələr arasında intellekt mübarizəsi getməlidir. Söhbət müxalifətdə təmsil olunan qüvvələrin alternativ proqramlar ortaya qoymasından, potensial imkanlarına uyğun fəalyyət göstərməsindən gedir. Siyasi qüvvələr arasında gedən mübarizə də sivil, demokratik prinsiplərə uyğun olmalı, ölkənin milli maraqlarına cavab verməlidir.

Son aylar ərəb ölkələrində baş verən inqilablara gəlincə, hesab edirəm ki, bu proseslərin başvermə səbəblərinə diqqət yönəltmək lazımdır. Ərəb ölkələrində cərəyan edən hadisələr müəyyən xarici dövlətlərin təsiri və maraqları nəticəsində baş verir. Həmin xarici dairələr ərəb ölkələrində qarşıdurma yaratmaq, bundan öz məqsədləri üçün istifadə etmək niyyətini güdürlər. Ərəb ölkələrində dəyişikliklər etmək adı altında radikal islamçı qüvvələrə dəstəyin verilməsi də müəyyən məqsədlərə xidmət edir. Bu ölkələrdə öz adamlarını yenidən dəyişmək metodundan istifadə edən böyük dövlətlər "dəyişiklik" etdiklərini göstərməyə çalışırlar. Konkret olaraq Azərbaycanda hər hansı xarici dairələrin öz məqsədləri naminə oyun qurmasının tamamilə əleyhinəyəm. Ölkədə ən müxtəlif sferalarda islahatlar həyata keçirilir və bu islahatların daha da gücləndirilməsinin tərəfdarıyam. Müxalifət düşərgəsini təmsil edən şəxs kimi deyə bilərəm ki, Milli Məclisin tribunasından ölkədə həyata keçirilən işlərlə bağlı kifayət qədər fikirlərimi bildirmişəm. Bu yaxınlarda hökumətin hesabatı müzakirə edilən zaman ötən müddətdə görülən müsbət işlərlə yanaşı, çatışmazlıqlarla da bağlı fikirlərimi açıqladım. Bir daha qeyd edirəm ki, hansısa ölkədə dağıdıcılıqla, bölücülüklə müşahidə olunan proseslərin ölkəmizə transferini düzgün saymıram.

Bu gün özünü müxalifət hesab edən dairələr ölkədə sivil, demokratik siyasi mübarizə aparmaq əvəzinə inqilab tərəfdarı kimi çıxış edirlər. Hesab edirəm ki, ölkədə bütün proseslər yalnız sivil, demokratik qaydada həyata keçirilməlidir. Azərbaycanı istəməyən kifayət qədər xarici qüvvələr var ki, hər an qarşıdurma yaratmaqda maraqlıdırlar. Azərbaycanın milli maraqlarına zidd addım atan bu qüvvələrin əlinə əlavə imkanlar vermək olmaz. Antiazərbaycançı qüvvələr ölkəmizdə xaos, qarşıdurma yaratmaqda maraqlı olduqlarını heç gizlətmirlər də. Biz ölkəmizdə bütün sahələrdə davamlı inkişafın olmasında, insanların sosial rifah halının yüksəlməsi istiqamətində islahatlar aparılmasında maraqlıyıq. Ölkə başçısının bu istiqamətdə gördüyü işləri, xüsusilə də korrupsiya hallarının aradan qaldırılması sahəsində həyata keçirdiyi tədbirləri müsbət qiymətləndirirəm. Hansısa xarici dövlətdən örnək götürüb Azərbaycanda xaos yaradılmasının tamamilə əleyhinəyəm.

- Xarici antiazərbaycançı dairələrin tapşırığı ilə ifrat radikal müxalifətin ölkədə qarşıdurma yaratmaq istəyi aydın görünməkdədir. Sizcə, bu dairələr "siyasi ekspermentlər" dövrünün başa çatdığının fərqində deyillərmi?

- Mənim müxalifətçiliyim ayrı-ayrı fərdlərə qarşı deyil. Mən bütünlüklə mövcud problemlərə qarşı müxalifət mövqeyindəyəm. Azərbaycan hakimiyyətində təmsil olunan şəxslərdən hər hansı biri milli maraqlardan çıxış edirsə, biz o fikri dəstəkləyirik. Eynilə müxalifətdə təmsil olunan şəxslərin də ölkəmizin inkişafı naminə pozitiv mövqedən çıxış etməsi biz tərəfdən müsbət dəyərləndirilir. Biz Azərbaycanda xarici qüvvələrin qurduğu oyunların oyunçusuna çevrilib milli maraqlara zidd addımlar atan istənilən qüvvəyə qarşıyıq. Milli azadlıq hərəkatı dövründə bir cərgədə olduğum, sonradan isə ayrılmış bəzi adamlar, ola bilsin ki, mənim mövqeyimlə razı deyillər.

Vaxtilə bu şəxslər "narıncı köynəklər" geyinərək küçələrə çıxırdılar. "Narıncı inqilab" arzusunda olan bu şəxslər sonradan öz yaxın tərəfdarlarını da aldatdılar. Mən həmin vaxt bildirmişdim ki, ölkədə dəyişikliklər etmək üçün kiminsə köynəyini geyinməyə dəyməz. Bugünün özündə də ən müxtəlif fondlar Azərbaycana böyük qrantlar yönəldirlər. Bu qrantlar məqsədli şəkildə ayrılır. Ən müxtəlif fondlar Azərbaycanın maraqlarına zərbə vurmaq üçün lobbiçilik işindən belə çəkinmirlər, ikili standartlarla Azərbaycana baxırlar. Bu dairələr aldıqları qrantlar hesabına fəaliyyətlərini qurur və "ağa"larına vaxtaşırı hesabatlar verirlər. Azərbaycanda müəyyən xarici qüvvələrin təsiri ilə qarşıdurma yaratmaq istəyən qüvvələr mövcuddur. Bu qüvvələrin "gücü" də, əslində, ortalıqdadır. Həmin insanları Azərbaycan xalqı çox yaxşı tanıyır.

Martın 12-də özünü müxalifətçi sayan dairələrin keçirdikləri mitinq-yürüş onların nəyə qadir olduqlarını bir daha ortaya qoydu. Xalq kimin kim olduğunun fərqindədir. Mən Azərbaycanın maraqlarına uyğun olmayan istənilən davranışın əleyhinəyəm.

- İfrat radikal dairələrin şəxsi maraqlarını partiya və ümummilli maraqlardan üstün tutması da zaman-zaman müşahidə olunub...

- Bilirsinizmi, köhnə mübarizə üsullarından imtina etməyin vaxtı çatıb. İndi demokratik mübarizə aparmaq lazımdır. Hesab edirəm ki, ölkədə mövcud problemləri göstərən və onların həllinə diqqəti yönəldə bilən sanballı qüvvələrin ortada olması labüddür. Mövcud çatışmazlıqların aradan qaldırılması üçün konkret mövqe ortaya qoymaq lazımdır. Özlərinə "ana müxalifət" adı qoyan bu adamlar istənilən addımları ata bilərlər. Bugün ərəblər fəallaşıbsa, onda bu radikal dairələr ərəb çalması bağlayırlar, sabah şotlandlar mübarizəyə qalxarsa, belə çıxır ki, onlar şotland şalvarları geyinəcəklər. Azərbaycanda hansısa dövlətdə baş verən siyasi mübarizə metodlarını tətbiq etmək yanlışdır.

Digər tərəfdən, bu insanlar dəyişiklik etmək fikrində deyillər. İndiyə qədər bu insanlar "şapalaq" yazılardan savayı, cəmiyyətə aydın bir platforma, fundamental ideya təqdim etməyiblər. Özlərini müxalifətçi sayan bu şəxslər ancaq bir-birlərinin qeybətini etmək, köhnə dostlarının qarasına danışmaqdan o tərəfə keçməyiblər. Ancaq şəxsi maraqlarını güdürlər, lazım gəldikdə isə bunun naminə hətta düşmənlə də ittifaqa gedirlər. Buna fakt kimi həmin radikal müxalifət dairələrinin xaricdəki ermənipərəst siyasi dairələrlə fəal əməkdaşlığını misal gətirmək olar. Məlum olduğu kimi, Müsavat Partiyasının rəhbəri İsa Qəmbər Ermənistan Ümummilli Hərəkatı ilə qarşılıqlı əməkdaşlıq haqqında bəyannamə imzalayıb. Ermənistan Ümummilli Hərəkatı erməni ideoloqlarını idarə edən mərkəzlərdən sayılır. Bundan əlavə, müxalifət düşərgəsindən ermənilərlə danışıqlara gedənlər oldu və ifşa olunaraq həbs edildilər. Bu gün bir qrup da yaranıb ki, özünün xalqın adından danışmağa haqqı çatdığını bəyan edib. Bu, tamamilə yanlışdır. İctimai Palata adlanan qurumda təmsil olunanlar yalnız qurumun adından danışa bilərlər, xalqın yox. Xalqın adından yalnız Prezident və deputatlar söz deyə bilərlər.

- İfrat radikal dairələr aprelin 2-də mitinq-yürüş keçirəcəklərinə qərar veriblər. Ötən mitinq təcrübəsi göstərdi ki, bu dairələrin arxasınca heç kim getmir. Sizcə, buna başlıca səbəb nədir?

- Bu şəxslərin arxasınca xalqın getməməsinin bir neçə səbəbi var. Əvvəla, yalnız seçkidən-seçkiyə insanların yanına getmək düzgün taktika deyil. Bunu insanlar qəbul etmirlər. İnsanların problemləri ilə daim maraqlanmaq lazımdır. Digər tərəfdən, partiya rəhbərləri nə istədiklərini bilməlidirlər. Onlar deyirlər ki, hakimiyyət getməlidir. Ancaq bu şəxslərin hakimiyyətə gəlib xalqa nə verəcəkləri ilə bağlı alternativ proqramları yoxdur. Bir başqa məsələ də var ki, onlar Elçibəy yoluna xəyanət etdilər, bu da hamıya yaxşı məlumdur. Bunların hamısı gözümüzün qarşısında baş verib. Bu adamlar strateji məqamlarda tamamilə fərqli davranşılar nümayiş etdirirlər. Xalqın bu insanların arxasınca getməməsinin mühüm səbəblərindən biri də onların öz mövqelərini bir neçə dəfə dəyişməsidir. Dəfələrlə radikal partiya sədrləri ən müxtəlif məsələlərdə birgə mövqedən çıxış edəcəklərini bəyan etsələr də, son anda fərqli addımlar atıblar. Bir müddət əvvəl AXCP-Müsavat birliyindən söhbət gedirdi. Yenə də nəticəsiz qaldı. Bu partiyaların bir yerdə olması heç zaman mümkün olmayacaq. Qeyri-standart davranışlar, öz yaxınlarını aldatmalar onların siyasi iflasını sürətləndirib.

12 mart mitinqində radikal dairələrin sosial bazalarının kifayət qədər kasad olduğu bir daha görsəndi. Normal siyasi rəqabət aparılmalıdır. Seçkilərə sivil mübarizə metodları ilə getmək lazımdır. Bu insanlar uzun müddət tərəfdarlarını aldatmaqla məşğul olublar və yalan vədlər veriblər. Müxalifətçilik hakimiyyətdə təmsil olunan ayrı-ayrı şəxslərə qarşı düşmənçilik yaratmaq deyil, görülən işlərə verilən düzgün qiymətlə ölçülür. Görülən müsbət işlərə də, çatışmazlıqlara da obyektiv münasibət bildirilməlidir. Cəmiyyətdə bölücülük, qarşıdurma yaratmaq, milli və dövləti maraqlara zidd bəyanatlarla çıxış etmək müxalifətçilik deyil.

Aprelin 2-də də onları eyni aqibət gözləyir. Heç kəs bu qüvvələrin arxasınca getməyəcək. Yenə də bir qrup adam sosial şəbəkələrdə mitinqöncəsi təbliğatla məşğuldur. Ancaq bunun da bir xeyri olmayacaq. Mən tamamilə əminəm ki, onlar istədikləri yerdə mitinq keçirsələr belə heç kim ora getməyəcək. Bununla da məsələ həll olunacaq. Çünki radikal müxalifətin sosial bazası yoxdur, tam tükənib. Hesab edirəm ki, onların mitinqöncəsi çağırışlarına da səs verən olmayacaq. Çünki mənasız və hədəfsiz bir şeyə cəmiyyətdə reaksiya verilməyəcəkdir. Aksiya zamanı zorakı metodlardan istifadə edəcəkləri barədə fikir səsləndirmələrinə gəlincə, hesab edirəm ki, bu da fiaskoya uğrayacaqdır.

Müsahibəni yazdı: E.HACIALIYEV

Azərbaycan.- 2011.-30 mart.- S. 3.