«2+1» eksperimental teatr festivalında 16 tamaşa nümayiş olunacaq

Azərbaycan Teatr Xadimləri İttifaqının təşəbbüsü və təşkilatçılığı ilə noyabrın 26-dək keçiriləcək "2+1" adlı eksperimental teatr festivalına start verilib. Bu münasibətlə Azərbaycan Teatr Xadimləri İttifaqında keçirilmiş mətbuat konfransında festivala hazırlıqla bağlı jurnalistlərə ətraflı məlumat verilmişdir.

Azərbaycan Teatr Xadimləri İttifaqının sədri, xalq artisti Azərpaşa Nemətovun verdiyi məlumata görə, festivalın məqsədi ölkə teatrlarında çalışan rejissor, aktyor, rəssam və bəstəkarların yaradıcılıq potensialını maksimum üzə çıxarmaq, eksperimentlərə geniş meydan açaraq gənclərə daha çox imkan yaratmaq və bununla da milli teatrın inkişafına yardımçı olmaqdır: "Fikrimcə, bu festivalın çox böyük əhəmiyyəti olacaq. Bu, müsabiqə deyil, festivaldır. Məqsəd gənclərin, eləcə də yaşlı nəslin hansı ritmdə yaşamasını göstərməkdir. Bütün teatrlara bir neçə ay öncədən məlumat verilib. Festivalda yalnız arzu edən teatrlar iştirak edir. Bütün teatrlara imkan vermişik, kim hazırlaşıbsa, festivalda iştirak edəcəkdir".

Hər bir festival sənətə yeni və fərqli baxış deməkdir. "2+1" festivalı da milli teatr sahəsində baş verən yaradıcılıq proseslərini bir daha fəallaşdırmaq, səhnə sənətindəki ənənələri saxlamaq şərtilə, müasir dünya teatr prosesinə qoşulmaq meyillərinə istiqamət və dəstək verməkdən ibarətdir.

Festivalın Şuşa Dövlət Musiqili Dram Teatrının hazırladığı "İki nəfər üçün oyun" tamaşası ilə açılması da təsadüfi deyil. Bu, Qarabağa olan sonsuz sevgini nümayiş etdirməklə yanaşı, tezliklə o yerlərə qayıtmaq istəyimizin ifadəsidir.

Teatrşünas Məryəm Əlizadə "2+1" eksperimental teatr festivalının artıq üçüncü dəfədir keçirildiyini və səmərə verdiyini bildirdi. Onun sözlərinə görə, sonuncu dəfə 1998-ci ildə keçirilən bu cür festival teatrın inkişaf proseslərində mühüm rol oynayır.

M.SADIQZADƏ

Azərbaycan.- 2011.- 24 noyabr.- S. 8.