Təhlükəsizlik sahəsində beynəlxalq əməkdaşlıq mühüm əhəmiyyət kəsb edir

Qloballaşan dünya mütərəqqi proseslərlə yanaşı, dövlətlərin təhlükəsizliyi baxımından müəyyən potensial təhdidləri də ön plana çıxarır. Elə buna görə də təsadüfi deyil ki, müasir dövr təhlükəsizlik sahəsində tədbirlərin davamlı və daha çevik olmasını tələb edir. Şərqlə Qərbi birləşdirən geostrateji tranzit xətlərinin, qlobal enerji layihələrinin başlıca təminatçısına çevrilən, milli-etnik və dini dözümlülüyün yüksək səviyyəsinə görə fərqli sivilizasiyaları, müxtəlif mədəniyyətləri bir araya gətirən Azərbaycan üçün milli təhlükəsizliyin hərtərəfli təminatı xüsusilə aktualdır.

Son illərdə isə Azərbaycanın dinamik inkişafı, Bakı-Tbilisi-Ceyhan neft və Bakı-Tbilisi-Ərzurum qaz kəmərlərinin və digər iqtisadi layihələrin işə düşməsi təhlükəsizlik məsələlərini respublikamız üçün əsas vəzifələrdən birinə çevirir. Azərbaycan üçün təhlükəsizlik məsələlərinin xüsusilə önəm kəsb etməsi həm də Ermənistanın respublikamıza qarşı hərbi təcavüzünü bu gün də davam etdirməsi ilə şərtlənir. Bu münaqişənin Ermənistanın qeyri-konstruktiv və işğalçı mövqeyi üzündən həllini tapmaması bütövlükdə Cənubi Qafqaz regionunun təhlükəsizliyinə maneədir. Çünki işğal olunmuş torpaqların terrorçuların hazırlanması, narkotik maddələrin becərilməsi və daşınması, silah qaçaqmalçılığı məqsədilə istifadə edilməsi nəinki ölkəmizin, bütövlüklə bölgənin təhlükəsizliyinə birbaşa təhdiddir.

Bu gün Azərbaycanda həyata keçirilən effektiv milli təhlükəsizlik siyasətinin qarşısında təhdidin istənilən forması acizdir. Bu siyasətin əsasını uzaqgörənliklə qoyan ümummilli lider Heydər Əliyevin 1993-cü ildə xalqın tələbi ilə hakimiyyətə qayıtdıqdan sonra müstəqil Azərbaycanın xilas edilməsi istiqamətində göstərdiyi fədakarlıqlar nəticə etibarilə dövlətçiliyimizin milli təhlükəsizliyini təmin etmişdir.

Heydər Əliyevin müstəqil Azərbaycanın xüsusi xidmət orqanlarının fəaliyyətinin müasir dövrün tələblərinə uyğunlaşdırılmasında və inkişafında xidmətləri misilsizdir. Ulu öndər təhlükəsizlik orqanlarının xalqın və dövlətin maraqlarına xidmət edən çevik, mütəşəkkil orqana çevrilməsi naminə səylə çalışmış, peşəkar milli kadrların hazırlanması məsələsinə xüsusi diqqətlə yanaşmışdır. Heydər Əliyev 1998-ci il dekabrın 1-də Milli Təhlükəsizlik Nazirliyinin Akademiyasının yaradılması barədə sərəncam imzalamışdır. Bununla da Azərbaycanda ilk dəfə xüsusi xidmət orqanları üçün milli kadrların hazırlanması işinin təməli qoyulmuşdur.

Ümummilli lider Heydər Əliyevin müəyyən etdiyi milli təhlükəsizlik prioritetləri, onun sözügedən istiqamətdə atdığı addımlar, etdiyi diplomatik manevrlər Prezident İlham Əliyev tərəfindən layiqincə davam etdirilir. Prezident İlham Əliyevin siyasi fəaliyyətində milli maraqlar fonunda formalaşan təhlükəsizliyin etibarlı şəkildə təmin olunması əsas yerlərdən birini tutur. Prezident İlham Əliyev sürətlə inkişaf edən və müxtəlif sahələrdə inanılmaz uğurlara imza atan müstəqil respublikamızın milli təhlükəsizliyinin qorunmasını vacib məsələ kimi önə çəkmişdir. Bunu dövlət başçısının praktik fəaliyyətində, həyata keçirdiyi işlərdə aydın görmək olar. Respublikamızın müstəqilliyini, ərazi bütövlüyünü, konstitusiya quruluşunu, ölkənin milli maraqlarını daxili və xarici təhdidlərdən qorumağa yönəlmiş siyasətin prinsip və yanaşmalarının müəyyən edilməsi məqsədilə Prezident İlham Əliyev 23 may 2007-ci ildə Azərbaycanın Milli Təhlükəsizlik Konsepsiyasını təsdiq etmişdir. Bu konsepsiya ilk növbədə təhlükəsizlik məsələlərinin nəzəri konseptual problemlərinin geniş və hərtərəfli həll olunması baxımından mükəmməl bir sənəddir. 2004-cü ildə isə "Milli təhlükəsizlik haqqında", "Kəşfiyyat və əks-kəşfiyyat fəaliyyəti haqqında" Azərbaycan Respublikasının qanunları qəbul edilmişdir.

Son illərin reallıqları göstərir ki, təhlükəsizliyə olan təhdidlər, adətən, bir ölkənin sərhədləri daxilində formalaşmır. Məsələn, mütəşəkkil cinayətkar fəaliyyət, xüsusilə onun təzahür formalarından olan və milli sərhədləri adlayan terrorizm bütün ölkələrin maraqlarına toxunan qlobal təhlükəyə çevrilərək dünya ictimaiyyətini ciddi narahat edir. Bu mənada hazırda bütün dünya ölkələrinin etiraf etdiyi həqiqət bundan ibarətdir ki, təhlükəsizliyin etibarlı təminatı məsələsi daxili imkanlarla yanaşı, beynəlxalq birliyin qarşılıqlı-faydalı əməkdaşlığı sayəsində effektiv nəticə verir.

Bu baxımdan Bakıda keçirilən Türkdilli Dövlətlərin Xüsusi Xidmət Orqanları Konfransının XIV iclasını təhlükəsizlik sahəsində region dövlətlərinin beynəlxalq əməkdaşlığının genişləndirilməsinə və bu istiqamətdə səmərəliliyin artırılmasına xidmət edən mühüm tədbir kimi səciyyələndirmək olar. İclas iştirakçılarını qəbul edən Prezident İlham Əliyev deyib: "Dost dövlətlərin xüsusi xidmət orqanlarının rəhbərləri arasında yaxşı qarşılıqlı anlaşma vardır, səylərin əlaqələndirilməsi mövcuddur və bu, çox vacibdir. Müasir dünyada informasiya mübadiləsi, təhlükələrin aradan qaldırılması üzrə əlaqələndirmə və birgə tədbirlər müstəsna əhəmiyyətə malikdir. Hər bir ölkənin təhlükəsizliyi dövlət üçün böyük əhəmiyyət kəsb edir. Təbii ki, təhlükəsizliyi daha uğurla təmin etmək yalnız birgə səylərlə mümkündür".

Dost ölkələrin xüsusi xidmət orqanları arasındakı qarşılıqlı fəaliyyətin gələcək təhlükələrə qarşı birgə mübarizədə uğurlu olacağına əminliyini bildirən Prezident İlham Əliyev müasir dünyada terror təhlükələrinə qarşı birgə mübarizənin xüsusi önəm daşıdığını vurğulayıb. Dövlət başçısı əlaqələndirmənin, informasiya mübadiləsinin, qarşılıqlı yardım və dəstəyin xüsusi xidmət orqanları qarşısında duran vəzifələrin uğurla həyata keçirilməsi üçün əsas şərtlərdən olduğunu qeyd edib.

İclasda dünyada və regionda təhlükəsizliyə və sabitliyə qarşı yönəlmiş ümumi təhdidlərin, ilk növbədə terrorçuluğun və dini ekstremizmin yayılmasının, transmilli mütəşəkkil cinayətkarlığın qarşısının alınması istiqamətində əməkdaşlığın fəallaşdırılması və təkmilləşdirilməsi yolları, müxtəlif təhdid və cinayətlər barədə əməliyyat məlumatı mübadiləsinə dair və maraq doğuran digər məsələlər ətrafında müzakirələr aparılmışdır. İclasın işində Azərbaycan, Türkiyə, Qazaxıstan və Qırğızıstanın xüsusi xidmət orqanlarının nümayəndə heyətləri iştirak etmişlər. Rusiya, Ukrayna və Gürcüstanın müvafiq strukturlarının yüksək vəzifəli nümayəndələri tədbirdə müşahidəçi qismində təmsil olunmuşlar.

Xatırladaq ki, sentyabrın 21-22-də Rusiyanın Yekaterinburq şəhərində keçirilən dünyanın 65 ölkəsindən təhlükəsizlik məsələlərinə cavabdeh olan yüksək vəzifəli şəxslərin beynəlxalq görüşü də məhz təhlükəsizlik sahəsində beynəlxalq əməkdaşlıq məsələlərinə həsr olunmuşdu. Həmin tədbirdə ölkəmizi Azərbaycan Respublikası Prezidenti Administrasiyasının rəhbəri, Təhlükəsizlik Şurasının katibi Ramiz Mehdiyevin başçılığı ilə Administrasiyanın şöbə müdirləri Fuad Ələsgərov, Novruz Məmmədov və Elnur Aslanovdan ibarət nümayəndə heyəti təmsil etmişdir. Görüşdə təbii və texnogen fəlakətlər zamanı əməkdaşlıq, informasiya cəmiyyətinin formalaşması şəraitində beynəlxalq informasiya təhlükəsizliyi, transmilli cinayətkarlığa qarşı mübarizə məsələləri müzakirə olunmuşdur. Azərbaycan Respublikası Prezidenti Administrasiyasının rəhbəri, Təhlükəsizlik Şurasının katibi Ramiz Mehdiyevin "Millətlərarası düşmənçilik və dini dözümsüzlüklə əlaqədar böhranlı vəziyyətlərdə ekstremizm təzahürlərinə qarşı mübarizə sahəsində beynəlxalq əməkdaşlığın fəallaşdırılması problemləri" və "Beynəlxalq informasiya təhlükəsizliyinin möhkəmləndirilməsinə ümumi yanaşmalar" mövzularında məruzələri görüş iştirakçıları tərəfindən maraqla qarşılanmışdır.

Müasir dövrdə dünyada baş verən sürətli dəyişikliklər şəraitində sivil və demokratik ölkələr üçün həm də təhdidlərin müxtəlif formaları yaranır. Xüsusən geniş vüsət almış qloballaşma meyilləri bir sıra mütərəqqi cəhətləri ilə yanaşı, dövlətlərin milli maraq və təhlükəsizliyi baxımından da müəyyən təhdidləri qabarıq surətdə önə çıxarır. Bu təhdidlərin qarşısının alınmasında və ya önləyici tədbirlərin görülməsində beynəlxalq əməkdaşlığın həyata keçirilməsi olduqca səmərəli vasitələrdən biridir.

Rəşad CƏFƏRLİ

Azərbaycan.- 2011.- 12 oktyabr.- S. 6.