Cəmiyyət həyatında gənclərin fəal iştirakının təmin edilməsi dövlət siyasətinin əsas istiqamətidir

Azərbaycan Respublikasının dövlət müstəqilliyinin bərpasının 20-ci ildönümünü təntənə ilə qeyd etdiyimiz bir dövrdə keçirilən Azərbaycan gəncliyinin VI forumu çox əlamətdar və tarixi bir hadisə kimi yaddaşlara köçdü. İlk dəfə 15 il bundan öncə - 1996-cı il fevralın 2-də ulu öndərin təşəbbüsü ilə keçirilmiş belə bir toplantı Azərbaycanda aparılan gənclər siyasətinin istiqamətlərini müəyyənləşdirmişdir.

Ümummilli liderin həmin forumdakı dərin məzmunlu nitqi növbəti illərdə Azərbaycan gəncliyi üçün əsl fəaliyyət proqramına çevrilmiş, gənclərimizin vahid azərbaycançılıq ideologiyası ətrafında birləşməsində, onların ölkənin iqtisadi və müdafiə qüdrətinin möhkəmlənməsi sahəsindəki fəallığının artmasında mühüm rol oynamışdır. Elə həmin tarixin hər il Azərbaycan Gəncləri Günü kimi qeyd edilməsi barədə sərəncan imzalanmışdır. VI forumda qeyd edildiyi kimi, son 15 ildə dövlət gənclər siyasəti sahəsində böyük uğurlar qazanılmış, ictimai fəal gənclərin 200-dən artıq qeyri-hökumət təşkilatında birləşməsi sahəsində uğurlu addımlar atılmışdır. Forumda vurğulandığı kimi, müasir Azərbaycan gəncliyi cəmiyyətin şəffaflığının özəyi, dövlətin və dövlətçiliyin sarsılmazlığının, əbədiyaşarlığının qarantı, demokratikləşmə prosesinin mühüm tərkib hissəsi, ölkəmizin iqtisadi potensialının dinamik inkişafının əsas təkanverici qüvvəsidir.

Azərbaycan Respublikasının Prezidenti İlham Əliyevin dediyi kimi, "Ən qiymətli milli sərvətimiz olan Azərbaycan gəncliyinin cəmiyyətdə rolu çox böyükdür. Azərbaycanın dövlət müstəqilliyi uğrunda mübarizə aparan da, bu müstəqilliyi bərpa edən də məhz gənclər olublar. Orduda xidmət edən gənclər də bizim dəyərli vətəndaşlarımızdır. Çünki onlar Vətəni qoruyurlar, düşmənlə üzbəüz mövqedə dayanırlar. Lazım gələn anda məhz onlar doğma torpaqlarımızın düşmən tapdağından xilası naminə ilk addımı atacaqlar. Azərbaycanı gələcəkdə məhz xalqın ayrılmaz bir parçası olan, ölkəmizin qədim tarixindən, milli-mənəvi dəyərlərindən bəhrələnən, yüksək potensial biliyə malik, ağıllı, mübariz, vətənpərvər gənclər idarə edəcəklər".

Elə buna görə də ölkə rəhbəri dövlətin milli strategiyasını formalaşdırarkən, ilk növbədə, gələcəkdə nəhəng layihələrin təməlçiləri olacaq, Azərbaycan dövlətinin sosial gerçəkliyinin mikro və makro mühitini formalaşdıracaq ağıllı, cəsarətli, işgüzar, vətənpərvər gənc nəsil haqqında düşünür. Çünki ulu öndərimizin dediyi kimi, gələcək bilikli, elmli, istedadlı, azərbaycançılıq ideologiyası ilə silahlanmış vətənpərvər insanların çiyinləri üzərində qurulur. Qeyd etdiyimiz kimi, respublikamızda dövlət gənclər siyasətinin formalaşdırılması ümummilli lider Heydər Əliyevin adı ilə bağlıdır. "Azərbaycan Respublikasının Gənclər və İdman Nazirliyi haqqında" Azərbaycan Respublikası Prezidentinin 1994-cü il 26 iyul tarixli fərmanı, "Gənclər siyasəti haqqında" Azərbaycan Respublikasının Qanunu və gənclər siyasəti sahəsində digər normativ hüquqi aktlar, habelə Azərbaycan gənclərinin forumlarının keçirilməsi gənclərlə iş sahəsinin hüquqi əsaslarını və icra mexanizmini müəyyən etmişdir. Azərbaycan Respublikası Prezidentinin 2005-ci il 30 avqust tarixli sərəncamı ilə təsdiq edilmiş "Azərbaycan Gəncliyi Dövlət Proqramı" (2005-2009-cu illər) dövlət gənclər siyasətinin həyata keçirilməsi yolunda mühüm fəaliyyət sənədi olmuşdur. Respublika Gənclər və İdman Nazirliyinin həmin Proqrama uyğun olaraq hazırladığı "Elektron Gənclik" layihəsi və Azərbaycan həqiqətlərinin dünya miqyasında təbliği sahəsində həyata keçirilən digər layihələr bu gün də səmərəli bəhrəsini verməkdədir. Erməni faşizminin 1905-1907, 1918-1920 və 1988-1993-cü illərdə məmləkətimizin müxtəlif bölgələrində törətdikləri ağlasığmaz vəhşiliklər və soyqırımılarının, Dağlıq Qarabağın və ətrafındakı rayonların erməni işğalına məruz qalması, talelərinə qaçqınlıq və məcburi köçkünlük möhürü vurulmuş 1 milyondan çox soydaşımızın 20 ildən artıq bir dövrdə doğma yurd-yuvalarına qayıtmaq həsrəti ilə çəkdikləri mənəvi əzablar barədə məlumatların dünya dövlətlərinin parlamentlərinə, kütləvi informasiya vasitələrinə, beynəlxalq siyasi təşkilatlara, ümumiyyətlə, 20 mindən artıq ünvana çatdırılmasında "Elektron Gənclik"in zəhməti əvəzsizdir. Öz sıralarında 200 minə yaxın gənci birləşdirən YAP Gənclər Birliyinin layihəsi əsasında 5 il bundan öncə yaradılmış, Azərbaycanın bütün bölgələrini əhatə edən Regional Əlaqələndirmə Mərkəzləri ölkəmizin müxtəlif zonalarında gənclər forumlarının keçirilməsi, öz ağıl və zəkaları, yüksək vətənpərvərlik ruhu ilə fərqlənən döyüşkən, mübariz gənclərin üzə çıxarılması sahəsində əsl fədakarlıq nümunələri göstərmişdir. Bu gün Azərbaycanda dövlət gənclər təşkilatları ilə bərabər, 200-ə yaxın qeyri-hökumət təşkilatı da fəaliyyət göstərir. Onlardan 65-i Avropa Gənclər Forumunun üzvü olan şurada təmsil olunur. Şuranın 6 regionda nümayəndəliyi, müxtəlif şəhərlərdə mərkəzləri və gənclər evləri var. Azərbaycan gəncliyinin sağlam mənəvi-siyasi ruhda yetişməsində, onların əsl vətənpərvər kimi formalaşmısında, xalqımızın zəngin tarixinə, mədəni irsinə, dövlət dilinə və rəmzlərimizə hörmət və ehtiram ruhunda tərbiyə edilməsində, beynəlxalq təşkilatlarla əməkdaşlığının genişləndirilməsində, istedadlı gənclərə öz qabiliyyətlərini ortaya qoymaq üçün geniş şərait yaradılmasında, onların Proqramda nəzərdə tutulmuş dövlət idarəçiliyi sistemində iştirakının gerçəkləşməsində şuranın uğurlu fəaliyyəti ölçüyəgəlməzdir.

Şuranın dünyanın onlarca qabaqcıl ölkəsinin gənclər təşkilatları ilə imzaladığı ikitərəfli müqavilələr, əməkdaşlıq və mübadilə proqramları çərçivəsində həyata keçirilən genişmiqyaslı tədbirlər və görüşlər dünya ölkələrinin bir-birlərinə qarşılıqlı inteqrasiyası baxımından da çox faydalıdır. Azərbaycanın gənclər təşkilatları həm respublika rəhbərinin düzgün daxili və xarici siyasət kursu, ölkəmizdə hüquqi, demokratik dövlət və sivil vətəndaş cəmiyyəti quruculuğu barədə əsl həqiqətləri dünya ictimaiyyətinə çatdırır, həm də həmin ölkələrin qabaqcıl təcrübəsinin, zəngin texnologiyalarının öyrənilib Azərbaycanda tətbiqinə ciddi səy göstərirlər. Forumda qeyd olunduğu kimi, Azərbaycan gəncləri ölkəmizin hüdudlarından kənarda da təşkilatlanaraq Azərbaycanın milli maraqlarının qorunması, xalqımızın tarixinin və zəngin mədəni irsinin beynəlxalq ictimaiyyət arasında təbliğ edilməsi istiqamətində də fəal iştirak edirlər. 2009-cu ildə Heydər Əliyev Fondunun vitse-prezidenti Leyla xanım Əliyevanın təşəbbüsü ilə yaradılmış və onun sədrlik etdiyi Rusiyanın Azərbaycanlı Gənclər Təşkilatı Rusiya Federasiyasının bütün subyektlərindən olan azərbaycanlı gəncləri vahid bir ideya bayrağı altında birləşdirməyə və bir sıra əhəmiyyətli layihələrin həyata keçirilməsinə nail olmuşdur. Forumda qeyd olunduğu kimi, gənclərin hərbi vətənpərvərlik tərbiyəsinin gücləndirilməsi də həmişə diqqət mərkəzindədir. Ötən ilin sentyabrında gənc snayper qızların Tacikistanda keçirilmiş yarışında Azərbaycanın MDB ölkələri arasında Belarus və Rusiyadan sonra üçüncü yerin qalibi olması qəlbimizi iftixar hissi ilə doldurdu. Bu, ən dar məqamda oğlanlarımızla bərabər, cəsarətli qızlarımızın da düşmənə qarşı mübarizənin ön cərgəsində olacaqlarından xəbər verir. Azərbaycan gəncliyinin hərbi vətənpərvərlik ruhunun artırılması ölkə rəhbərinin "Azərbaycan gəncliyi 2011-2015-ci illərdə" Dövlət Proqramının hazırlanması barədə imzaladığı sərəncamda da təxirəsalınmaz bir vəzifə kimi qarşıya qoyulub. Forumda həmin sərəncama uyğun olaraq Azərbaycan Respublikasında gənclər siyasətinin gənclərin vətənpərvərlik, azərbaycançılıq, dövlətçilik prinsipləri əsasında, Azərbaycan xalqının tarixi-mədəni irsinə, milli-mənəvi və ümumbəşəri dəyərlərə hörmət ruhunda tərbiyə olunması, cəmiyyətin ictimai-siyasi, sosial-iqtisadi və mədəni həyatında gənclərin fəal iştirakının təmin edilməsi, onların intellektual və yaradıcılıq potensialının ümummilli məsələlərin həllinə yönəldilməsi istiqamətində aparılması da vurğulanmışdır. Torpaqlarımızın düşmən əsarətindən xilası kimi ağır bir missiyanın daşıyıcısı olacaq Azərbaycan gəncliyinin döyüşkənlik ruhunun artırılması, mübarizə əzminin gücləndirilməsi günümüzün ən aktual mövzusuna çevrilməkdədir. İndiyədək bu sahədə görülmüş və bu gün də həyata keşirilməkdə olan işlərə gəldikdə isə hamısı fərəhlidir, ürəkaçandır. Şəki Şəhər Gənclər və İdman İdarəsinin, UMİT Gənclər Klubunun və Azərbaycan Texniki Universitetinin Tələbə Gənclər Təşkilatının birgə təşəbbüsü ilə erməni faşizminin Azərbaycanda törətdiyi vəhşi soyqırımı faktlarını xarici ölkələrə çatdırmaq məqsədilə həyata keçirilən kütləvi mail göndərmə aksiyası da təqdirəlayiq bir hadisə kimi dəyərləndirilməlidir. Belə ki, gənclər 5 min nəfərdən çox xarici ölkə vətəndaşının, bir sıra ölkələrin dövlət orqanları nümayəndələrinin, xarici xəbər agentliklərinin və beynəlxalq təşkilatların maillərinə soyqırımı haqqında ingilis dilinə tərcümə olunmuş məlumatlar gəndərmişlər. Şəki Şəhər Gənclər və İdman İdarəsinin təşəbbüsü ilə "Vətənin müdafiəsinə hazıram" devizi altında keçirilən idman yarışı, respublikamızın bir sıra orta tədris müəssisələrində "Biz sağlam ölkənin sağlam gəncləriyik", "Biz narkomaniyaya YOX deyirik", "Mən sabahın döyüşçüsüyəm" mövzularında keçirilən inşa yazı müsabiqələri və hərbi idman oyunları, Respublika Gənclər və İdman Nazirliyinin və Gənc Vətənpərvərlər Birliyinin maliyyə dəstəyi ilə paytaxtımızdakı 2 nömrəli Texniki Humanitar Liseydə "Bu gün bizim əsas vəzifəmiz gənclərin vətənpərvərlik ruhunu, milli ruhu, döyüş ruhunu qaldırmaqdır" mövzusunda keçirilən elmi-praktik konfrans və "Qələbə naminə" devizi altında yüngül atletika yarışı da yeniyetmə və gənclərin hərbi vətənpərvərlik tərbiyəsinə, onların fiziki, psixoloji və ideoloji hazırlığının gücləndirilməsinə öz müsbət təsirini göstərməkdədir. Könüllü Hərbi Vətənpərvərlik Texniki İdman Cəmiyyəti Respublika Şurasının sədri, general-mayor Novruzəli Orucovun fikrincə, hərbi xidmətə çağırışaqədərki dövrdə silahlı qüvvələrimiz üçün bəzi spesifik kadrların hazırlanması əsas vəzifə kimi qarşıda durur. Cəmiyyətin Avrasiya Mərkəzində indiyədək min nəfərdən artıq paraşütçü-desant hazırlanıb. Gənclərin paraşütdən tullanma kurslarına cəlb olunması onların bütün çətinliklərə mərdliklə sinə gərən cəsur döyüşçü kimi yetişmələrində mühüm rol oynayır.

Orta tədris müəssisələrində ibtidai hərbi hazırlıq dərslərinin gücləndirilməsi də Proqramda əsas məsələ kimi qarşıya qoyulur. Ancaq çalışmaq lazımdır ki, bu, formal xarakter daşımasın. Nə qədər ki, torpaqlarımız düşmən tapdağındadır bütün tədris müəssisələrində hərbi dərslərin artırılması üçün əməli tədbirlər görülməli, həmin məktəblərə hərbi tədris sahəsində zəngin təcrübəsi olan müəllim-zabitlər cəlb edilməlidir. Respublika Təhsil və Müdafiə nazirliklərinin birgə koordinasiyası altında tələbə gənclərin müntəzəm olaraq hərbi hissələrə səfərlərinin, təcrübəli hərbiçilərlə, həmçinin hərbi xidməti başa vurub qayıtmış gənclərlə görüşlərinin təşkil edilməsi də onların hərbi vətəntərvərlik və döyüşkənlik ruhunun artırılmasında mühüm rol oynaya bilər. Məktəb kitabxanaları məşhur hərbi xadimlərimizin müdafiə və hücum taktikalarından, Böyük Vətən müharibəsinin və Qarabağ döyüşlərinin iştirakçısı olan qəhrəmanlarımızın şərəfli ömür yolundan bəhs edən əsərlərlə zənginləşdirilməlidir. Televiziya kanallarının hərbi vətənpərvərlik redaksiyaları tamaşaçıların görüşünə suverenliyimizin, ərazi bütövlüyümüzün, sərhədlərimizin toxunulmazlığının sadiq keşikçiləri olan silahlı qüvvələrimiz haqqında daha orijinal və maraqlı verilişlərlə gəlməlidirlər. Respublikamızın müxtəlif bölgələrində on minlərlə şagirdin iştirak etdiyi hərbi idman oyunlarını 2-3 dəqiqəlik kiçik informasiyalar şəklində yox, geniş təqdim etmək kursu götürməlidirlər. Bu gün gənclərin hərbi vətənpərvərlik tərbiyəsi fəaliyyətimizin əsas tərkib hissəsi olmalıdır. Azərbaycanın gənc nəsli elə tərbiyə edilməlidir ki, torpaqlarımızı işğala məruz qoymuş düşməni məhv etmək duyğusu onun qanına hopsun, qəlbinə, beyninə, bütün varlığına hakim kəsilsin.

Zeynal VƏFA

Azərbaycan.- 2011.-11 noyabr.- S. 7.