Bakıətrafı qəsəbələrdə yeni yollar çəkilir

Azərbaycan Prezidenti İlham Əliyev Bakı şəhərinin, ətraf qəsəbə və kəndlərin inkişafına xüsusi diqqət və qayğı göstərir. Ölkə başçısının "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı"na əsasən ötən müddət ərzində paytaxtda, eləcə də şəhərətrafı qəsəbə və kəndlərdə sosial infrastruktur yeniləşdirilir, müasirləşdirilir ki, bunlar da insanların rahatlığına xidmət edir.

Paytaxtda dünya standartlarına cavab verən yeni yollar çəkilmiş, yol qovşaqları, körpülər, yeraltı və yerüstü piyada keçidləri inşa edilmişdir. Yeni işıqlandırma dirəkləri qurulmuş, yol kənarlarında çəmənliklər salınmış, müxtəlif güllər, dekorativ kol və ağaclar əkilmişdir.

Paytaxtın yol infrastrukturunun kompleks halda inkişafını önə çəkən ölkə Prezidenti Bakıətrafı qəsəbələrdə abadlıq və quruculuq işlərinə, əhalinin işıq, qaz, su ilə fasiləsiz təminatına, məktəb və səhiyyə ocaqlarında xidmətə, bərbad yolların müasir tələblər səviyyəsində təmirinə, yeni rahat yolların yaradılmasına və digər sosial problemlərin həllinə xüsusi diqqət ğöstərir. Qarşıya qoyulan vəzifələrin icrası ilə əlaqədar Prezident İlham Əliyev Bakının Xəzər, Sabunçu, Suraxanı, Nərimanov, Səbail, Qaradağ, Nizami, Xətai və digər rayonlarının qəsəbə və kəndlərində olmuş, yerlı icra orqanları və ictimaiyyətin nümayəndələri ilə görüşmüşdür. Prezidentin davamlı xarakter alan bu səfərləri Bakıətrafı qəsəbələrin sosial-iqtisadi inkişafının sürətləndirilməsinə, habelə qəsəbədaxili yolların müasir tələblər baxımından təmirinə və yeni yolların çəkilişinə yeni təkan vermişdir. Dövlət başçısı cari il mart ayının 31-də Suraxanı rayonunda olarkən Bülbülə qəsəbə sakinlərinin xahişinə dərhal reaksiya vermiş, 10 gün ərzində qəsəbəni Heydər Əliyev prospekti ilə birləşdirən yeni yol çəkilmişdir. Həyata keçirilən tədbirlər nəticəsində Heydər Əliyev prospektini "Atəşgah" məbədi ilə birləşdirən S.Bəhlulzadə və V.Balandin küçələrində yerləşən qeyri-yaşayış obyektlərinin fasadları təmir edilərək görkəmi dəyişdirilmiş, "Atəşgah" məbədi yenidən qurulmuşdur.

Abad kənd, abad qəsəbə yolundan bəllidir, deyiblər. Odur ki, dövlət başçısı istər Bakı şəhərinin, istərsə də şəhərətrafı qəsəbə və kəndlərin sosial problemlərini həll etmək, yol infrastrukturunu yaxşılaşdırmaq üçün tələb olunan maliyyə vəsaitlərinin vaxtında ayrılmasını da təmin edir.

Ölkə başçısının sentyabrın əvvəllərində Bakının Binəqədi qəsəbəsində məhəllədaxili yollarda aparılan əsaslı təmir və yenidənqurma işlərinin gedişi ilə yaxından tanış olması həm də o deməkdir ki, bütün bu məsələlər ciddi nəzarətdədir. Bakı və Bakıətrafı qəsəbələrin sosial-iqtisadi inkişafı ilə əlaqədar indiyədək Binəqədi qəsəbəsində iki ay ərzində 16 kilometr yeni yol çəkilib, bərbad küçələrə çınqıl tökülüb, təmir işləri aparılıb. Qəsəbədə təxminən 80 min kvadratmetrdən artıq yol sahəsinə yeni asfalt örtüyü döşənib. Qəsəbə yollarında işıqlandırma sistemi də tamamilə yenidən qurulub, xarici ölkədən gətirilmiş 100-dən çox yeni işıq dirəyi quraşdırılıb.

Azərbaycan Prezidenti Bakının Xəzər rayonunun Şağan qəsəbəsində olarkən dövlət proqramı çərçivəsində sosial problemlərin aradan qaldırılması istiqamətində görülən işlərlə, o cümlədən qəsəbədə yolların təmiri və çəkilişi ilə maraqlanmışdır. Məlum olmuşdur ki, burada 35 min kvadratmetrə yaxın qəsəbədaxili yollara yeni asfalt örtüyü döşənib. Yollarda işıqlandırma sistemi yenidən qurulur.

Bakı-Ələt avtomobil yolunun Dövlət Bayrağı Meydanı ətrafından keçən 2-4-cü kilometrliyində piyadaların təhlükəsizliyini təmin etmək məqsədi ilə 4 yeni piyada keçidi inşa olunur. İnşaat və dizayn işləri ən müasir standartlara uyğun olaraq yüksək zövqlə həyata keçirilir. Layihə üzrə yolun bu hissəsinin ümumi uzunluğu 2,8 kilometr, eni isə 41,5 metr olacaqdır. Səkkiz hərəkət zolağından ibarət yeni yol cənub və cənub-qərb istiqamətində nəqliyyatın paytaxta rahat giriş və çıxışını tam təmin edəcəkdir.

Bakının şimal-şərqində - Bilgəh, Nardaran, Kürdəxanı və Pirşağı kəndlərində "Azəryolservis"in inşaatçıları tərəfindən çəkilən yeni yolun inşası da uğurla davam etdirilir. Altı zolaqlı bu yolun uzunluğu 42,5 kilometrdir. İnşaat işləri yolun 14-cü kilometrində aparılır. Hazırda yolda tunel tipli yol keçidi inşa edilir. Bu ilin sonunadək istifadəyə veriləcək bu tunelin uzunluğu 60 metr, eni isə 23,5 metrdir. Müasir standartlara cavab verən bu yol istifadəyə veriləndən sonra nəqliyyat vasitələri Bakı-Şamaxı və Bakı-Rusiya magistrallarına rahat və vaxt itirmədən çıxa biləcəklər.

Azərbaycan Prezidenti İlham Əliyev Bakıətrafı qəsəbələrdə olarkən ictimaiyyətin nümayəndələri ilə görüşündə demişdir: "Bütün bu hadisələr onu göstərir ki, nəzərdə tutduğumuz bütün məsələlər, bütün proqramlar öz həllini tapır. Bu proqramın başlıca məqsədi odur ki, Azərbaycan əhalisi daha da yaxşı yaşasın, bütün sosial məsələlər, infrastruktur, insanları narahat edən problemlər öz həllini tapsın. Nəinki şəhərimizin mərkəzində, kənarında da, ətraf qəsəbələrdə də şəhər mərkəzindəki kimi şərait olmalıdır".

Rəhman SALMANLI

Azərbaycan.- 2011.- 23 oktyabr.- S. 1.