Böyük Britaniyanın Azərbaycan, Gürcüstan və Ermənistandakı diplomatları birgə bəyanat yaymışlar

Böyük Britaniyanın Azərbaycandakı səfiri Piter Beytman, bu ölkənin Ermənistandakı səfiri Çarlz Lonsdeyl, eləcə də Gürcüstandakı müvəqqəti işlər vəkili Doug Mcmillan birgə bəyanat yayaraq BMT Baş Məclisi tərəfindən qəbul edilmiş, London Yay Olimpiya Oyunları keçirilən müddətdə atəşkəsə çağıran qətnaməni alqışlamışlar.

Böyük Britaniyanın Azərbaycandakı səfirliyindən AzərTAc-a bildirmişlər ki, müvafiq qətnamə 2012-ci ilin Yay Olimpiya Oyunlarına ev sahibliyi edəcək Britaniyanın təşəbbüsü ilə meydana çıxmışdır. BMT-nin qətnaməsində Yay Olimpiya Oyunları keçirilən müddətdə dünyadakı bütün münaqişə tərəflərinə hərbi əməliyyatları dayandırmaq çağırışı öz əksini tapmışdır.

Bəyanatda deyilir: "Biz bu qətnaməni və onun yekdilliklə qəbulunu alqışlayırıq. Böyük Britaniya Cənubi Qafqazda münaqişələrin həlli və sülhün əldə olunması üçün uzun illər səy göstərir. Ümid edirik ki, qətnamədəki fikirlər regional sülhə doğru konkret addımlara çevrilə bilər".

Azərbaycan.- 2011.- 19 oktyabr.- S. 4.