Azərbaycan ilə Monteneqro arasında iqtisadi əlaqələrin inkişafı üçün geniş potensial vardır

Monteneqroya rəsmi səfəri çərçivəsində mayın 5-də Azərbaycanın xarici işlər naziri Elmar Məmmədyarovun bu ölkənin Prezidenti Filipp Vuyanoviç, Baş nazir İqor Lukşiç, parlamentin Sədri Ranko Krivokapiç və Bar şəhərinin meri Jarko Paviçeviç ilə görüşləri olmuşdur.

Azərbaycanın Xarici İşlər Nazirliyindən AzərTAc-a bildirmişlər ki, görüşlərdə E.Məmmədyarovun Monteneqroya səfərinin, eyni zamanda, keçən il noyabrın 26-27-də monteneqrolu həmkarı Milan Roçenin ölkəmizə gəlməsinin qarşılıqlı əlaqələrin inkişafı baxımından önəmli olduğu vurğulanmış, dövlətlərimiz arasında münasibətlərin inkişaf etdirilməsi üçün yaxşı imkanlar yaradacağına əminlik bildirilmişdir.

Azərbaycanlı nazirin Monteneqro Prezidenti ilə görüşdə Filipp Vuyanoviç vurğulamışdır ki, onun ölkəsi bütün dövlətlərin ərazi bütövlüyünə və sərhədlərin toxunulmazlığına hörmətlə yanaşır.

Bundan əlavə, görüşdə Azərbaycan ilə Monteneqro arasında ikitərəfli münasibətlərin genişləndirilməsinin vacibliyi qeyd olunmuşdur.

E.Məmmədyarov Azərbaycan ilə Monteneqronun dost ölkələr olduğunu, iki dövlət arasında iqtisadi əlaqələrin inkişafı üçün də geniş potensialın olduğunu vurğulamışdır. Nazir qarşılıqlı səfərlərin ikitərəfli əlaqələrin inkişafına xidmət edəcəyinə ümidvar olduğunu deyərək Azərbaycan ilə Monteneqro arasında münasibətləri təkcə ikitərəfli müstəvidə deyil, eləcə də ölkələrimizin üzv olduğu beynəlxalq təşkilatlar çərçivəsində inkişaf etdirməyin vacibliyini bildirmişdir

Azərbaycan.- 2011.- 7 may.- S. 10.