Çexiyanın sığorta-pensiya orqanının nümayəndə heyəti Azərbaycanda səfərdədir

Çexiya Respublikasının sığorta-pensiya orqanının rəhbər şəxslərindən ibarət nümayəndə heyəti Azərbaycanda səfərdədir. Mayın 7-dək davam edəcək səfər zamanı iki ölkə arasında sosial təminat sahəsi ilə bağlı yeni saziş layihəsi və bir sıra digər mühüm məsələlər müzakirə ediləcək.

Xatırladaq ki, ötən ilin sentyabr ayında Dövlət Sosial Müdafiə Fondunun (DSMF) mütəxəssislərindən ibarət nümayəndə heyəti Çexiya Respublikasında səfərdə olmuşdur. Çexiyanın sığorta-pensiya orqanının dəvəti ilə baş tutan səfər zamanı tərəflər bir sıra məsələlərlə bərabər, "Azərbaycan Respublikası və Çexiya Respublikası arasında sosial təminat sahəsində Saziş" layihəsini ətraflı müzakirə etmişlər.

Çexiyanın sığorta-pensiya orqanının rəhbər şəxslərindən ibarət nümayəndə heyətinin ölkəmizə budəfəki səfəri zamanı keçiriləcək görüşlərdə layihə ilə bağlı danışıqların ikinci mərhələsi aparılacaq. Bundan başqa, nümayəndə heyəti DSMF aparatının işi, burada qurulan müasir məlumatlandırma sistemi, həmçinin fondun rayon şöbələrinin fəaliyyəti ilə tanış olacaqlar. Məlumatı DSMF-nin ictimaiyyətlə əlaqələr sektoru yayıb.

Azərbaycan.- 2011.-4 may.- S. 6.