Bişkekdə «Prezident İlham Əliyev» kitabının ikinci cildi rus dilində nəşr edilmişdir

Bişkekdəki Türkdilli Dövlətlərin Siyasətinə Dəstək Fondunun sifarişi və maliyyə dəstəyi ilə paytaxtdakı "Biyiktik" nəşriyyatında "Prezident İlham Əliyev" çoxcildliyinin ikinci cildi rus dilində çap olunmuşdur.

Kitabda ulu öndər Heydər Əliyevin siyasi kursunun layiqli davamçısı Azərbaycan Prezidenti İlham Əliyevin həyata keçirdiyi uğurlu daxili və xarici siyasət təhlil edilir. Nəşrdə Azərbaycanın iqtisadi inkişafı, dövlət başçısının səfərləri, görüşləri və çıxışları da yer almışdır.

Kitabda 2008-ci ildə Bişkekdə ulu öndər Heydər Əliyevin 85 və tanınmış yazıçı-alim Mir Cəlal Paşayevin 100 illik yubileyləri ilə əlaqədar materiallar da verilmişdir.

Nəfis tərtibatla nəşr edilən 756 səhifəlik kitabın redaktoru Bakı Dövlət Universitetinin professoru Aqil Hacıyevdir.

Geniş oxucu kütləsi üçün nəzərdə tutulmuş kitabın Qırğız, Özbəkistan, Qazaxıstan və digər ölkələrdə pulsuz yayılması nəzərdə tutulmuşdur.

"Prezident İlham Əliyev" kitabının 1-ci cildi bu ilin əvvəllərində Bişkekdə nəşr edilmişdir.

Qulu KƏNGƏRLİ,

AzərTAc-ın xüsusi müxbiri

Bişkek

Azərbaycan.- 2011.- 14 oktyabr.- S. 7.