Sığorta-pensiya sistemində şəffaflıq əsas prinsipdir

Əhalinin etibarlı sosial müdafiəsinin təşkili istiqamətində görülən tədbirlərin davamlı olaraq genişləndirilməsi ölkə vətəndaşlarının maddi rifah halının yüksələn xətt üzrə inkişafına təsir göstərən əsas amillərdən biri kimi çıxış edir.

Bu baxımdan Prezident İlham Əliyevin rəhbərliyi ilə həyata keçirilən genişmiqyaslı islahatların tərkib hissəsi kimi sığorta-pensiya sisteminin daha da təkmilləşdirilməsi və dayanıqlı inkişafına nail olunması, həmçinin əmək pensiyaçılarının sosial müdafiəsinin gücləndirilməsi tədbirləri uğurla davam etdirilməkdədir. Sığorta-pensiya sistemi üzrə aparılan islahatların nəticəsində əmək pensiyalarının məbləği dəfələrlə artıb və bu siyasət uğurla davam etdirilməkdədir. Prezident İlham Əliyevin Nazirlər Kabinetinin 2011-ci ilin birinci rübünün yekunlarına həsr olunmuş iclasında vətəndaşların 2006-cı il yanvarın 1-dək olan dövrdə qazanılmış pensiyalarının yenidən hesablanması barədə verdiyi tapşırıq bunun əyani sübutudur.

Uğurlu islahatlar sayəsində əmək pensiyaçılarına xidmət müasirləşdirilərək, yüksək səviyyədə təşkil olunub. Bu məqsədlə Dövlət Sosial Müdafiə Fondunun (DSMF) şöbələrinin infrastrukturları yenidən qurulub, onların maddi-texniki bazası möhkəmləndirilib, şöbələr Avropa standartlarına uyğun yeni inzibati binalarla təmin edilib. Bütün iş yerləri müasir kompüterlərlə, avadanlıqlarla, eləcə də mebellə təchiz olunub ki, bu da rayon ərazisində yaşayan pensiyaçılara, həmçinin sahibkarlara yüksək səviyyədə, şəffaf şəkildə xidmət göstərməyə imkan verir. Yerli şöbələrdə əmək pensiyaçılarına, ahıl vətəndaşlara xidmət imkanları genişləndirilmiş, bunun üçün müasir avadanlıqlar quraşdırılmışdır.

Dövlət Sosial Müdafiə Fondunun digər rayon şöbələrində olduğu kimi, Goranboy rayon şöbəsinin də əsas iş yerləri avtomatlaşdırılıb. Burada internet xəttinə qoşulmuş kompüterdən ibarət lokal şəbəkə istifadədir ki, bu da rayon sakinlərinin xidmətində və işin səmərəliyində müsbət haldır. O da təqdirəlayiq haldır ki, DSMF-nin sığorta-pensiya sisteminin inkişafı sahəsində həyata keçirdiyi tədbirlər fondun yerli orqanlarının da məsuliyyətini xeyli artırıb. Belə ki, rayon əhalisinin əmək pensiyası və məcburi dövlət sosial sığorta haqları hesabına ödənilən müavinətlərin təyin olunması və ödənişinin vaxtında həyata keçirilməsi üçün məcburi dövlət sosial sığorta haqları üzrə proqnoz tapşırığının yerinə yetirilməsi əsas vəzifə kimi müəyyənləşdirilib. Bu sahədə işin aparılması zamanı şəffaflığın artırılması əsas amillərdən biri hesab edilir.

Fondun Goranboy rayon şöbəsində əhaliyə xidmət sahəsində şəffaflıq təmin olunub. Şöbənin müdiri Eyvaz Nəcəfov bildirdi ki, hazırda şöbə üzrə müraciət edən vətəndaşların qəbul edilməsi və onları maraqlandıran məsələlərin aydınlaşdırılması və həlli istiqamətində operativ tədbirlərin həyata keçirilməsi üçün inzibati binada növbətçilik qrafiki və "qaynar xətt" yaradılıb. Vətəndaşların müraciətlərinin operativ qaydada cavablandırılması və həll edilməsi üçün onlar növbətçi tərəfindən istiqamətləndirilir. Vətəndaşların müraciətlərinə baxılması üçün qəbul günləri təyin olunub. Ərizə və şikayətlərin araşdırılması və qanunvericiliyə uyğun olaraq həll edilməsi üçün şöbədə komissiya yaradılıb. Bütün ərizə və şikayətlər komissiya tərəfindən araşdırılaraq vətəndaşların iştirakı təmin edilməklə şöbənin ümumi iclasına çıxarılır və qəbul olanan qərara uyğun həll edilir. Cari ilin ötən dövrü ərzində şöbəyə ümumilikdə vətəndaşlar tərəfindən 21 ərizə və müraciət daxil olub. Bu ərizələr şöbədə diqqətlə araşdırılıb, vətəndaşlara müraciətləri ilə bağlı geniş izahatlar verilib. İş prosesi zamanı şöbənin məsul şəxslərinin funksional vəzifələrinin icrası zamanı dövlət qulluqçusunun etik davranış qaydalarına əməl olunmasına ciddi riayət edilməsi daim nəzarətdə saxlanılır. 2011-ci ilin yanvar-aprel ayları ərzində yuxarı orqanlara ünvanlanmış müvafiq iki müraciət ərizəsinə şöbənin ümumi iclasında şikayətçilərin iştirakı ilə baxılıb və müsbət həlli istiqamətində müvafiq qərarlar çıxarılıb.

Şəffaflığın artırılması istiqamətində görülən tədbirlər, verilən tapşırıqların vaxtında yerinə yetirilməsi fondun Goranboy rayon şöbəsinin rüblük proqnozu tam yerinə yetirməsinə imkan yaradıb. Şöbə tərəfindən 2011-ci ilin yanvar-aprel ayları üçün məcburi dövlət sosial sığorta haqları üzrə 1 milyon 392,3 min manat proqnoz tapşırığa qarşı 1 milyon 424,3 min manat icra edilərək 102,3 faiz yerinə yetirilib. Hesabat dövründə məcburi dövlət sosial sığorta haqları və ona tətbiq olunmuş maliyyə sanksiyalarının ödənilməsi üçün şöbə tərəfindən qanunvericilikdə müəyyən edilmiş tədbirlər davam etdirilib.

Hazırda şöbə 13984 nəfər əmək pensiyaçısına xidmət edir və onların hamısı öz pensiyalarını vaxtında plastik kartlarla alırlar. Dövlət sosial sığorta sistemində fərdi uçotun tətbiqi ilə əlaqədar idarə, müəssisə və təşkilatlarda çalışan işçilərə, əmək və sahibkarlıq fəaliyyəti ilə məşğul olan şəxslərə, torpaq pay mülkiyyətçilərinə və onların əmək qabiliyyətli ailə üzvülərinə fərdi hesablar açılıb. Sığortaedənlər tərəfindən 2006-2009-cu illər üçün təqdim olunmuş "Sığortaolunanlar haqqında məlumatlar" qəbul edilərək 6 milyon 14,1 min manat ödənilmiş sosial sığorta haqları sığortaolunanların fərdi şəxsi hesablarında əks etdirilib.

Goranboy rayon şöbəsı tərəfindən əhalinin maarifləndirilməsi üçün də müvafiq tədbirlər həyata keçirilməkdədir. Şöbənin məsləhətçiləri tərəfindən sığortaedənlər və sığortaolunanlarla mütəmadi olaraq sosial sığortanın və fərdi uçot sisteminin əhəmiyyəti barədə təşviqat işləri aparılır və hər bir işçinin işə başlayarkən mütləq rəsmi əmək müqaviləsinin bağlanması və məcburi dövlət sosial sığortasına cəlb edilməsinin vacibliyi izah edilir. Rayon üzrə məcburi dövlət sosial sığorta haqlarının ödənilməsi və ümumiyyətlə, sosial sığorta anlayışı, onun sosial təminat forması olması və sosial sığorta hadisələri mövzusunda şöbə tərəfindən məlumat və maarifləndirmə qaydasında müxtəlif tədbirlər təşkil edilib. E.Nəcəfov vurğuladı ki, bu səpkidə təbliğat işləri davam etdirilməkdədir.

DSMF son illər ərzində sığorta-pensiya sistemi sahəsində çox vacib və mütərəqqi islahatlar həyata keçirir və bu istiqamətdə əhəmiyyətli nailiyyətlər əldə edilir. Həyata keçirilən sığorta-pensiya islahatları şöbə tərəfindən müxtəlif telekanallar və mətbuat vasitəsilə əhaliyə çatdırılır. Əmək pensiyaları sahəsində aparılan islahatlar istənilən pensiyaçıya fərdi qaydada izah edilməklə yanaşı, müxtəlif ictimai təşkilatlara və digər müraciətçilərə ətraflı məlumatlar verilir.

E.Nəcəfov bildirdi ki, DSMF-nin Goranboy rayon şöbəsi 2011-ci ildə fondun aparatının müəyyənləşdirdiyi tədbirlər planına müvafiq olaraq şöbənin sığorta-pensiya sahəsində fəaliyyətinin qanunvericiliyin tələblərinə müvafiq olaraq qurulması və bu sahədə şəffaflığın təmin edilməsi üçün bütün imkanlardan maksimum istifadə edəcəkdir.

R.BAYRAMOV

Azərbaycan.- 2011.-15 may.- S.5.