Gənc ekoloqların Qəbələ Bəyannaməsində bütün dünyanın diqqət yetirməli olduğu çox vacib prinsiplər öz əksini tapmışdır

Gənc ekoloqların Qəbələ Bəyannaməsində bütün dünyanın diqqət yetirməli olduğu çox vacib prinsiplər öz əksini tapmışdır. Biz gənclərin səsinə səs verməli, bu prinsiplərin həyata keçməsi üçün əlimizdən gələni əsirgəməməliyik.

Bu sözləri AzərTAc-a müsahibəsində BMT-nin Ətraf Mühit Proqramının nümayəndəsi Vondvosen Asnake Kibret demişdir.

V.Asnake Kibret bildirmişdir ki, dünyanın müxtəlif ölkələrindən gənclərin Qəbələdə toplaşaraq planetimizin gələcəyi üçün təhlükə yaradan ekoloji problemlərin həlli ilə bağlı məsələləri müzakirə etmələri çox əhəmiyyətlidir. Hesab edirəm ki, bu baxımdan beynəlxalq düşərgənin çox faydalı nəticələri olacaqdır.

BMT-nin nümayəndəsi həmçinin demişdir ki, düşərgədə fərqli mədəniyyətləri təmsil edən gənc ekoloqların qarşılıqlı anlaşma şəraitində səmərəli fikir mübadiləsi aparmaları onların ətraf mühitin qorunması işində fəal iştirak etmək arzularını nümayiş etdirir. Buna görə də bu cür təşəbbüslər dünyanın bütün ölkələrində irəli sürülməlidir.

Azərbaycan.- 2011.- 27 noyabr.- S. 5.