İki ölkə arasında siyasi məsləhətləşmələr aparılmışdır

Oktyabrın 14-də Azərbaycan ilə Argentinanın xarici işlər nazirlikləri arasında siyasi məsləhətləşmələr keçirilmişdir. Xarici İşlər Nazirliyinin mətbuat xidmətindən AzərTAc-a bildirmişlər ki, Azərbaycan nümayəndə heyətinə xarici işlər nazirinin müavini Xələf Xələfov, Argentina nümayəndə heyətinə isə bu ölkənin xarici işlər üzrə dövlət katibinin müavini xanım Norma Nasimbene de Dümont başçılıq etmişlər.

Azərbaycan-Argentina əlaqələrinin inkişaf etdirilməsi üçün geniş potensialın olduğunu vurğulayan tərəflər müxtəlif istiqamətlərdə, xüsusilə də siyasi, ticarət, iqtisadi, humanitar sahələrdə əlaqələrin genişləndirilməsində maraqlı olduqlarını qeyd etmişlər. Yüksək səviyyəli səfərlərin həyata keçirilməsinin münasibətlərin inkişaf etdirilməsində mühüm rol oynadığı qeyd olunan görüşdə qarşılıqlı maraq doğuran regional və beynəlxalq məsələlərə dair fikir mübadiləsi də aparılmışdır.

X.Xələfov Ermənistan-Azərbaycan, Dağlıq Qarabağ münaqişəsi və onun nizamlanması prosesi barədə Argentina tərəfinə ətraflı məlumat vermişdir. Azərbaycanın Argentina ilə əlaqələrə önəm verdiyini və onların daha da genişləndirilməsinin vacibliyini vurğulayan X. Xələfov parlamentlərarası münasibətlərin əməkdaşlığın inkişaf etdirilməsində mühüm rol oynadığını bildirmişdir. N.Nasimbene de Dümont Argentinanın Azərbaycanın mövcud potensialını və həyata keçirdiyi irimiqyaslı layihələri yüksək qiymətləndirdiyini qeyd edərək ölkəsinin Azərbaycan ilə əlaqələrin hərtərəfli inkişafında maraqlı olduğunu vurğulamışdır. Tərəflər eyni zamanda ölkələrimiz arasında müqavilə hüquq bazasının genişləndirilməsi sahəsində müvafiq fəaliyyətin davam etdirilməsinin əhəmiyyətini qeyd etmişlər.

Azərbaycan.- 2011.- 15 oktyabr.- S. 9.