YUNESKO-nun görüş-treninqində qeyri-maddi mədəni irsin qorunmasının perspektivləri müzakirə edilmişdir

Mayın 19-dan 21-dək Belarusun paytaxtı Minskdə "Qeyri-maddi mədəni irsin qorunması üzrə milli potensialın möhkəmləndirilməsi" mövzusunda məşvərətçi ekspert görüşü və YUNESKO-nun Moskva Bürosunun klaster ölkələrinin treninqi keçirilmişdir.

Mədəniyyət və Turizm Nazirliyinin mətbuat xidmətindən AzərTAc-a bildirmişlər ki, görüş-treninqdə ölkəmizi nazirliyin qeyri-maddi mədəni irs sektorunun müdiri Yaşar Hüseynli və YUNESKO üzrə Azərbaycan Respublikası Milli Komissiyası Daimi Katibliyinin III katibi Nərminə Çəndirli təmsil etmişlər.

Belarusun Mədəniyyət Nazirliyi, bu ölkənin Milli Elmlər Akademiyasının Sənətşünaslıq, Etnoqrafiya və Folklor İnstitutu və YUNESKO üzrə Belarus Respublikasının Milli Komissiyası tərəfindən təşkil olunmuş görüş-treninqdə Azərbaycan ilə yanaşı, Belarus, Bolqarıstan, Qırğızıstan, Ermənistan, Moldova, Rusiya Federasiyası və eyni zamanda YUNESKO-nun nümayəndələri iştirak etmişlər.

Görüş-treninqin əsas aparıcısı qismində Qeyri-Maddi Mədəni İrsin Qorunmasına dair YUNESKO Konvensiyasının ilk katibi və məşqçi-eksperti Smits Qenrikus çıxış etmişdir.

Üç gün davam edən görüş-treninq zamanı Qeyri-Maddi Mədəni İrsin Qorunmasına dair YUNESKO Konvensiyasının və onun icrası üzrə operativ rəhbərliyin təqdimatı keçirilmişdir. Həmçinin qeyri-maddi mədəni irsin qorunması işində dövlətin, icmaların və digər maraqlı tərəflərin rolu, qeyri-maddi mədəni irsin müəyyən edilməsi, sənədləşdirilməsi və siyahıya alınması (reyestrləşdirilməsi), sözügedən Konvensiyanın və operativ rəhbərliyin milli səviyyədə implementasiyası, beynəlxalq əməkdaşlığın qurulması kimi mövzular təhlil edilmişdir.

İştirakçılar, həmçinin Qeyri-Maddi Mədəni İrsin Qorunmasına dair YUNESKO Konvensiyasının icrası çərçivəsində üzv ölkələrin öhdəlikləri, bu sahədəki problemləri, üzv ölkələrin təcrübələri, klaster ölkələrində reyestrlərin tərtib edilməsi prosesləri və qeyri-maddi mədəni irsin qorunmasına dair müxtəlif məsələlər, o cümlədən gələcək planlar və layihələr, beynəlxalq əməkdaşlıq və tövsiyələrin işlənilməsi ətrafında diskussiyalar aparmışlar.

Ölkəmizin nümayəndələri dövlətimiz tərəfindən milli qeyri-maddi mədəni irsin qorunması istiqamətində aparılan məqsədyönlü siyasətdən bəhs etmişlər. Onlar müvafiq tədbirlər nəticəsində Azərbaycan muğamının, aşıq sənətinin, Novruz bayramının və xalçaçılıq sənətinin YUNESKO-nun "Bəşəriyyətin Qeyri-maddi mədəni irs üzrə Reprezentativ siyahısı"na daxil edilməsi ilə bağlı məlumat vermişlər.

Görüş-treninqdə Mədəniyyət və Turizm Nazirliyi tərəfindən aparılmış "Azərbaycanın qeyri-maddi mədəni irsinin (diyarşünaslıq, folklor və sənətkarlıq) qorunmasının mədəni-siyasi təminat mexanizmlərinin monitorinqi" və bu monitorinqin nəticələri əsasında hazırlanmış "2012-2016-ci illərdə Azərbaycanın qeyri-maddi mədəni irsinin qorunmasına dair Dövlət Proqramı"nın layihəsi, "2010-2014-cü illər üçün Xalq Yaradıcılığı Paytaxtları", "Azərbaycanın qeyri-maddi mədəni irs abidələrinin Dövlət Reyestri"nin hazırlanması, "Azərbaycanın qeyri-maddi mədəni irs subyektlərinin (ifaçı, kollektiv, sənətkar və sair) portfolio bankı"nın toplanılması, "Şəhər (rayon) mədəniyyət mərkəzlərinin və onların filiallarının Dövlət Kadastrı"nın tərtib edilməsi, digər proqram və layihələr böyük marağa səbəb olmuşdur.

Azərbaycan.- 2011.-25 may.- S. 8.