Mətbuat Şurasında Berlin Jurnalistlər Məktəbinin əməkdaşı ilə görüş keçirilmişdir

Azərbaycan Mətbuat Şurasında Berlin Jurnalistlər Məktəbinin əməkdaşı Klemens Şöl ilə görüş keçirilmişdir.

AzərTAc xəbər verir ki, KİV təmsilçilərinin və media ekspertlərinin iştirak etdikləri toplantıda Berlin Jurnalistlər Məktəbinin Robert Boş Fondu ilə birlikdə reallaşdırdığı “Mətbuat - xalqlar arasında vasitəçi kimi” layihəsinin təqdimatı keçirilmişdir.

Mətbuat Şurasının sədri Əflatun Amaşov görüşü açaraq layihənin əhəmiyyətindən danışmış, qonaqları təqdim etmiş, Şuranın gördüyü işlər barədə məlumat vermişdir.

Proqramın rəhbəri Klemens Şöl tədbir iştirakçılarının diqqətinə çatdırmışdır ki, layihə əsasında müsabiqə yolu ilə seçilmiş Mərkəzi və Şərqi Avropa ölkələrindən 25-35 yaşları arasında olan və alman dilində sərbəst danışan peşəkar jurnalistlər 3 ay ərzində Berlin şəhərində fəaliyyət göstərən alman mətbuat orqanında təcrübə keçmək imkanı qazanacaqlar.

Məlumat verilmişdir ki, 2003-cü ildən başlayan bu layihədə indiyədək müxtəlif ölkələrdən ümumilikdə 140 jurnalist iştirak etmişdir.

Görüşdə çıxış edən “Yeni Azərbaycan” qəzetinin baş redaktoru Hikmət Babaoğlu Almaniya ilə Azərbaycan arasında əlaqələrin hər zaman dinamik olduğunu bildirmişdir. Media sahəsində də münasibətlərin inkişafının vacibliyini vurğulayan baş redaktor mövcud layihənin bu baxımdan mühüm əhəmiyyət kəsb etdiyini, Azərbaycan jurnalistlərinin irəli sürülən təşəbüssün reallaşmasında fəallıq göstərəcəklərinə ümid etdiyini söyləmişdir.

Mətbuat Şurası idarə heyətinin üzvü, “İki sahil” qəzetinin baş redaktoru Vüqar Rəhimzadə də Berlin Jurnalistlər Məktəbi tərəfindən reallaşan layihənin əhəmiyyətini diqqətə çatdırmış və layihədə Azərbaycan jurnalistlərinin iştirakı ilə əlaqədar prosedur qaydaları ilə maraqlanmışdır.

Bildirilmişdir ki, bu layihə qədim tarixi kökləri olan Azərbaycan-Almaniya münasibətlərinin inkişafına, o cümlədən iki dost ölkə arasında jurnalistika sahəsində əməkdaşlığın dərinləşməsinə öz layiqli töhfəsini verəcəkdir.

Sonda almaniyalı qonaq tədbir iştirakçılarını maraqlandıran sualları cavablandırmışdır.

Proqram barədə ətraflı məlumatı aşağıdakı internet səhifələrindən əldə etmək olar:http://www.berliner-journalisten-schule.de/, www.medien-mittler.de

Azərbaycan.- 2011.- 21 may.- S. 2.