Səlahəddin Xəlilovun “Elm haqqında elm” kitabı Elmin İnkişafı Fonduna təqdim olunmuşdur

AMEA-nın müxbir üzvü Səlahəddin Xəlilovun “Elm haqqında elm” kitabı Azərbaycan Respublikasının Prezidenti yanında Elmin İnkişafı Fonduna (EİF) təqdim olunmuşdur.

Kitabın elmi redaktoru və ön sözün müəllifi akademik Ramiz Mehdiyev, rəyçiləri akademiklər Mahmud Kərimov və Arif Mehdiyevdir.

EİF-dən AzərTAc-a bildirmişlər ki, kitabda elmin genezisi, məqsədi və funksiyaları, inkişaf qanunauyğunluğu haqqında müfəssəl məlumat verilmişdir.

Yeni nəşrdə elm fəlsəfəsi, elmin tarixi və sosiologiyasına dair tədqiqatlara ümumi nəzər salınmış, habelə “elm haqqında elm”, “elmşünaslıq” adı altında yazılmış əsərlərin əsas istiqamətləri nəzərə alınmaqla, elmə yeni baxış bucağından qiymət verilmişdir. Elmin daxili məzmunu, epistemologiyası ilə yanaşı, onun sosial aspektləri, iqtisadi səmərəsi və təşkilati strukturu ilə bağlı məsələlər də kompleks tədqiq olunur.

Kitab elm adamları, həmçinin elmin dəyərləndirilməsində və tətbiqində maraqlı olan şəxslər üçün nəzərdə tutulmuşdur.

Azərbaycan.- 2011.-6 may.- S. 4.